Февральданул 18-нний ДР-лул Промышленностьрал ва машлул министерствалий хьунни базардал давурттал анализран хасъсса межведомственная комиссиялул заседание. Заседаниялий гьуртту хьунни межведомственная комиссиялул члентал – министерствалул вакилтал, ДР-лул Роспотребнадзорданул Управлениялул каялувчи, ДР-лул УФНС-рал вакилтал, региондалул МЧС-рал вакилтал, мукунма властьрал муниципал органнал ва базардал каялувчитал.

ХIасан Аьдилов
Ххал бигьлай бия базардаву дахху-ласулул давуртту низамрайн дуцаврил масъалартту ва закондалий бакъасса базарду лакьаврил масъалартту.
Заседание тIитIлай, Дагъус­ттаннал Минпромторграл бакIчи Юсуп Умавовлул барчаллагь увкунни межведомственная комиссиялул члентурахь ттинин базарду низамрайн буцавриву дурсса давур­ттахлу. Ганал мукъурттийн бувну, ларгсса шинал мадарасса давур­тту дурну дур базардал давуртту низамрайн дуцаврил иширттан хасну. Амма цинярда дансса давур­ттал дайдихьур.
Республикалул муниципал сакиншиннардийсса базарду низамрайн буцаврил хIакъираву Умавовлул бувсунни, Федерал законнайн бувну, тиккусса базардалсса бай­ссар, кIанттул цилакаялувшиврул органнал. «Районнайсса ва шагьрурдайсса базардал давурттал жаваб дулайссар администрациярттал бакIчитурал», — увкунни ганал. Яла хIукму хьунни Дагъусттаннал шагьрурдайсса базарду ххал бан,
Минпромторграл муштаринал базаллул отделданул хъунама Наби Юсуповлул увкусса куццуй, цаппарасса базарду бакъар я пландалий, ягу сияхIирттай, мунийн бувну миннал му иширал хIакъираву цимилагу баян бувну бур республикалул ихтиярду дуруччаврил органнайнгу.
«Яла захIматмур масъала хъанай бур базардал лагмава щябив­кIун маша буллалисса инсантурал хIакъиравумур. Муниципалитетирттал вакилтал бур, ай, туну, миннащал ччалан захIмат хъанай бур тIий. Яни гай сияхIрайн ласун бюхълай бакъар, ягу букьан буван бюхълай бакъар», — увкунни Наби Юсуповлул. Ганалва увкусса ку­ццуй, базардавун рейд дуллалиссар тIисса «къя» барча, гацIанара ти­кку низам шайссар. Наби Юсуповлул мукъурттийн бувну, базаллувусса диялдакъашивурттуну дур машачитурал лаххия дагьайкунсса да­къашиву, даххайсса затирттай багьа ккаккан къабаву ва цаймигу. ДР-лул Роспотребнадзорданул Управлениялул хъунмур Элеонора Оьмариевал тIурча базаллуву тамансса диялдакъашивуртту кка­ккан дунни. «Тагьар хъин чулийннай даххана дуван цуксса хIарачат булларчагу, иширайну хъинну чансса дакъа дахханашиву хьуну дакъар. Масалдаран, базардавун буххайсса кIанттурду чапалну бур, тиччалу щаллу бувну бакъар энергиялул, щинал ва гъилишиврул. Санитар духтуртурал муданма ашкара буллай бур ччяни цух учайсса продукция дахлай бушиву миннул чIун ва ядаврил шартIру къадурурччусса тагьардануву», — увкунни ганил. Республикалул хъунма-хъунмур санитар хIакиннал мукъурттийн бувну, 2015 шинал Роспотребнадзорданул управлениялул зузалтрал чивчуну бур 1 млн. ва 27 азарда къурушрансса 67 протокол административ правонарушениярттал хIакъираву.