Декабрьданул 17-нний МахIачкъалалив Р. ХIамзатовлул цIанийсса Миллатрал библиотекалуву тIиртIунни «Золото России» — «Мир камня» Х регионнал дянивсса ювелир выставка-даххия.

Бадрижамал Аьлиева
Муниннин гьантлул хьхьичI «Дагестанская правда» кказитрал редакциялий хьунни му выставкалул хьунийнсса пресс-конференция.
Мунивух гьуртту хьунни «Дагестан-ЭКСПО» выставкардал центрданул каялувчи МахIаммад Саругъланов, ДР-лул Промышленностьрал, машлул ва инвестициярдал министерствалул халкьуннал художествалул промыслирдайсса каялувшиндарал отделданул хъунама ХIамзат ГъазимахIаммадов, ДР-лул Машлул ва промышленностьрал палаталул вице-президент Александр Шевченко.
Выставкалий, арцу-мусил кьай-кьуй дакъасса, дикIантIиссар миннуха къуллугъ байни аьркин дувайсса затругу, цIусса арцу-муси машан къаласурчагу, зулла шардасса, зунна ххирасса, амма цахъи дух хьусса арцу-муси миннул кумаграйну, цIусса кунна, цIай-цIайтIи дуван бюхъантIиссар.
Выставкалувух гьуртту хъанай бур «Адамас», «Аквамарин», «Сэвен Даймондс», «Уральский ювелирный завод», «Александрит», «Жиразоль», «Кустов и Партнеры», «Бриллианты Юга» ва чIявусса цаймигу фирмарду, уттинин гьуртту хьуминнущал, гьашину цалчин гьуртту хъанахъиссагу.
Выставкалул муштаритурал дянив хьунтIиссар «розыгрышру», микку духлантIиссар багьлул ххирасса арцу-мусил кьай-кьуй, бахшишру.
Выставка лахъи лагантIиссар декабрьданул 21-ннин.