Дагъусттаннал циняв журардал муштаритурал 2016 шинал январьданийннин ишла бувсса электроэнергиялухсса бурж хьуну бур 17 млрд. ва 500 млн. къуруширттал. Миннувату республикалул агьалиналсса хъанай бур 1 млрд. ва 500 млн. къурушру. Мунил хIакъираву бувсунни Дагъусттаннал энергосбытовая компаниялул прессалул къуллугърал.

ХIасан Аьдилов
Компаниялул управляющий директорнал хъиривчу Назим Эфендиевлул бувсъсса куццуй, ДЭСК-рал хъуннасса къулагъас дуллай бур электроэнергиялух хьусса буржру бухлаган баврин хасъсса Комплексъсса план би­ттур даврих.
«Комплексъсса план биттур даврил хIасиллу ххал диргьу­ссар АьФ-лул СКФО-райсса вакилнал аппаратрайгу, ДР-лул ХIукуматрайгу. Региондалий электроэнергиялух хьусса бурж бухлаган баврил масъала ххал бивгьуссар ДР-лул Жяматийсса палаталийгу, муния буслайнма бур СМИ-рдайгу.
Ччувччусса токрахсса багьа къабуллалаву инсантурал менталитетрацIун бавхIусса иш бур, амма кувний мунил савав дикIай инсантурал ласайсса харжру чансса бушаву, къажанжу дакъашиву», — увкунни Эфендиевлул. Ганалва мукъурттийн бувну, компаниялул зузалтрал муданма бувчIин буллай бур ток­рахсса багьа къабуллалиминнан, багьа къабуллалаврил ахир ссайн дуккан бюхъайссарив. Муштаритуран за бувчIин бан къахъанахъисса чIумал энергетиктуран багьайсса бур закондалул ккаккан дурсса давуртту дайдишин, масалдаран, бурж гужрай ласун.
Буржлув хьусса учреждениярттавух дур республикалул балансрайссагу, федерал бюджетрайн дагьайссагу, мукунма ток кьукьин къабучIисса социал агьамшиву дуссагу (азарханарду). ДукIу республикалул бюджетрал бурж хьуну бия 40 млн. къуруширттал, федерал бюджетрал бурж – 74 млн. ва 800 азарда къурушру, кIанттул бюджетрал бурж – 150 млн. къуруширттал.
ДЭСК-лул цаймигу бур захIматсса муштаритал – ЖКХ-лул предприятияртту, миннуй бурж хьуну бур 623 млн. ва 700 азарда къуруш. Энергокомпаниялул цащава шайсса хIарачат буллай бур ми муштаритурай буржру хьун къабитан. Масалдаран, циняв шагьрурдал ва районнал бакIчитурайн чичлай бур чагъарду, миннал каялувшиврулусса предприятиярттай электроэнергиялух хьусса буржгу ккаккан бувну, га лахъан аьркиншивугу бувсун. ХIатта судрал бурж лахъан тIалав буллалисса хIукму хьусса чIумалгума, ца­ппара предприятиярттал хIарачат бай бурж лахъаврия лабикIан, лихъан.
2015 шинал бурж къалахъайсса муштаринаща гужрай бурж ласаву мурадрай судрайн чивчуссар 2 млрд. ва 900 азарда къурушрансса исковый заявленияртту, миннувату чIявуми бур юридийсса организациярду (2 млн. ва 800 азарда къуруш).
ХIакьинусса кьини судирттай ххал дигьлай бур 1 азаллий 834 исковый заявление 10 млрд. ва 300 млн. къуруширттансса.
Муштаритурай хьусса буржру лахъан буллай бур цамургу журалий – тайнначIансса ток кьукьаврийну. Му ку­ццуй уттинин 305 бурж бусса муштариначIансса токрал ххаллу кьуркьуну дур, миннай хьуну бур бурж 2 млрд. ва 100 азарда къуруш (инсанталгу, предприятиярттугу хIалану). Энергетиктурал бувсса хIарачатирттайну 347 млн. къуруширттал буржру лахъан бувну бур.
Энергокомпаниялий мукунма бувсунни ашкара буллай бушиву кьутIи къачирчуна, учет­райн къалавсун электроэнергия ишла буллалисса инсанталгу. Масалдаран, дукIу ашкара бувну бур кьутIи дакъа ток бувцусса 247 инсан ва учетрайн къалавсна ток ишла буллалисса 60 инсан. Миннал хIакъираву хIадур дурну дур материал ва кIункIу бувну бур жаваблувшиврийн.