Хъуннасса кьурчIишивугу кIидачIлай, жижара буллай буру жулва редакциялул зузала Чиндоева Кьабилатлухь ванил аьзизсса душ
Калимат (Роза)
жагьилсса оьрмулий, дурагу 40 шинаву, аьпалувух бишаврийн бувну.
Махънал оьрмурдай барачат бишиннав, Калиматлул рухI алжаннул ххари даннав.
«Илчи» кказитрал коллектив
———————————
Нитти-буттал аьпалун
Ттул ппу Читтурдал шяравасса ХIасанов СалихI Аьвдулмажидлул арс ивкIун ур яхI-къирият дусса ишбажаранчи – хъуслякъу. Цувагу ххуйну лачIун уккайсса ия тIий буслан дикIайва хъунна бава. Мунал бивкIун бур цува заллусса дуссукъатта Пензаллал областьрай Маршатек шагьрулий.
1941 шинал июль зуруй лавгун ур аьрайн цала хушрай.
1943 шинал август зуруй ивкIуну ур Курскаллал дугалийсса талатавриву. 1943 шинал бувкIссар мунал маоьлул чагъар. СалихI увччуну уссар Покровка тIисса шяравусса уссушиврийсса гьаттаву.
1982 шинал ттул чIивима уссу лавгссия буттал гьаттайн иян цалва кулпатращал.
Ттула нину-ппу дакIнийн бичлай чичлай бура вай ххару
Мукьва оьрчIгу кьабивтун,
Бутта аьрайн лавгуна,
ЧIана-чIивима оьрчIан,
Шин ва дачIи дуссия.
Бигьа бакъая ниттин
Мукьва-мукьва оьрчI ябан,
Хьхьурай жуларду дуллай,
Аьрайн тIайла дуккайва.
Бургъилугу гъилири,
НиттичIагу нахIури,
Дадай тIисса чIу бавкун
Чурххал базурду бякъай.
Ххирая, дадай, вил магьри,
Хьхьувай жухьва бусайсса,
КIарттув шавхьсса вил ччатIгу,
ТIувтIу багьсса каругу.
Буттал маоь бувкIуна,
Ниттил лухIи ларххуна,
Мюрщи чIивитIухъулгу
Ятинталну ливчIуна.
Хьхьувай шану бакъая,
ОьрчIал янна-ус шюшлай,
Дяхтта цулуй, мухI бишлай
Ниттил оьрму лавгуна.
БакIрай кьяпа бивхьуна,
Ччаннайн чакма ларххуна,
ЧIиникI канил бувгьуна,
Нину чялиш дурккуна.
Нава хъунмасса хьуну,
Буккин-чичин лавхьхьукун,
Ниттил буттукьираву
Ттун ца чагъар лявкъуна.
Дуниялгу ччучлай дур,
Дяъвигу къизгъинсса бур,
Буттал кIану буручлай,
На оь экьи бутIинна.
Ягу цIаравун ххявххун,
Виричу цIа ласунна.
Ца кьини кIюрххицIунмай,
Ттул буттал чIиви пукьа,
Ав-ав, вав-шав тIутIисса
ЧIахху хъаннил бувцIуна.
Ттул оьрчIру вийн аманат,
Ттун мурадиран бувсса,
Щакъаливхсса ттул тIутIий,
Нагу хъамамаитав.
Ва чагъаргу буклайнна,
Нину аьтIий дикIайва,
ЯтIул чIаврдайх ялавай
Арцул мукьал кIунтI багьлай.
Щюлли хьхьирил дюкьаннав,
Германнал чапур аьрщи,
Ххаллилсса жагьилтурал
БакIру аьян бивхьусса.
ЧIал къархьуну нинугу
ЦIаллил шанийн дагьуна,
ЦIунцIиялул ххяппуща
Ххассал дуван къархьуна.
Щил битайссар нину-ппу,
ОьрчIая щалихханнин,
Дадай, ххирасса дадай,
Хьурдай ца вил чIу баян!
Зун алжан буливухъул,
Жун ххирасса нину-ппу,
Алжаннул багъирдавух
АрхIал лехлай лякъиннав.
Дяъвилул цIу лещаннав,
Дакьавугу цIакь хьуннав,
Жулва оьрчIал оьрмулий
Ттупанграл чIу къахьуннав.
ПаччахIтурал дяниву
МаслихIатшиву хьуннав.
Хъинмур дакIнийн багьаннав,
Дяъвилул цIу лещаннав.
Къушиева Айманат,
ш. Читтур
