Вай гьантрай МахIачкъалалив, Правовой академиялул конференц-залдануву, хьунни «Профилактика идеологии экстремизма и терроризма: международный и отечественный опыт» цIанилусса региондалул конференция. А. Аьбдуллаева Конференция хьунни Дагъус­ттаннал диндалул идарарттащал дахIаву дуллалисса комитетрал сипталий. Конференция дайдихьлай, ихтилатру бунни Диндалул идарарттащал дахIаву дуллалисса комитетрал председатель Расул ХIажиевлул ва Правовой академиялул директор Багьауттин МахIаммадовлул. Вайннал бусласимунийн бувну, конференция датIаврил мурад бур экстремизмалул ва терроризмалул идеологиялийн къарши бацIансса чаран лякъаву, жяматраву дакьаву дуруччаву, агьали ватан ххирану, мяърипат дуну тарбия баврил даву чялиш дуккан даву, личIи-личIисса диндалул агьулданул дянив нахIушиву цIакь даву. Микку ххал бивгьунни Гъанмур Машрикьлив, хаснува Сириянаву, хъанахъисса терроризмалул ишру, кIицI лавгунни ми иширттал Аьрасатнал регионнайсса политикалул ва диндалул тагьар оьлуккин дуллай душиву. Багьауттин МахIаммадовлул цалва ихтилатраву кIицI лавгунни хIакьину жагьилтал цалла кьюкьравун кIункIу бан, миннал ня даххана дан хъунмасса хIарачат буллай душиву экстремистурал сакиншиннарду. — Дунияллий лявхъусса гьарицагу инсаннал цала хъирив цалва оьрчIан, оьрчIал оьрчIан ххуймур, хъинмур кьаритан аьркинссар. Тапшур дан аьркинссар миннайн буттал буттахъая шихуннай нанисса жулла аьдатру, хьхьичIми никирттачIа кьадру-кьиматрай диркIмур, минналгу цала хъирив наниминнайн тапшур даншиврул. Республикалулгу, Аьрасатналгу каялувчитурал мурад цар. Аьрасатнаву дакьаву дуруччин жува циняв цачIун хьун аьркинссару, — увкунни Багьауттин МахIаммадовлул. ДР-лул печатьрал ва информациялул министрнал цалчинма хъиривчу Зубайру Зубайруевлул кIицI лавгунни хIакьину жулла республика захIматсса тагьарданий душиву. ХIакьину жучIава гьаз хъана­хъисса масъалартту ца 10-15 шинава жулва жагьилтуран щаллу буллан багьантIишиву ва миннай хъуннасса жаваблувшинна душиву. — Терроризмалул масъала ща­ллу къабувссаксса, Дагъусттан хьхьичIунмай шаврия гъалгъа тIий пайда бакъассар. ХьхьичIва-хьхьичI зун аьркинссар, кьанунналгу, аьда­тиртталгу ялтту бувккун, ярагъ кIунттил бувгьусса жула жагьилтуращал. КIилчин – миннан кумаг буллалиминнащал. Вай масъалартту хъунмурчIин ихтиярду дуруччай органнайн багьлагьисса масъалартту бур. Жяматран экстремизмалул ва терроризмалул идеология къакьамулшиву, мунийн къарши бацIаву, мунищал талатаву – му щалагу жяматрайн багьлагьисса масъалар. Гьарицагу инсаннал дакI цIуцIаву дикIан аьркинссар цаппарасса жулва жагьилтал цивппа кунмасса бусурмантал оьрмурдацIа буллалисса ххуллийн бувккун бушиврия. Тарихрал чIалачIи буллай бур яла гуж буми, яла пишакаршиву ларайми органнащавагу, щалагу жяматрал чулуха кумаг бакъанува, ва масъала щаллу бан къахьунтIишиву. Мажлис къуртал хьуну махъ ми­кку гьуртту хъанахъими бавтIунни секциярдаву. Микку гьуртту хьунни Дагъусттаннал университетрал, Дагъусттаннал педуниверситетрал ва правовой академиялул студентътал. Конференциялул давриву мукунма гьуртту хьунни Жагьилтурал министерствалул, Жяматийсса палаталул, Дагъусттаннал муфтият­рал вакилтал.