Ттун ччянива кIулссия ттула шяравучу, гьунар бусса аьлимчу, 1-мур ЦIувкIратусса Аьлиханхъал МахIаммад Санкт-Петербурглив хьхьирил чIанулу ишла байсса ярагъунниха зузисса элмийсса центрданий зий ушиву. Баяйва му хъинну гьунар бусса аьлим­турал кюру бушиву.
Му мяйжаннугу Аьрасатнал паччахIлугърал элмийсса центр бур, мунийн «Концерн «Морское подводное оружие – Гидроприбор» учайсса бур. Аьрасатнаву хьхьирил чIанулу ишла бай ярагъралсса ва техникалулсса буллалисса яла хъунмур ва хьхьичIунмур идара бусса бур цуппагу.

Шиккува кIицI лаганна, Аьли­ханнул ва Санил арсру цинявппа техникалул, физикалул, математикалул итххявхсса бушиву, билаятрай сийлийсса институтругу къуртал бувну, ми цивппа зузисса кIанттурдай хьхьичIунну бушиву. МахIаммад хъуна-хъунама арс ур, хъиривми уссурвалгу элмулучIан ва куртIсса кIулшивуртту ласавричIан кIункIу шавриву МахIаммадлул бияла бухьунссар. Мунала тарбиялул иш бухьунссар, мукьагу уссу хъинну куннал кув бувгьусса, кунная кув эбрат ласласисса бур.
Уссурваврал чул бищай ттарцI МахIаммад Рамазанов увну ур 1949 шинал сентябрь зурул 16-нний ЦIувкIрав. ЧIяйннал шяраву школагу къуртал бувну, му дуклан ув­ххун ур Ленинградрайсса жамирду бай институтравун (ЛКИ), «приборостроениялул» элму лахьхьин. Миккува аспирантурагу къуртал бувну бур. КIулшивурттал хъирив агьсса жагьилнал ца институтрай гьашиву къадурну, В. И. Ульяновлул цIанийсса Ленинградуллал электротехнический институтгу (СФПК) къуртал бувну бур. Техникалул элмурдал аьлимчу хьунсса диссертация дурурччуну дур 1990 шинал Ленинградрай, жамирду бай институт­раву. Зий ивкIун ур мува институт­рал кафедралий, хьхьирил электроникалул элмийсса хъиривлаявуртту дуллалисса лабораториялий. 1984 шинал Дагъусттаннайн зана хьуну, «Дагдизель» заводрай инженер-конструкторну зий ивкIун ур 2003 шиналнин. Му шинал цIунилгу Ленинградрайнай лавгун, «Гидроприбор» концерналий зун ивкIун ур хъунама пишакарну, секторданул хъунаману. ХIакьинусса кьинигу миккува зий ур.
Уттигъанну, декабрь зуруй, МахIаммад Аьлихановичлул дурурччунни техникалул элмурдал докторнал диссертация. ЦIув­кIуллал цIа гьаз дансса бигар лавхъ­ссар учивияв. ДакIнийхтуну барча дуллай элмурдал докторнал цIа, Дагъусттаннайн учIайхту мунащал хьунабакьинсса хIарачат бансса махъ буллай бура. Нажагьсса давриха зузисса аьлимчунахь цIуххинмургу, мунал жухьва бусанмургу чIявурхха. Ттигъанну кунма цаппара лакрал уздан­сса арсру сукку хьунугума бия, лак мудангу кIулшивурттал хъирив багьсса буссия, гьарцагу сфералуву хьхьичIунну буссия, лакравун дуккаврихсса мякь бутлати­сса, кIулшивурттал культ дуллали­сса форум датIин аьркинссар тIий. Чари, цукунни зунттаву хъуна хьу­сса жагьилнан хьхьирил ярагъуннил элму лахьхьин дакIнийн багьссавагу? КIулшивурттал хъирив агьсса уну тIийри! Шяраваллил чиваркI буслай бур, МахIаммад Рамазанов школалий дуклакинийва техникалул кIулшивуртту куртIгу, цIакьгу дуллан чялиш­сса ивкIшиву, мунал СССР-данул ВДНХ-лул ва щаллагу союзрал лагрулийсса, республикалул лагрулийсса элмулул ва техникалул конкурсирттай хьхьичIунсса кIанттурду бугьай­сса бивкIшиву, элмулухун ва техникалухун багьсса жагьилтурал конкурсирттал лауреат ушиву.
Уттиния тихунмайгу дуллалимуниву тIайлабацIу чIа тIий буру МахIаммад Аьлихановичлун! ЦIу-цIусса тIитIалартту элмулуву ва оьрмулуву чIа тIий буру.
Лажин хIадур дурссар
ПатIимат Рамазановал