Дунияллул халкьуннал ихтиярдал кьинилун хасну, ДР-лул жяматийсса идарарттал вакилтал бивунни Къизилюртуллал тарбиялул колониялийн ва 8-мур исправительный колониялийн. Ва хьунабакьаврил сакиншинначитал хьунни «Аьрасатнал нинухълу» тIисса жяматийсса суккушиндарал региондалул отделение ва «Дагъусттаннал дакьаврил фонд».

А. Аьбдуллаева
Дуснакь бувминнащал хьунабакьин бувкIун бия ДР-лул «Аьрасатнал нинухълу» тIисса су­ккушиндарал председатель Таиса МахIаммадова, «Да­гъусттаннал дакьаврил фондрал» председатель Мухтар Даудов, ДР-лул Жяматийсса Палаталул член Иоанн, Исламрал ихтиярду дуруччаврил центрданул вакил Аьбдулла МуташхIажиев, Дуснакьирттал епархиялул каялувчи, дьякон Александр Никитин, 6-мур школалул директор Мадина ХIамзатова.
Ва делегация хьунабавкьунни 8-мур исправительный колониялул хъунама, Виваллил службалул полковник АьлигъалбацI МахIаммадовлул, Къизилюртуллал тарбиялул колониялул хъунама, Виваллил службалул полковник ХIабиб Исакьовлул ва дуснакь бувминнащал тарбиялул даву дуллалисса отделениялул зузалтрал.
ХIабиб Исакьовлул бусласимунийн бувну, хIакьинусса кьини ва каялувшиву дуллалисса колониялий бур Дагъусттанная­сса, Чачаннавасса, Ингушнавасса ва Астраханнаясса 19 балугъравун къабивсса оьрчIру. Шикку оьрчIал ласлай дур дянивсса кIулшивуртту, мукунма лахьлай бур личIи-личIисса пишарду. Дуснакь бувминнан дуллай бур гьантлун ххюйлла гъилисса дукра. Вай дукрарду цирдагу дуллай бур цалла хозяйствалуву дучIан дурмуния.
АьлигъалбацI МахIаммадов­лул бувсунни цалла колониялий щалагу Ухссавнил Ккавкказнавасса 170 хъамитайпа бушиву, шикку миннан ххуйсса шартIру дузал дурну душиву. Бур ххуйну бакьин бувсса гъилисса къатри, дяркъусса ва гъилисса щин, хIаммам бансса кIанттурду, бигьалагансса къатта. Дуснакь бувминнан дуллай бур гьантлун шамийлла гъилисса дукра. Жяматийсса идарарттал вакилтурал ххал дунни колониярттайсса шартIру, дукра дайсса ва дукай­сса кIанттурду, производствалул цехру, школа, чак байсса къатри, библиотека. Колонияр­ттал ялтту буккан бувкIминнал маслихIатрайсса ихтилатру бунни дуснакь бувминнащал, чIа увкунни миннан ччясса чIумуй цалва кулпатирттавун, гъан-маччаначIан зана шаву. Диндалул вакилтурал бахшиш бунни колониярттан диндалул луттирду, православиялул дин дуллалиминнан — иконарду. Му бакъассагу, хъамаллурахь дия нацIу-кьацIу, спортинвентарь, канцтоварду, Дагъусттаннал ва оьруснал классиктурал лу­ттирду. Колониярттал каялувчитурал барчаллагь увкунни хъамаллурахь дурсса аякьалух ва махъ буллунни уттиния тихунмайгу хIарачат буллантIишиву дуснакь бувминнан тIайласса тарбия дулун.