Билаллул душ ХIусманова Аида

Декабрь зурул 14-нний, оьр­мулул 12 шинаву, захIматсса азаруннища ххассал бан къавхьуну, дунияллия лавгунни ХIусманов Билаллул ва Муслиматлул душ Аида. Аида дук­лай буссия МахIачкъалаллал 22-мур лицейраву.
ХIайп, къанясив хьунни ванин школа къуртал бан, оьрмулул аргъираву бяливчIунни ванил оьр­му. Ва кьурчIисса бивкIулул гъюжу дуккан дунни нитти-буттал дакIру, махIрум бунни цинявппагу гъан-маччами. Ва лялиян бан захIматсса бивкIулул кьурчIишиву кIидачIлай, жижара буллай буру нитти-буттахь ва махъсса гъан-маччанахь. Аидал рухI алжаннул ххари даннав, гьав нурданул дуцIиннав.
Гьамиящиял
ва Ваччиял жямат

***
Агь, ци тахсир хьунавав
Вил ххуй-хъин нитти-буттай,
Лякьлул оьрчIал дард-къюву
КIилчингу духIан багьсса!

Я Зал, къадуллуния
Ца азар кIивагу ссин,
Гьартасса дунияллий
Къуману личIан буван.

Билал, Муслимат зухьхьун
Заннал ссавур дулуннав
Бигьа даннав зул аьзав
Аьзизсса арс Сяидлул.
Исяев Ися,
ш. Ваччи

—————————

ХIАЖИМУСИХЪАЛ МАХIАММАДЛУЛ АРС РАМАЗАНОВ ХIАЖИМУСИ

ЦIусса шин дайдихьулул гьант­рай жуятува лавгунни 28 шинаву­сса, оьрмулух мякьнувасса, хьхьири кунна, гьартасса дакIнил заллу, лайкьсса зунтталчу, Рамазанов ХIажимуси.
ХIажимуси увссар ЦIусса­ккуллал шяраву МахIаммадлул ва Асиятлул кулпатраву. Учин бю­хъанссар, ша ласаву къавтIаврийну, зума ахъаву балайлийну дуллалисса куна яхъанахъисса оьрчI ия ХIажимуси. Оьрмулул 15 шинаву ванал бувгьуссия 1-сса кIану «Щунудагъ» фестивальданий. Фестивальданийнгу лавгссия цайнува цува, «ттун балай учин ччай бур» куну нитти-буттахьгу. Му дия 2002 шин. Школа къуртал бувну мукьах ва увхссия МахIачкъалаллал авто­ххуллурдал институтравун. Цалва пишалий зунгу увххуна «Альфастрой» ООО-лийн. Коллективраву хъинну лайкьну ва хIурматрай зийгу ия.
ХIажимусил чIюлу къабувсса хъатIи къабикIайва шяраву. Жалиндалущал къавтIунгу къаизарчан, рухIирайн къаияйссия.
Чил канил бяличIан бунни аргъирайсса оьрму.
Хъуннасса кьурчIишиву кIи­дачIлай, жижара буллай буру ванал буттахь МахIаммадлухь, ни­ттихь Асиятлухь, кулпат Эльмирахь, уссурвал Аьлихь ва Абакардухь, ссихь Тамарихь.
Гьаттай нур дизаннав.
ЦIуссаккуллал
ва Ккуллал жямат

ХIажимусил
аьпалун

Зунттурду аьтIутIийча,
РатIру зума тIутIийча,
ЦIуссаккуллал шяравун
НякI чIутIул ларчIун дур тIий.

Щарнил хъатIив чIюлу бай,
ЩиривкIуну къавтIалай.
Вил Заннал кьадарданийн
ДакIру вих хъанай дакъар.

Тти жу цIаннай ливчIссару,
ХIажимуси акъассар,
Мажлис къавтIи бай ликри
Мархлул ххуку дурссари.

Вил шанхьхьу дувай кьини
Мюрш гъарал дакъарцIуна,
Лухччи-ссавнин хавар хьун,
Вих макь рутIлай диявав.

Ппив бунни читIул кюру:
Кюрттараву буссия
КIинничалтсса кIива душ,
Щакъалирхсса чIаращар.
Бутталссурахъу Уммужигьан

——————————

РАМАЗАННУЛ АРС АЛХУЛАЕВ АЬВДУЛЛАГЬ

ЦIусса шинал дайдихьулий ТIюхчардал жяматрал дянива лавгунни Рамазаннул арс Алхулаев Аьвдуллагь, оьрмулул 81 шинаву. Ванал оьрму лавгун бур чIавания шинай личIи-личIисса давурттай захIмат буллай. ТIюхчардал дянивмур даражалул школалий 9 класс­гу бувккуну, зун айивхьуну ур ТIюхчардал колхозрай, гичча лавгун ур «Дагнефтьрай» зун. Зана хьуну буттал шяравун, зун ивкIун ур тIутIул ахънил бригадалуву. Пенсиялийн укканнин зий ивкIссар ЦIуссалакрал райондалул райпорай.
Аьвдуллагь ия учин-бусан кIулсса, жяматрал дянив хIурмат бусса инсан.
Аьвдуллагьлул бивкIулул кьур­чIишиву кIидачIлай, жижара буллай буру кулпат Шуъванатлухь, арсурваврахь, душваврахь, ссурваврахь, махъсса гъан-маччаминнахь.
ТIюхчардал жяматрал цIания, дустурал, гьалмахтурал цIания Идрисов Идрис

———————————

АХIМАДЛУЛ АРС ИБРАГЬИМОВ РОБИНЗОН

ЗахIматсса цIуцIаврил къашавайгу ивкIун, оьрмулул 76 шинаву аьпалухьхьун лавгунни хъинну уздансса багьу-бизулул заллу, ххаллилсса чув-адамина, дакI-аьмал авадансса лаккучу, ГьунчIукьатIрал шяраватусса АхIмадлул арс Ибрагьимов Робинзон.
Робинзон увну ур 1939-ку шинал Омск шагьрулий, тикку ванал ппу АхIмад цала усттаршиврий зий ивкIсса чIумал.
Дяъви байбивхьуну ца-кIива зурувату ппу лавгун ур аьрайн, шанма чIивисса оьрчIгу чил шагьрулий кьабивтун. Миннаща, кумаг бакъа, цалла буттал шяравун зана хьун бювхъуну бакъар. Ппу дяъвилия зана шайхту 1946-ку шинал кулпат бивзун бур Крапоткино шагьрулийн. Тикку Робинзоннул къуртал бувну бур 7 класс. Муния махъ вайннал кулпат яхъанай бивкIун бур Дянивмур Азиянаву.
ТIаннул усттарнал пишагу лавхьхьуну, личIи-личIисса давурттай зийгу ивкIун, армиялул буржгу лавхъун, ахиргу 1962-кусса шинал Робинзон увкIун ур цала бу­ттал шяравун ГьунчIукьатIув. Бувну кулпатгу, дузал бувну къатта-къушгу, тIивтIуну тIаннул усттарнал дуссукъаттагу, яхъанай, зий ивкIссар буттал шяраву.
Муния махъ, кулпатгу бувцуну, Робинзон ивзссия Каспийскаллал шагьрулий. Тиккугу мукунма тIивтIуну дуссукъатта, зий ивкIссар бусраврай ва кьадрулий. Ка усттарсса Робинзон къакIулсса чансса бакъа къалякъинтIиссар Каспийскалий.
Вагу, ванал кулпат медсестра Аслигу захIматрал ветеранталли.
Робинзон аьпалухьхьун лагаврил къумашивугу кIидачIлай, дакIнийхтунусса жижара буллай буру ванал кулпат Аслихь, арсурваврахь, душнихь, уссихь, ссурваврахь, цинявппагу гъан-маччаминнахь.
Робинзоннул бунагьирттал аьпа баннав, махънал оьрмурдай барачат бишиннав!
ГьунчIукьатIрал жямат,
дустал, гьалмахтал

—————————-

ХIАЖИМЯММАЛ АРС СУЛТАНОВ ЗАКИР

Декабрь зурул 15-нний аьпалул хьунни яхI-къирият ларайсса, ххаллилсса лаккучу ХIажимяммал арс Султанов Закир. Закир увну ур 1939 шинал Лакрал райондалий­сса ГьаркIассиял шяраву.
1943 шинал оьрмулул 4 шинаву Закир цала уссурвавращал лавгун ур Азирбижаннавун. Ванал ппу ХIажимямма Шамхар тIисса Азирбижаннал шагьрулий чагуртну зий ивкIун ур. Му шагьрулий Закирхъал кулпат ялапар хъанай бивкIун бур 1958 шинайн бияннин. Микку бувккуну бур Закирдул школагу. Школалий дуклай унува, Закир футболданухунгу машхул хьуну ур. Азирбижаннал чемпионатрай гьуртту хьуну, ванал лавсун бивкIун бур чемпионнал кубок. Аьралуннаву къуллугъ буллалисса чIумалгу лавсун бивкIссар СССР-данул Аьралуннал спартакиадалул кубок. 1962 шинал вайннал кулпат бивзун бур Дагъусттаннайн, Каспийск шагьрулийн. Шихун бивзун мукьахгу Закир «Труд» командалуву футболданий уклай ивкIун ур, му командалул капитаннугу ивкIун ур. 1971 шинал ванал лавсъссар Ухссавнил Ккавкказуллал ва Аьрасатнал кубок. Мукуна ва хъанахъиссар СССР-данул кубокрал финалист.
1963 шинал Закир увххун ур Ленинградуллал Кораблестроительный институтравун. Бувккуну бур Дагъусттаннал Политехнический институт. Зий ивкIун ур «Дагдизель» заводрай технологну, мунияр махъ Каспийскаллал «Горводоканалданий», цал хъунама энергетикну, яла инженерну.
1986-1988 шиннардий зий ивкIун ур «Труд» стадиондалул директорну. Пенсиялийн увккун махъ зий уссия Каспийскаллал

—————————

Арснал Бадавинал
аьпалун

Архсса чулданул кIанай,
Гъурбатрай кьини дуркни,
Ххира арс ссихIирачIа
Леххаву щийн куссия.

Ягу мажал къавхьунав
«Гьуя, бавай!» чинвагу,
Циняв чурххал базурдай
БивкIулул мугьру бивзун.

Вил ахиратрал хавар
Шяравунмай чIювххукун,
ХьхьичIух ттурлу даркьуну,
Бургъин чани лавкьуна.

Вил ав-ав тIисса ссурвал
Хханссия бакIуй барцIру:
«ИкIанхьувияв жулгу
ЧIарах ацIан уссу», — тIий.

«УчIанна, бавай», — куну,
Ттул хьхьичIату увкьунна.
Увххунна тти дакIнивун,
Ттул дакIний аьр щаву хьун.

ДакIний-мазрайва ливчIмур
Бусласу ссурахъаврахь,
Мурадрайн бияй чIумал
ЛухIи гьаттавух бивхьсса.

БивкIурду бухIлахIаврил
КIялакьаркь буттал нину
Вилмургу тIюпандалул
Хъиннура кьакьан дунни.
Нину Калимат

—————————

СултанмахIаммадлул арс МухIадов Сагидлул аьпалун хас бувну

Ухссав ххядурк ххяххабаргъ,
Ссав ххядурк чаннацIукуй,
Жул дакIру гъюжу дурккун,
Мукьра шин чIарах най дур.

Ттул къатта-къушлил кIиний,
Акъассарав тти, Сагид,
Шагьралийн къабургара,
Вил гьалмахтал ххал къахьун.

Бисмиллагьращал архIал
Ххира нюжмардул кьини,
Нанижатгу дурккуну,
Ссайгъат тIайла буккара.

Агь, дуниял, дуниял,
ОьцIуцIаврил дуниял,
Я тIивтIуну лакьиннин
ОьрмулуцIа увайсса.

Аллагьнал къадулуннав
Дарув бакъа цIуцIаву,
ЦичIав бан къашайсса бур
Чичрулун ниттихъаща.

Вил рухI жул ялтту лехлай,
Жу вищал ихтилатрай,
Оьрму бутланну, ххирай,
Ина дуллу аьзаврай.

Вил бивкIулул аьсившиву духIлай кьупIа тIийннасса нину Тамари,
ш. КIямаши

—————————

АЬВДУЛКЬАДИРДУЛ АРС ИСМЯИЛОВ ШАГЬАБУТТИН

Оьрмулул 65 шинаву аьпалухьхьун лавгунни Гьуйннал шяраватусса Аьвдулкьадирдул ва Гулизардул арс Шагьабуттин.
Шагьабуттин увссар 1951-ку шинал Гьуйннал шяраву. ЦIуссалакрал дянивмур даражалул школагу бувккуну, 1969-ку шинал дуклан увхссар Дагъус­ттаннал шяраваллил хозяйствалул институтравун ва къуртал бувссар зоотехник шайсса факультет. Муния махъ къуллугъ бувссар армиялий. 1975-ку шинал зун ивкIссар Даггособъединениялул хIадур даврил ва реализациялул отделданий. Цаппара шиннардива ивтссар му отделданул хъунама зоотехникну.
Зузиссаксса хIаллай Шагьабуттиннул чIалачIи бувссар цува за кIулсса, итххявхсса пишакар ушиву. АрхIал зузиминнал дянивгу мудан ивкIссар хIурмат лавайну. ХIалал дурссар диял­сса грамотартту ва барчаллагьру. Ванан дуллуссар «ДР-лул лайкь хьусса зоотехник» тIисса бусравсса цIагу.
Шагьабуттин уссия цалва жяматрангу, кIулцириннангу, дус-ихтивартурангу бусравсса чув, дакI-аьмал авадансса ва хIал бавкьусса инсан.
Шагьабуттиннул бивкIулул пашманшивугу кIидачIлай, дакIнийхтунусса жижара буллай буру ниттихь Гулизардухь, уссихь Сагидлухь, кулпатрахь Софияхь, душваврахь ПатIиматлухь ва Разиятлухь, махъсса гъан-маччаминнахь.
Шагьабуттиннул бунагьир­ттал аьпа баннав, рухI бигьаний дишиннав.
Гьуйннал жямат