МахIачкъалаллал кIичIирттаву мурхьру гъавгъсса, паркирдавусса скамейкарду бакIракъутталий бивчуну, гъагъари бувсса, фонарьду чулий дирчусса иширттая чIун-чIумуй жунма бакъавну къаличIай.
Вана вай гьантрайгу Советский кIичIиравусса Дусшиврул аллеялуву, «Казан-Мангал» ресторандалул чIаравсса, оьрчIру бялахъай площадкалий гьайжакру(качеларду) гъавгъун, цIинцI дичай къуршив (урнарду) аьрщарава личин бувну лявкъуну бур.
Цукссава начлива ва хIаярава ливчусса инсантал бикIан аьркинссар укунсса мурдалшивуртту дуллалисса, цайминнал бивхьусса захIматрал хIурмат бакъасса, дурмур лиян дан кьаст лархIусса? Ва тти цалгу, кIилагу бакъар.
Шагьрулул бакI дургьуминнал ва шикку ялапар хъанахъисса, мяйжаннугу шагьрулий хъанахъимуний дакI цIуцIисса, халкьуннал аьмсса мурадгу бур вай тIулдакъашивуртту дурсса жагьилтал, балики низам дуруччай къуллугърал зузалтрахьхьун бириярча, багьайсса танмихIрайн кIункIу бан. Шагьрулул каялувчитурал хъунмасса тавакъюгу бур халкьуннайн, шагьрулул кIичIирттаву укунсса мардимазаншивуртту дуллай хIисав хьурча, чара бакъа полициялул къуллугърайн ягу цал администрациялийн оьвкуну баян бувара тIий.
З. АьбдурахIманова
