АЬВДУЛЛАГЬЛУЛ АРС АЬБИДОВ ЗАЙНАЛАЬБИД

Февральданул 10-нний дунияллия лавгунни, щалва оьр­му мюрщи оьрчIру хъин буллай лавгсса, чумартсса, бюхъу хъунмасса зунтталчу, Ххюлусмату­сса Аьвдуллагьлул арс Аьбидов Зайнал­аьбид.
Зайналаьбид увссар Ххюлуссуннал шяраву 1950 шинал. Цала маэшатрал хъирив вайннал кулпат бивзссар тай шиннардий Туркманнавун, Ашхабад шагьрулийн. Тиккува школагу къуртал бувну, Зайналаьбид увхссар Туркманнал медициналул институтравун. Мугу къуртал бувну, тихва зун айивхьуссар хIакин-реанимологну. Муния махъ увхссар аспирантуралувун Москавлив. Дурурччуссар кандидатнал диссертация. Муния махъ зий ивкIссар хьхьичIунсса хIакинну Ашхабадрайсса респуб­ликалул азарханалий.
1985 шинал Зайналаьбид увкIссар Дагъусттаннайн, зун ивкIссар МахIачкъалалив республикалул чIявупрофилданул оьрчIансса азарханалий, цаппара шиннава ивтссар реанимациялул ва интенсив терапиялул бутIул каялувчину.
Зайналаьбидлул хIалал дур­ссар «ДР-лул лайкь хьусса хIакин», «ЦIуллу-сагъшиву дуруччаврил отличник» тIисса цIарду. Дуллуну дур диялсса бахшишру ва грамотартту, ва ия захIматрал ветеран. Зайнал­аьбид щарнил жяматрангу, цащалва зузисса хIакинтурангу хъинну хьхьичIунсса, ххира­сса, бусрав­сса зузалану, инсанну уссия. Циксса буссар Да­гъусттаннай ванахь барчаллагь тIутIисса, ванал хъин бувсса чIявусса оьрчIал нину-ппу, гъан-маччами.
Жуятува лавгунни ххаллил­сса нитти-буттал арс, уссу, лас, оьрчIал ппу, маччачу, дус, жяматрал чул бищу.
Цал бунагьирттал аьпа баннав, рухI хъинний дишиннав. Ванан бакъасса оьрму махънан булуннав.
Зайналаьбидлул бивкIулул кьурчIишивугу кIидачIлай, жижара буллай буру ванал уссихь, ссурваврахь, кулпатрахь, арсурваврахь ва махъсса цинявппагу гъан-маччанахь.
Ххюлуссуннал жяматрал цIания Магьдиев Арсен

———————————

Рамазаннул душ Хъюбумаева Ххадижат

Оьрмулул 76 шинаву аьпалухьхьун лавгунни ххаллилсса зунттал хъамитайпа, гьарца даймуниву, дитаймуниву бювхъу­сса инсан, арулва оьрчIал нину, Рамазаннул душ Хъюбумаева Ххадижат.
Ххадижат бувну бур 1940 шинал Ссухъиящиял шяраву, Аммил ва Рамазаннул къушлий, хъунма хьуну бур Вихьлив, ПатIиматлул ва Къаллал кулпатраву.
1964 шинал ванил бувккуну бур партиялул школа. Ккалай бивкIун бур шяраваллил хозяйствалул институтраву. 1967 шинал Ххадижат бувчIуну бивкIун бур Вихьуллал шяраваллил советрал председательну. 1972 шиная шинмай, пенсиялийн букканнин, зий бивкIун бур шяраваллил советрал секретарьну. Ванин дуллу­ссар «ЗахIматрал ветеран» тIисса хIурматрал цIагу. ХIалал дур­ссар медаллу ва бахшишру. Ванил хIарачатрайхчин шяраву дурну диркIссар ххуй-ххуйсса давурттив, бартдиргьуну диркIссар жяматрал аьркиншиннарду. Мудангу хIурматрай ва сийлий бивкIссар агьалинал дянив.
Ххадижат ахиратрал шаврил пашманшивугу кIидачIлай, дакIнийхтунусса жижара буллай буру ванил лякьлул оьрчIахь, уссур­ссуннахь, махъсса цинявппагу гъан-маччаминнахь.
Цил бунагьирттал аьпа баннав, рухI рахIатний дишиннав!
Вихьуллал
ва Ссухъиящиял жямат