Вай гьантрай Кировский райондалул бакIчи СалихI Сагидовлул ххал дурну дур Шоссе Аэропорта кIичIиравусса хъун ламу бакьин буллалисса давурттив. Ламу бакьин буллалисса давурттив шикку дайдирхьуссар хъуншагьрулул бакIчи Муса Мусаевлул амрулийну.
З.АьбдурахIманова
Райондалул бакIчинал бусаврийну, цIанакула байбивхьуну бусса бур ламул кIивагу чуллахсса бордюрду баххана буллай, яла тротуарданийсса плитка цIудан тIий бусса бур. Мукунна цIудантIиссар халкь бахьтта бачайсса тротуардануцIухсса муххал чапарду. Хъирив, асфальт бувтIуну, ламуйхсса ххуллу бакьин бувантIиссар.
СалихI Сагидовлул къулагъасралун лавсун бур ламуйсса чаннал масъалагу. ТIалав бувну бур, лахIу-ччахIу хьусса, чани лахъайсса тталлу бакьин бувну, кIилийну чани булайсса светильникру дишин.
Ламу цуппа бивхьуну буссар «Махачкала – Астрахань» федерал трассалий. Ттинин шикку халкь бахьтта занансса тагьар къаххуйсса диркIун дур, мунияту цIуну дуллалисса давурттавух хIукму хьуну бур тротуардугу цIубуван.
