ГьунчIукьатIрал шяраватусса Къушиев Айдамир Аминнул арснал буттайх­сса нясав, 11 никирал хьхьичI, дайдихьлай дур 1660 шинал ахирданий цала хъарахърай «ХъуцIрав» Аллагьутааьланал аьрщи нясив дурсса Малла-Аьлияту. Ванал 8 арснал ца къяртлуясса наслу хъанай ур Айдамир.
Амин Аьбдуллаев
Ниттийхсса Айдамирдул нясав най дур Кабир Оьмардул (хъуна Оьмар) Дандамахъай­сса къяртлия 10-мур никираву. Айдамирдул нину Асиятгу, хъунасса аьлимчу Амаев Амиргу ца ниттил бувсса оьрчIру бур.
Айдамир увну ур Гьун­чIукьатIув 1950 шинал. 1969 шинал къуртал бувну бур Гьун­чIукьатIрал школа. 1969-1971-ку шиннардий Ордженикидзе шагьрулий дуклай ивкIун ур институтраву. 1971-1974 шиннардий хьхьирил аьралуннаву цалва бурж лавхъун бур (Северный флотрай, ш. Полярная) чин старшина 1-ой степени. 1975-1981 шиннардий, хьхьувай дуклай, къуртал бувну бур политехнический институт. Мира шиннардий зий ивкIун ур Каспийскалий «Точной механики» заводрай: токарну, инженер-технологну, инженер-конструкторну, цехрал начальникнал хъиривману. 1990-1997-ку шиннардий «Волга» тIисса Опытный заводрай инженер-технологну, нормировщикну зий ивкIун ур.
1997-2011шиннардий зий ивкIун ур пограничный управлениялул Каспийскаллал судоремонтный заводрай, корпусно-сварочный участкалул хъунаману, яла хъунама инженерну, хъунама механикну. Пограничный аьралуннал пароходру бакьин байсса докрал мастерскойрдал хъунаману. 2011 шинал цала хушрай даврия лавгун ур. ЦIанасса чIумал ГьунчIукьатIув ивзун, цанна къатри дуллай ур. Лажин кIялану цува зузисса давурттай бивхьусса захIматрахлу Айдамир лайкь хьуну ур «Отличник погранвойск 1-ой степени» тIисса лишандалун. Мадара­сса хIурматрал грамотартту дур. Дуллуну дур медаль «Ветеран труда». Ва ивкIун ур Каспийск шагьрулул горком КПСС-рал комитетрал членну. Айдамирдул цала шамагу арс, нину дакъашиву кIул къабувну, хъунигу бувну, дуккингу бувну, чивун буккан бувну бур тIайлану, хIукуматрал ккаккан бувсса ххуллий къуллугъ буллан.
Хъунама арс Къушиев Рустам ур хъунама механикнал 1-ма кумагчи, компания (Канада) «ТИКИЙ ШИПИНГ». Увну ур 1977 шинал МахIачкъалалий. 1992 шинал Каспийскалий къуртал бувну бур 9 класс 1-мур школалий. Гара шинал увххун ур Каспийскалий 6-мур СПТУ-равун. 1995 шинал къуртал бувну, хьуну ур сварщик, сантехник-монтажник. Ца шинай стройкалий сварщикшивугу дурну, лавгун ур 1996 шинал аьрали бурж лахъан, ВМФ-раву 2 шинай (Мурманскаллал обл. шагьру Заозерный). Зана шайхту 1998 шинал декабрь зуруй, зун увххун ур Каспийск шагьрулийсса аьралуннал частьравун вахтенный матросну. 1999 шинал июль зуруй дуклан ув­ххун ур Волга-Каспийский рыбопромышленный колледжравун Астраханнай, пароходрал электромеханикнал касму л­ахьхьин. Колледжраву отличнайну дук­лай уну тIий ванан Областрал губернаторнал стипендиялун лайкь хьушиврул свидетельство буллуну бур.
2002 шинал Рустамлул колледж ЯтIул дипломрай къуртал бувну бур. Увххун ур гара шинал Новороссийскаллал паччахIлугърал хьхьирил академиялувун (цIана «Государственный морской университет имени адмирала Ф. Ф. Ушакова»). Академиягу 2006 шинал ЯтIул дипломрай къуртал бувну бур. Мунищала ванан лейтенант запаса чингу дуллуну дур. 2007 шинал Рустам зун ув­ххун ур Канадаллал танкерный компаниялувун практикант-машинистну. 2008 шинал январьданий 3-чинма механикну цIакь увну ур. ЦIанагу вара компаниялуву зий ур 1-ма механикну (старший командный сос­тав). Шикку зузиссаксса чIумуй ва ивну ур вай хIукуматирттайн: США, Канада, Мексика, Перу, Венесуэла, Бразилия, Норвегия, Испания, Голландия, Англия, Шотландия, Франция, Эстония, Швеция, Дания, Греция, Гибралтар, Япония, Тайвань, Корея, Сингапур, Австралия, Малайзия, Ливия, Египет, Бенин, Ангола, Конго, Саудовская Аравия, Алжир. Рустам цалва кулпат Каринащал тарбия буллай ур 2 душ: ПатIимат ва Изза.
Айдамирдул кIилчинма арс Мямма цIанакул къуллугъ буллай ур морфлотрай хъунама мичманну. Аьрасатнал Федерациялул Пограничный Управлениялул ФСБ-лий.
Айдамирдул чIивима арс Назим зий ур «Intelma» тIисса компаниялий проектру даврил хъунаману. Вайннал щаллу, сакин дувайсса дур дахху-ласу дувайсса идарарттал учет, автоматизировать байсса бур сайтру.
Айдамирдул цалагу, цаява бивзминналгу кулпатру эбрат­рансса бур, лажин кIялану цалва захIматрай сакин хьусса. Му сакиншиндарал сававгу тухумрал куртIшиврува нанисса дур.