ЮСУПЛУЛ АРС КЪУШКЪУНОВ МАХIАММАД
Уттигъанну аьпалувух ивхьунни Гъумук угу увну, хъунагу хьусса, ГьунчIукьатIрал шяраватусса, хьхьичIва Лакрал райкомрай секретарьну ивкIсса, Къушкъунов Юсуплул ва Аттаева Шарипатлул кулпатраву 1951 шиналувсса МахIаммад.
1970 шинал МахIаммадлул къуртал бувну бур Гъумучиял дянивмур даражалул школа ва мура шинал увххун ур дуклан МахIачкъалалив политехнический институтравун, строительный факультетгу язи бувгьуну. Мугу къуртал бувну, зий ивкIун ур шагьрулуву къатри дуллалисса организациярттай мастерну, прорабну, инженерну. Цува зузисса кIанттурдайгу хъинну бусравну, архIал зузиминначIа хIурматрай ивкIун ур. 1980 шинал зий ивкIун ур директорнал хъиривману ва директорну «Главдагестанводстройрал» Информационно-вычислительный центрданий. 1995 шинал каялувшиву дуллай ивкIун ур Жилищно-коммунальный хозяйствалул министерствалул жилищный инспекциялий, пенсиялийн укканнин, яни 2011 шинайннин.
МахIаммадлул бивкIулул кьурчIишиву кIидачIлай, жижара буллай буру ванал кулпатрахь, арсурваврахь, гъан-маччанахь. Цал бунагьирттал аьпа баннав, рухI хъинний дишиннав.
ГьунчIукьатIрал жямат
——————————
МАХIАММАДЛУЛ АРС ХIАЖИМУРАД ХIУСУЛАЕВ
Январь зурул 5-нний Москавлив аьпалухьхьун лавгунни ххаллилсса лаккучу Ккурккуллал шяравасса МахIаммадлул арс ХIусулаев ХIажимурад. ХIажимурад увну ур 1939 шинал Ккурккуллал шяраву, дакI хъинсса, мукъуй цIу бусса ХIусулавхъал МахIаммадлул ва Аймисайл кулпатраву.
Халкьуннаву хIурмат хъунмасса МахIаммад цувагу шяраву дахьра колхоз дурсса чIумал мунил председательну увчIуну ивкIссар.
Архсса щархъайгу машгьур хьусса Ккурккуллал гьивчул, хъюртул, ахъвазандалул багъирдал дайдихьу ванал дурну дур.
МахIаммадлул цалва оьрчIру мюрщинийва захIмат буллай аьдат бувну бур. Цала ппу куна, жяматрачIа бусравсса адамина ия ХIажимурадгу.
1958 шинал Ккурккуллал школагу къуртал бувну, ва увххун ур Каспийскалийсса медициналул училищалувун. Дуклакиссаксса хIаллай агьну ивкIун ур спортрахунгу. Ччяни ялун ливчуну бур ванаву закканттай уккаврил бюхъу.
Училище къуртал бувну махъ ХIажимурад зий ивкIун ур ЦIахъардал шяраву фельдшерну. Мичча лавгун ур аьралуннаву къуллугъ бан.
Лагма-ялттунай дакI цIуцIисса, аякьа дусса ХIажимурадлун хIакиннал пиша ххуй бизлай, аьралуннава зана хьуну махъ увххун ур Дагъусттаннал медициналул институтравун. Мугу ххуйсса кьиматирттай къуртал бувну, хирург-травматологну зун ивкIун ур МахIачкъалаллал азарханалий. КIира шинава увххун ур Москавлив аспирантуралувун. Мугу къуртал бувну, лайкьну дурурччуну дур медициналул элмурдал кандидат хьунсса диссертация. Мунияр махъсса оьрму ХIажимурадлул Москавлив лавгун бур. Москавуллал азарханалий ва хьхьичIунсса хирург-травматологнан ккаллину ивкIун ур. Цалва пиша ххуйну кIулшивруцIун, ХIажимурад ия инсаншиврул бутIа буллусса, дакI тIиртIусса адамина.
Шяравусса бикIу, кIулсса бикIу, къашавай хьума, кумаг аьркинма, ацIан кIану бакъама муначIан лагайссия. ХIажимурад ия хъамал ххирасса, увкIма ненттабакI тIивтIуну кьамул бувайсса инсан. Москавлив институтравун бувхсса дагъусттан оьрчIан яхьунсса кIанттурду ляхълай, къаша-шавай увкIсса лаккучунан шагьрулий прописка дан, мунал азаруннин кумаг бан хъирив уклай, бакI цIуцIаву дуллан икIайва.
ХIажимурадлул бивкIулул хавар чIявуссаннал дакIнин щунни. Акъассар утти жула лагма укку, чIарав ацIу, — тIий къащи хьуну бур ва кIулну ивкIсса цинявппа инсантал.
Хасиятрал аьчухсса, аьмал-хIал бавкьусса, цалва бусса оьрмулий зунтталчунал цIа лайкьну дуручлай ивкIсса ХIажимурад аьпалул шаврил кьурчIишиву кIидачIлай, жижара буллай буру ванал ссихь, кулпатрахь, оьрчIахь, махъсса гъан-маччанахь.
Имандалий лавгун лякъиннав, алжаннул ххари аннав.
Ккурккуллал жямат,
дустал, даврил уртакьтал
—————————-
АЬВДУЛЛАГЬЛУЛ АРС МУРТАЗААЬЛИЕВ МУРТАЗААЬЛИ
Уттигъанну, Каспийскалия МахIачкъалаливсса ххуллий апатI хьуну, жагьилсса оьрмулуву дунияллия лавгунни ххаллилсса дагъусттанчу, яхI-къирият дусса жагьил, Аьвдуллагьлул арс Муртазааьлиев Муртазааьли. Лаващиял райондалийсса МичIахIиял шяравасса Муртазааьли ия Ккурккуллалгу, Къянналгу куяв. Ва хъинну бусравну ия, цалла шяраваллил жяматран акъассагу, архIал зузиминнангу, кулпатрал гъан-маччанангу.
Муртазааьли увну ур 1988 шинал. МахIачкъалаллал 17-мур школагу къуртал бувну, увххун ур Дагъусттаннал паччахIлугърал университетравун, юриспруденциялул факультетрайн. Му къуртал бувну махъ зун ивкIун ур ГИБДД-лул управлениялий. Мукьра шин миккугу дурну, Муртазааьли зун ивкIун ур Советский РОВД-лий, дознаниялул отделданий. Цалла даву ххуйну кIулсса, бюхъу-хъит бусса Муртазааьли хIурматрай ия архIал зузиминнал дянив. Ларгсса шинал апрель зуруй ванан дуллуна хъунама лейтенантнал чин. Ва ия аьмал-хIал бавкьусса инсан, ххаллилсса арс, хъинсса лас ва аякьа дусса ппу. ХIайп, къаливчIунни ва цала нитти-буттахагу, кулпатраха ва оьрчIахагу къайгъурдай. Ххуллий хьусса апатIрал бяличIан бунни ванал оьрму.
Аргъираву дунияллия лавгсса Муртазааьлил бивкIулул кьурчIишиву кIидачIлай, жижара буллай буру ванал нитти-буттахь, уссурссуннахь, кулпатрахь, махъсса гъан-маччанахь.
Цал рухI алжаннул ххари даннав, гьав нурданул дуцIиннав. Ванан къабуллусса оьрму кулпатран, оьрчIан булуннав.
Ккурккуллал ва Къяннал
жямат
———————————-
ЖЯЪПАРДУЛ АРС МАХIАММАДОВ АЬЛИЛ
Дяъвилий жанну харж дурминнал ва сагъну зана хьуминнал хъирив бухлаглай бур къинттуллух хъунмасса захIмат бихьлай бивкIмигу, миннан лайкьсса кьимат бищун личIину дакIнийн багьлай бакъанугу.
Январьданул 6-нний аьпалул хьунни ца миннавасса «дяъвилул арс», дугърисса хасиятрал ва тIабиаьтрал заллу, жяматран акъа чара бакъасса гьурттушинначи, Жяъпардул ва Жумяълул арс Аьлил.
Аьлил увну ур 1938-ку шинал ЧIяйннал шяраву. 1945-кусса шинал ЧIяйннал дянивмур даражалул школалийн дуклан лавгун ур. Дяъвилул шиннардий Аьлиллун багьну бур 9 шинаву хIухчил ттархь дугьан. Арияту колхозрал ятту зана шайхту гъинтнил минардайн, хIухчалт бигьалаганнин баххана бан тIий, яттичIан лагайсса бивкIссар оьрчIру. ЗахIматраву сивсусса, карчI дакъасса Аьлил ххирасса ия цинявннан – хъуниминнан ва жяматран.
Кьянатсса шиннардий, лаххиялул кIюласса, дукиялулгу луртан щаллу дакъасса Аьлиллуща дянивмур даражалул школа щаллуну къуртал бан къабювхъуну бур. 1958-ку шинал сентябрь зуруй армиялий къуллугъ бан увцуну ур, 4 шинай къуллугъгу бувну, зана хьуну ур, электрикнал ва шофернал пишагу лавхьхьуну. Зун увххун ур МахIачкъалаллал ремонтный заводрайн электрик-ремонтникну. Муния махъ зий ивкIун ур винзаводрай мува цалва пишалий. Зузиссаксса хIаллай пишалулгу хьхьичIунай хъанай ивкIун ур: 1-мур классрал щупир, 6-мур разрядрал электрик, слесарь-наладчик, механик. 1981-кусса шинал ванан дуллуну дур Дагъусттаннал Верховный Советрал Президиумрал чулухасса ХIурматрал грамота, 1989-кусса шинал дуллуну дур «ЗахIматрал ветеран» тIисса цIагу. 1996-кусса шинал дуллуну дур ДР-лул ПаччахIлугърал Советрал цIаниясса ХIурматрал грамота. Пенсиялийн увккун махъгу захIмат ххирасса Аьлил зий уссия электрикну «Европа» банкетный залдануву.
Цибанссар, дунияллий шийва ацIансса инсан ттигу ляхъан увар. Аьлиллунгу буллусса оьрмулул бутIа къуртал хьуну бухьунссия. ОьрмулуцIа хьунни захIматрал ветеран, «дяъвилул арс», ххаллилсса зунтталчу. Аьлил дунияллия лагаврил кьурчIишивугу кIидачIлай, жижара буллай буру ванал арснахь Рамазаннухь, душваврахь Зулмирахь ва Загьидатлухь, куявнахь Багнахь, ссурахъаврахь ва махъсса цинявппагу гъан-маччанахь.
Аьлиллул гьав нурданул дуцIиннав, рухI хъинний дишиннав, алжаннул ххари аннав.
ЧIяйннал жяматрал ва гьалмахтурал цIания АьвдурахIманов ТIалхIат
