Ларгсса нюжмардий МахIачкъалалив Расул ХIамзатовлул цIанийсса Миллатрал библиотекалуву хьунни гьунар бусса журналист, художник, «Горцы» литературалул кказитрал хъунама редактор Марат ХIажиевлул «ЦIу» тIисса цIанилусса луттирал презентация.

Бадрижамал Аьлиева
Миккува хьунни фотохудожник Камил Чутуевлул «Дагъус­ттаннал чIюйрду» ва «Дагъус­ттан» суратирттал альбомирттал презентациягу. Миннул сакиншинначигу ур Марат ХIажиев.
«ЦIу» лугу, кIивагу фотоальбомгу бивщуну бур «Дагъусттан» луттирду итабакьай идаралул.
Лу чивчуну бур аьрххи-ххуллий дурсса чичрурдал жу­ралий. Ми аьрххирдугу, хъунмурчIин, бур Дагъусттаннал шяраваллавунсса. Цала хъинсса дус, цIанихсса фотохудожник Камил Чутуевлущал Марат жулла республикалул чIярусса шяраваллавун, кIанттурдайн ивну ур. Луттираву авторнал ишла дурну дур Камил Чутуевлул яргсса, я бацIансса суратру.
— Ва лу, Камил Чутуев акъа, дунияллийн бугу къабукканссия. На Камиллущал кIул хьуссара 1996-ку шинал, «Молодежь Дагестана» кказитрайн нава дахьва художникну зун увкIсса чIумал. Му чIумал ттун пикривагу къашайва нава та-унугу му кказитрал жаваблувсса сек­ретарьну, яла культуралул отделданул редакторну зун­ссара тIисса. Ми шиннардий бигьалагайсса ахттайнссаннул чIумал Камил ккаккайва суратирттал чIапагу бувгьуну, цалва кIулминнащал аьрххирдаясса асарду кIибачIлай, цува ивсса кIанттурдая буслай. Му чIумал, мунахгу уруглай, икIайссияв: «Ва цуксса ххарисса, цуксса талихI бусса инсанни», — тIий. Яла махъ жу кIул хьуру Камиллущал ва архIал занан бивкIру Дагъусттаннал шяраваллавух», — буслай ур Марат.
Луттиран цIа цал Маратлул дирзун дур «Буруги цаннал иттав ца» тIисса. Яла чичу МахIаммад-Расул Расуловлул маслихIат бувну бур «ЦIу» («Соль») тIисса цIа дизан.
Презентациялий махъру лавхъуна чIявусса инсантурал, миннавух: профессор Ися Аьбдуллаевлул, Дагъусттаннал халкьуннал чичу МахIаммад-Расул Расуловлул, цIа дурксса фотохудожник Камил Чутуевлул, Дагъусттаннал халкьуннал шаэр Бадруттин МахIаммадовлул, искусствовед Татьяна Петенинал, чичу Аминат Аьлихановал ва чIявусса цайминналгу. Гьарцамагу махIаттал хъанай ия Маратлул гьунардай, мунан захIмат ххирашиврий. Мяйжаннугу, ци даву дуллай айиширчагу, дуллалимур кIанийн дуртун, дирчIан дурну ва бакIуйн дуккан дурну дувай Маратлул, цамур куццуй зун ванаща бугу- къабюхъай. «Тарки-Тау» луттирдал выставкалул сиптачи ва каялувчи, Ккавкказуллал таржумарттал къатлул директор, «Горцы» журналданул хъунама редактор, гьунар бусса журналист…Ва сияхI гихуннайгу ла­хъир. Ца-ца хIал лавгун, махIаттал бувай Маратлул лагма-ялттуми ци-дунугу цIусса проектрайну, даврийну.
Ва ххуллухрив – оьрмулул цими шин духьурчагу, ччима инсаннал буккинсса хIазсса луттирайну. Ва лу, ттул пикрилий, бикIан аьркинни гьарцагу дагъусттанлувнал къушлий, цалвагу буккин, республикалул кьатIату цачIана хъамалу увкIнахьхьунгу буккин булун, мунангу Да­гъусттанная хавар бикIаншиврул, зунттал билаят хъиннува ххуйну кIул хьуншиврул.
Лу канил бувгьума цал архIал иллай ур республикалул цимирагу шяравун, кIул хъанай ур миккусса инсантурал авадансса аьдатирттащал, багьу-бизулущал, авурсса архитектуралущал, хIазсса инсантуращал, цал ххишалагу хIайран уллай ур зунттал билаятрал караматсса тIабиаьтрал.
МахIаммад-Расуллул увкуна:
— Ттун къакIулли ва луттирал циксса буккулт хьунтIиссарив, амма дакI дарцIуну ура миннавасса цану жулла республикалул БакIчи Рамазан АьбдуллатIипов икIантIишиврий. Цанчирча луттиравусса ца макьалалуву авторнал хъинну усттарну чивчуну бур ТIиляратIиял зунттурду чIюлу буллалисса суслил кюрщантрая. Мукунма тIиляратIиридуш хьусса оьрус учительницая», — куну. Шиккува учин, ва макьалагу дур, чIярусса цайми кунна, ванияр шиннардил хьхьичIра чирчусса.
Лу цуппа бивщуну бур ххинну ххуйсса чагъарданий. Лу­ттирал мужаллатрай дур зун­ттул бакIрай рирщусса Марат ХIажиевлул, Камил ва Оьмар Чутуевхъал сурат.
Ва лу хъанахъиссар трилогиялувасса ца. Ссавур дакъа ялугьланну хъиривсса кIивагу луттирах.