Уттигъанну «Почетный работник общего образования Ро­ссийской Федерации» тIисса бусравсса цIанин лайкь хьунни МахIачкъалаллал 13-мур гимназиялий зузисса Аьбдуллаева ПатIима ХIажинал душ.

Бувну бур ПатIима 1959 шинал июньдалул 10-нний Лакрал райондалий Кумиял шяраву. 1976 шинал Щурагьиял 9-мур школагу къуртал бувну, був­ххун бур ДГУ-рал чил билаятир­ттал мазрал факультетрайн. Му къуртал бувну бур 1983 шинал. Шагьрулул 13-мур гимназиялий тIурча ПатIима ХIажиевна зий бур 2002-ку шиная шинмай.
ПатIима ХIажиевна бур творчествалул зумуну зузисса педагог. Ванил дарсру дикIай хъинну мюрш бивкIун, хъирив лавну хIадур дурсса. Цилва хьхьичI бивхьусса кIулшиву дулаврил ва тарбиялул мурадру ва щаллу буллай бур лавайсса даражалий. Шиная шинайн салкьи дуллай бур дидактический материал, цийн бувнугу бюхълахъи­сса гьарцагу дуклаки оьрчIащал цаща-цащалласса даву дуллан. Ванил даврил агьаммур мурад бур гьарцагу оьрчIан мукъуйну ва иширайну кумаг баву. Гьарцагу оьрчI цалла каширдайн, цалва гужрайн вих шавриву кабакьу баву, цалва ххуллийн уккан кумаг баву – социал педагогнал хьхьичI бивхьусса агьамми масъаларттащал ПатIима хъинну ххуйну лаллай бур. Педагогнал даву хъар хъанай дур ххишала дакъа чIярусса шартIирдая, хьхьичIра-хьхьичIрив, учительнал дуклаки оьрчIахсса ургаврия, мунал хасиятрал, бюхъурдал каширду хIисавравун ларсун ишла буллалисса кьяйдардая. Гьамин, социал педагог хIисаврай вана укунсса позиция бур ПатIима ХIажиевнал. Цилла давриву ва хIарачат буллай бур бюхъавай ххуй бакъамур, оьккимур хьун къабитан, яни оьрчIал къуццу тIутIавривусса, занакьулушиндаравусса негатив иширттал профилактика дуллай, мунийн бувну оьрчIал лагма-ялттусса социал микросфера цIуллу-цIакь дуллай. Аьбдуллаева ПатIима цилла давриву цIакьсса дахIаву дуну бур классрал каялувчитуращал, махъсса учительтуращал ва гимназиялул психологнащал.
ПатIима ХIажиевнал дуклаки оьрчIан буллалисса психолого-медико-социал кумаграйн бувну, «группа рискалувусса» оьрчIаща бюхълай бур цалла хьхьичIсса захIматшивуртту дух дуван, дахчилачимур дукьан дурну, ду­ккаврил даража лавай буван.
ПатIима чIявуну гьуртту шай­ссар классрал каялувчитурал методъобъединениялул заседаниярттай. Гимназиялул дуклаки оьрчIал дуккавривусса ва элмулувусса хьхьичIунсса ккаккиярттаву ПатIима ХIажиевнал бутIагу биялсса буссар. Ва гимназиялул оьрчIру гьуртту шай­ссар «Шаг в будущее» элмий­сса ва практикалул конференциялий, социологиялийн бувсса «Исследование проблемы «отцов и детей» в современном дагестанском обществе» тIисса.
2005 шинал ПатIима гьур­тту хьуссар социал педагогтурал дянивсса республикалул конкурсрай. ОьрчIру тарбия бавриву, миннан кIулшиву дулавриву чIярусса шиннардил дянив був­сса захIматрахлу лайкь хьуссар ХIурматрал грамоталун.
«Илчи» ПатIимал яла ххирамур кказитри. Муданмагу чичайссар ванил цилва аьзиз­сса кказит. 13-мур гимназиялий «Илчи» кказит чичайссар 20-ннийн бивсса инсантурал.
ПатIимал лас Аьбдуллаев Идрис зий ур Хасавюртуллал консерварттал заводрай цехрал начальникну. Вайннал душ Изаза кулпатрал хьуну бур.
«Почетный работник общего образования Российской Федерации» бусравсса лишандалущалгу барча буллай, чIа тIий буру ПатIима ХIажиевнан уттигу чIярусса шиннардий цинма ххирасса пишарай зунсса цIуллу-сагъшиву, кулпатраву нахIушиву, оьрмулиясса чIярусса ххаришивуртту.
Низами Шяъбанов,
ДР-лул лайкь хьусса учитель
Таржума Бадрижамал Аьлиевал