Январьданул 26-нний Дагъусттаннал БакIчинал дунни Дуккаврил, культуралул, жагьилтурал политикалул, спортрал советрал ва рес­публикалул районнал ва шагьрурдал бакIчитурал советрал цачIусса заседание. Ххал бигьлай бия школардай ва вузирдаву пишакартал хIадур баврил система ххуй даврил масъала.

Заседание тIитIлай, Рамазан АьбдуллатIиповлул бувсунни элму дакъахьурча, къашайшиву производство лядуккан дуван: «Жува инновациярттая цуксса чIявуну гъалгъа тIурчагу, агарда элмулул творчествагу, цIусса разработкардугу дакъахьурча, инновация къахьунтIиссар», — увкунни ганал.
Региондалул хъунаманал му­къурттийн бувну, профессиональное образование, колледжру цIубуккан буллалиссар республикалий, цанчирча республикалун аьркинну буну тIий пишакартал промышленность ччаннай дацIан дуван, шагьрулул хозяйствалуву зун.
«Аьркинссар республикалул дуккаврил учрежденияртту оптимизироват буван, хIакьинусса кьинилул тагьаргу, тIалавшиннугу хIисавравун ларсун. Районнал бакIчитурал райцентрдай дузал буллан аьркинссар хъунисса ду­ккаврил центрду, школа-интернатру, ми ттизаманнул кьай-кьуйлулгу щаллу бувну. Ми хьун аьркин­ссар хьхьичIунсса методологияр­ттал центрдуну», — увкунни Рамазан АьбдуллатIиповлул.
Республикалул БакIчинал пикрилий, Дагъусттаннал школа къуртал буллалиманал аьркинссар ла­хьхьин цумур бунугу ца зузалал пишагу. Министерстварттал, ведомстварттал, муниципалитетирттал дахIаву дикIан аьркинссар университетирттащал цалва зузалтрал луртан хIадур даншиврул.
ДР-лул дуккаврил ва элмулул министр Шагьаьппас Шагьовлул бувсунни колледжирдаву зузалал пиша лахьхьаву уттизаманнул тIалавшиннардацIун къадаркьуну душиву, ттизаманнул зузала лавайсса даражалул пишакаршиву лархьхьусса акъашиву, даврил щаллу байми минная, миннал давурттая рязи бакъа бушиву. Министрнал мукъурттийн бувну, махъсса 3 шинал мутталий дуккаврил организациярду оптимизироват дурну махъ цIудуккан дурну дур дарсирдал методика, дузал дурну дур хасъсса инфраструктура, лавайсса даражалийн диян дурну дур дуккавриву­сса хIаллихшинну.
ЦIанасса ппурттуву Дагъус­ттаннал профессионал образованиялул системалуву цачIун дурну дур 64 дуккаврил организация ва 11 учреждение, ми зий бур вузирдал каялувшиврулу. Министрнал увкусса куццуй, махъсса шиннардий гьарза хьуну бур 9 класс бувккуну махъ дуккаву профтехучилищардай лахъи лаган дан ччисса оьрчIру. Дянивмур даражалул школарду къуртал бувминнангу лахьхьин дуллай бур зузалал сянат.
Заседаниялий мукунма ихтилатру бунни Къаяккантуллал райондалул бакIчи МахIаммадэмин ХIажиевлул, Дарбантуллал бакI­чи Малик Багълиевлул, Ма­хIач­къалаллал бакIчи Муса Мусаевлул, ДагГАУ-рал ректор Зайдин Жанбулатовлул ва цайминналгу.