Февральданул 17-нний Дагъусттаннал БакIчи Рамазан АьбдуллатIипов ивунни ГИБДД-лул «Северный» ва «Южный» постирдайн. Республикалул каялувчинащал бия ДР-лул ХIукуматрал Председатель Аьбдуссамад ХIамидов, Дагъусттаннал хъуншагьрулул бакIчи Муса Мусаев, МахIачкъалаллал районнал бакIчитал ва цаймигу.
Гьарца машинартту бавцIусса кIанттурдай Рамазан АьбдуллатIиповлул ххал байва лагмасса кIанттурду, ккаккан дайва диялдакъашивуртту. ЛяличIисса къулагъас дурунни закондалийну дакъа дурсса строениярттах, шагьрулул дузалшиндалух ва санитар тагьарданух.
Масалдаран, кьиблалул чулуха шагьрулувун буххайсса кIанай Дагъусттаннал БакIчи авцIунни машинартту баххайсса базаллучIа, тикку ккаккан дунни цаппара диялдакъашивуртту ва хъуншагьрулул бакIчиная тIалав бунни ххуллул чIарахсса кIанттурду низамрайн буцин, цаппара ишбажаранчишиврул объектру закондалийн чул бивщуну бувну бурив ххал буван.
Мунияр ххишалагу, гьаз бунни авторынок тичча бизан баврил масъала. Ганал мукъурттийн бувну, бигьалагай кьинирдай вай кIанттурдайх бачин бюхълай бакъар тиху-шихунмай.
Яла Дагъусттаннал БакIчи лавгунни хъуншагьрулул ухссавнил чулийсса портрайн. Рамазан АьбдуллатIипов рязину ливчIунни гиккусса тагьардания. «ХьхьичIрасса тагьарданух бурувгун, цIана тиччалу ххуй бувну бур», — увкунни ганал.
Республикалул хъунаманал увкусса куццуй, шагьрулувун буххайсса кIанттурдай дузалшин ва марцIшиву дикIан аьркинссар.
Дагъусттаннал БакIчинал премьер-министр Аьбдуссамад ХIамидовлуйн тапшур бунни цалва хъиривчутуравасса ца цIакь уван шагьрулул дузалшиндалул жаваб дулайману.
