Январь зурул 3-6-нний Кабардин-Балкьарнал республикалий, Нальчик шагьрулий, хьунни Аьрасатнал Федерациялул лайкь хьусса артист Хашир Дашуевлул цIанийсса Ухссавнил Ккавкказуллал хореографиялул цалчинсса фестиваль-конкурс.

Ва фестиваль-конкурс даврил мурад бия хореографиялул искусство машгьур даву ва хьхьичIуннай даву, пагьму-гьунар бусса оьрчIру аьлтту баву, миннал чIарав бацIаву, къавтIаврил дарсру дишайсса педагогтурал магьиршиву ларай даву, хореографтурал куннал куннацIа даврил опыт лахьхьаву.
Фестивальданий гьурттушинна дунни Ставрополлал крайрая­сса, Къарачай-Чаргаснал, Адыгейнал, Ингушетиянал, АьсатIиннал, Кабардин-Балкьарнал республикарттаясса, Волгоградуллал областьраясса ва Дагъусттанная­сса хореографиялул 16-хъул коллективрал. Ва фестивальданий, ЦIуссалакрал райондалул хореографиялул коллектив бакъассагу, Дагъусттанная ялагу гьуртту хьунни ДР-лул лайкь хьусса артист Севиль Багъировал каялувшиндаралусса «Каспий» ансамбльгу.
Ва фестивальданий гьурттушинна дан бувкIсса ЦIуссалакрал райондалул искусствалул школалул ДР-лул лайкь хьусса артист Мурад Сулаймановлул каялувшиву дуллалисса «Эдельвейс» хореографиялул ансамбльданул бувгьунни цалчин­сса кIану. «Национальная хореография» тIисса номинациялуву вайннал ккаккан дунни эмаратсса лак­рал халкьуннал къавтIаву.
Фестивальданул жюрилун хъинну ххуй дирзунни «Эдельвейс» ансамбльданул ккаккан дур­сса къавтIаву ва бивщунни миннал гьунарданун лайкьсса кьимат.
Ва конкурсрай гьуртту хьусса оьрчIру цIусса шинал дайдихьулий хьусса аьрххилия хъинну рязийну зана хьунни.
ДакIнийн бутанну, ларгсса шинал январь зуруйгу Кабардин-Балкьарнал республикалий Нальчик шагьрулий «Зажги свою звезду» тIисса Дунияллул халкьуннал фестивальданий гьуртту хьуну, «Эдельвейс» ансамбльданул укунма цалчинсса кIану бувгьуссар.