Жуяра ларгсса шинал, декабрь зурул 14-16-нний, Франциянал хъуншагьрулий Парижлив, ООН идаралул биялалувусса ЮНЕСКО тIисса дунияллул культуралул иширттал ялув дарцIусса идаралул штаб-квартиралий, хьуссар «Дагъусттаннал ва Дарбантуллал кьинирду Парижлив»- тIисса хъинну агьамсса мажлис.
Микку гьуртту хьун Ккуллал райондалия лавгун бивкIссар Халкьуннал цIанин лайкь хьусса къавтIалтрал ансамбль «Бартукь». КъавтIалтну бивкIссар Ибрагьимова Марина, Рамазанова Гулжагьра, Саидова Аьишат, Оьмариева Камилат.

Рамазанова Гулжагьрал бувсуна ттухь кутIану цала аьрххи-ххуллулияту.
— Дагъусттаннал делегация бухьунссия 80-ннийн ивсса инсан. Миннавату жу, мукьва лаккудушгу, ца жула балайчи МухIсин Камаловгу, Дагъусттаннал культуралул министр Зарема Буттаевагу бакъа, лакку инсантал бивкI ххай бакъара. Жу тихун бияйхту «Ибис» гостиницалуву кьамул бувнав. Дуки-хIачIиягу жун гиккувасса ресторандалуву дулайва. Га кьини жу, ххуллийх най инжит хьусса инсантал, бигьалаган бивтунав. Хъиривмур кьини цал кIюрххила репетицияртту дуллали бувнав. Яла, ах­ттакьунмай, ЮНЕСКО идаралул концертру дувай залдануву Да­гъусттаннал аьмсса концерт кка­ккан дурссия. Тикку жущал бия Хасав шагьрулиясса «Эхо гор» ансамбль, Ахъушиял ансамбль, «Ботлих» ансамбль, «Лезгинкалува­сса» къавтIалт ва цаймигу артис­тал. Залданул фойердаву дия Да­гъусттаннал халкьуннал искусствалул выставкагу. Жу тикку га кьини махъатунин ливчIунав. Хъиривмур кьини, декабрьданул 16-нний, жу гиднащал бувцунав экскурсиялий Парижлийх.