Январьданул 19-нний республикалул хъуншагьрулул бакIчи Муса МусаевлучIа хьунни ларгмур шинал дурсса давурттал хIасиллая бусласи­сса батIаву. Шикку гьуртту хьунни, МахIачкъалаллал идарар­ттал пишакартал бакъасса, рес­публикалийсса Росреестрданул управлениялул каялувчитал ва цаймигу пишакартал.

З. АьбдурахIманова
БатIаву тIитIлай, шагьрулул бакIчинал кIицI лавгунни, духмур шин шагьрулун хьушиву къабигьасса ва агьамсса. Бувсунни, харж-хуржлицIун бавхIусса масъалар­ттах къабурувгун, МахIачкъалалив ЖКХ-лул ва социал-маэшатрал арардаву чIярусса агьамсса давурттив дуршиву. Мукунна ххуйсса ккаккияртту хьун дурну дур культуралул ирс буруччаврицIун ва му лядуккаврицIун дархIуссагу.
«Ххари хъанай ура, маэшат­рал сурсатирттацIун дархIусса захIматшивуртту диркIнугу, ларг­мур шинал жулва шагьрулий жулла цIусса командалуща дан бювхъусса давурттая. Гьар дуллалисса давриву жуцIун кабакьлай Респуб­ликалул БакIчигу ия. Жул аьмсса мурад шагьрулул халкьуннал оьрму ххуй бавур, шагьрулул чIалачIин къулай давур», — увкунни Муса Мусаевлул.
Шагьрулул бакIчинал мукунма ххи бувунни, ларгмур шинал дан ккаккан дурну диркIсса пландалул давурттив цал щаллу дуршиву ва шагьрулул халкь багьайсса даражалул коммунал хIаллихшиннардил 98 % дузалну бушиву.
«Ва ЦIусса шин шагьрулул хьунадаркьуссар ссятурдий ттукI ле­къавщун, щин къаларкьуну, гъилишиву лекъарщун. Ларгсса шинал жул хIарачатрайну дацIан дурссар къабагьавай дуллай байбивхьусса 200-ксса чIярузивурду дусса къат­ри ва коммерциялул идарартту буллалаву.
Цуксса хIайпнугу, МахIач­къа­лаллал дакъар аьмсса социал-маэшатрал лябукку чIалачIи бувсса ца план ва цинявннан аьмсса налогооблажениялул система. Укунсса тагьар духьувкун, шагьрулий цIусса къатри, объектру дуллалийни Градостроительствалул кодекс къабурувччуну дуллай бур, муницIун хъунмасса зарал биян буллай шагьрулун», — увкунни бакIчинал.
МахIачкъалаллал архитек­туралул ва градостроительствалул управлениялул хъунама Ма­хIаммадрасул ГьитIиновлул бувсунни, Москавлийсса «Гипрогор» градостроительствалул институт­ращал шагьрулул генплан ххалдиргьушиву.
Бувсунни мукунма цIусса шинал шагьрулул цу-цуми кIичIиртту бакьин бувантIиссарив ва цуку-цукунсса проектру щурущи дуван­тIиссарив.
БатIаврий шагьрулул къайгъурдая ва дурсса ва дансса давурттая бувсунни мукунма вайми-вайми ведомстварттал пишакартуралгу.
БатIаврил ахирданий Муса Мусаевлул кIицI лавгунни шагьрулий пробкарду чан баву мурад­рай дувантIисса агьамсса давур­ттая ва халкьуннансса транспорт­рал хIакъираву дувантIисса давурттая.