Лакрангу, лак бакъаминнангу кIулли жулва миллат кIулшивурттах мякь багьнувасса, элмулул лахъазандарайн буккан хIарачатрайсса бушиву. Цалчинмур ЦIувкIратусса ЦIаххаев Мустангирдул ва Римал душ Карина Исяевагу школданий дуклакинийва кIулшивурттал хъирив багьсса душ бушиврул цIа дикIайва жул жяматраву.

МахIачкъалаллал № 16 школагу марцIну ххювардай къуртал бувну, Карина Дагъусттаннал университетрал юридический факультетрайн дуклан бувххун бур, 2008 шинал ЯтIул дипломрайну къуртал бувну бур. Каринал бюхъу-хIарачат, элмулул чулийнмай итххявхсса бушиву хIисавравун лавсун, деканатрал мунин маслихIат бувну бур факультетрайва бацIан. Зий бур кIицI лавгсса факультетрай, конституциялул ва муниципал ихтиярдал кафедралий хъунмур преподавательну. Дарсру дихьлай бур ДГУ-лувусса колледж­равугу. Вай гьантрай Карина Исяевал дурурччунни элмурдал кандидатнал диссертация. ХIакьинусса кьини агьамсса тема – «Идеологическое многообразие как основа конституционного строя России».
Каринан 30 шин дур. Мюрщисса оьрчIалссагу, ичIаллилссагу бувну, дарсругу дихьлай, аьлимчу хьунсса хIарачат бувавугу биялсса гьунарди. МахIачкъалаллал №22 лицейраву 4-мур классраву дук­лакисса арс ХIусайхангу уттива математикалул олимпиадарттай хьхьичIунсса кIантту бугьлай ур. Душ Лайлигу махъун къабагьанссар. «Ттулалусса хIарачат бакъар, ттул лас Марсельгу мудан на дуллалисса даврил чIарав ацIайсса ур. Ттуву­сса элмулух­сса шавкь чIалай, мудангу гъира ххи хьунмур бакъа къаучай. Укун чантI увкусса лас ушивугур тIайлабацIу», — тIий бур Карина. Ххари хьуру жугу Каринал элмурдал кандидатшиврул диссертация дурурччуну душиврул хавар баяйхту. ДакIнийхтуну барча буллай буру Каринагу, мунил ичIувациригу, гъан-маччамигу. Ххари хьу­ссаркьай, циван ххари къахьуви, душнил душнил хIарачатрая оьр­му ЦIувкIуллал школалий физикалул дарсру дихьлай гьан бувсса ттатта ХIасан-ХIусайн Кьурбанаьлиевгу ва мудангу жяматрал иширттавух чялишну хIала уххайсса ттатта МахIаммад ЦIаххаевгу, ппу Мустангиргу, учительнал касму лархьхьусса нину Римагу, ласгу, ласнал ляхъингу. Цуксса ххари къахьунссия дунияллия ларгсса кIирагу бава Басират ва Уммусалимат. Аьпа­ бивухъул, цивппа бавцIусса кIану ххуй байсса, хIалимсса, узданшиву ххисса, ххаллилсса цIувкIрахъами. КIицI къадурну ритан къахьунссар Марсельлулма буттал, аьпа биву, Исяев ХIусайханнулмур цIагу. Му жяматран хъинбалдарансса давур­ттаха зийнувасса адамина уссия. Оьрмулул чагъираву лавгссия дунияллия. Учарухха, мархри ххуйналли ххуймуничIансса хъитгу аслансса куну. Гьар дуллалимуниву тIайлабацIу баннав вин, ттул шяравудуш Каринай! Элмулуву цIу-цIусса лахъазанну мютIий дувансса бюхъугу, тавпикьгу чIа тIий буру.
ПатIимат Рамазанова