Февральданул 24-нний ДР-лул ХIукуматрал Председательнал хъиривчу – ДР-лул экономикалул министр Раюдин Юсуповлул каялувшиврулу хьунни Дагъусттаннай Зунттал шин даврил Сакиншинналул комитетрал 1-сса заседание.
ДакIнийн бутанну, республикалий гьашину Зунттал шин хъанахъишиву баян бувссар 2015 шинал ноябрьданул 6-нний Дагъусттаннал БакIчинал ХIукмулийну, зунттал районнай экономикалуву лябукку шаву мурадрай.
Раюдин Юсуповлул мукъурттийн бувну, ДР-лул Сакиншинналул комитетрал, Экономикалул министерствалул, Дагъусттаннал БакIчиначIасса Экономикалул советрал элмийсса институтирттащал цачIу тамансса хIадур шаврил давуртту дурну дур Зунттал шинал хахливу. ЦIакь дурну дур сакиншинналул ва техникийсса давурттал план. Ца яла агьаммур давуну хьунтIиссар июньдалул 15-19-нний «Эффективное развитие горных территорий России» темалийнусса элмийну-практикийсса конференция баву. Му Зунттал форумрайн оьвчинтIиссар аьлимтурайн, федерациялул, региондалул ва муниципал управлениялул органнал вакилтурайн, ишбажаранчитурайн, жяматийсса организациярдал ва СМИ-рдал вакилтурайн. Мартрал 10-нний хьунтIиссар му мероприятиялийн хIадур шаврин хасъсса «ккуркки стол».
Вице-премьернал бувсъсса куццуй, официальну Зунттал шинал тIитIаву хьунтIиссар Хивуллал райондалий Хив шяраву мартрал ахирданул гьантрай Цалчинмур хъарас щаврил (Хъурдаккаврил) шадлугърал кьини.
Заседаниялий бувсунни мукуннасса планну хIадур дуван аьркинну душиву муниципал сакиншиннал даражалийгу. ЧIяруми районнал мукунсса планну хIадур дурну дуллуну дур Экономикалул министерствалийн, лирчIми районнангу хIадур дан аьркинни ччясса мутталий. Раюдин Юсуповлул бувсунни мукунма пландалий ккаккан бувну бушиву зунттал районнай ламурду бан, медициналул центрду бан, янна дуруххайсса, халичартту щащайсса ва цаймигу производствартту тIитIин, цIусса садикру бан, ризкьилул фермарду, дикIул цехру, ахъулссаннул багъру бан, чIиримур ва дянивмур бизнес лядуккан дан.
ХIадур бувссар
ХIасан Аьдиловлул
