Му хас бувну бия цIа дурксса аьлимчу, филологиялул элмурдал доктор, профессор З.Н. Акавовлун 75 шин шаврин, Литературалул шинацIун бавхIуну. Конференциялул сакиншинначину бия, цува З.Н. Акавов акъассагу, литературалул кафедралул хъунмур, филологиялул элмурдал доктор А.Аь. Кукуева.

Конференциялул тема дия «Литературный год: этноментальные ориентиры научных поисков в кросс-культурном пространстве XXI века» тIисса.
Циняв аьлимтал тIий бия утти­нин, Дагъусттаннай цир, Ккав­кказнавугума укунсса конференция къавхьуссар тIий. Шиккун бувкIун бия мяйцIалунния ливчусса аьлимтал, шаэртал, чичулт.
Конференциялул географиялия гъалгъа тIурчан, докладру буллай бия Пятигорскалиясса, Сочилиясса, Тюменнаясса, Мичиххичнавасса, Ингушнавасса, Къарачай-Чаргаснавасса, Элисталиясса, Липецкалиясса, Ашхабадраясса, Белгородраясса, Нальчикраясса ва цаймигу кIанттурдаясса хъамал. ХIатта Якутиянава бувкIун бия кIива аьлим­чу- хъамитайпа, цивппагу эвенк миллатрал. Минналгу ххуйсса докладру бия.
Докладирттал тематикалух бургарчан, чIявуминнуву ххал бигьлай бия евразийский конференциялул масъалартту, Ккавкказуллал ва цайми аьрасатнал миллатирттал, оьруснал литературалул масъалартту. ДР-лул миллатирттал политикалул министр Т.В. Гамалейл, З.Н. Акавовлун ДР-лул ХIукуматрал чулуха дуллуна орден Культуралул лишан.
Докладру бунни жулва лакрал аьлимтуралгу. Профессор С.Х. АхIмадовлул бувна доклад Акавовлул творчествалиясса. З.М. Рашидовал бувккуна доклад «Пушкин ва Ирвинг: «Сказки о голубом петушке» тIисса.
Конференциялий гьуртту хьунни цилва докладращал, Ккавкказнангу хъинну кIулсса, гьунар бусса чичу, журналист, Оксфордский университетрал хIурмат бу­сса доктор, чачан хъамитайпа М.А. ВахIидова. Ванил буссар Лермонтовлиясса, цаймигу литературалул масъалартту аьч буллалисса ххаллилсса луттирду.
Конференциялий буссия ттулгу доклад.
Докладру къуртал хьуна маркIа­чIан ссят 6-нний. Яла хьуна «ккур­кки стол». Миккугу аьлимтал, шаэртал буслай бия Ккавкказуллал ва цайми аьрасатнал миллатирттал литературалул багьу-бизулия. ЧIурчIав дуллай бия аьрасатнал миллатирттал литература уттигу аьч дурну дакъашиврий, буклай бакъашиврий аьркинсса луттирду, чIявусса чичултрал ва шаэртурал творчество уттигу уттара дан дурашиврий.
Евразий концепция жулла, да­гъусттанналмур, культуралийнгу асар биян буллалисса теория ва практика дур. Мунияту конференциялий оьруснал ва цайми миллатирттал культуралиясса, литературалия­сса, кувннил кувннищалсса маччашиву ккаккан дуллалисса ихтилатру бия. Масала, Ш. Муслимовал доклад бия Ф. Достоевскийн хас бувсса, А.Аь. Кукуевал – оьруснал философ Трубецкойлун хас бувсса. Цаппара аьлим­турал дагъусттаннал литературалия бувккунни докладру. Масала, М. Сулаймановал бия «Конституция горца» Р. Гамзатова» тIисса.
Бия тарихрал иширттаяссагу. Масала, лазгиял шаэр ва аьлимчу Ф. Нагиевлул «Ислам ва Баргъбу­ккаваллил Ккавкказ» тIисса махъ лавхъуна.
Конференциялий гьаз буллалисса масъалартту хъинну агьам­сса, куртIсса бия.
Ирбагьина ХIасанов