Биялсса аваза гьаз бунни вай гьантрай МахIачкъалалив Котровалийсса «Ан-Надирийа» мизитрал имам аххана уваврил. ХIатта органнал зузалтрал ва мизитравун чак буван бучIайминнал къалмакъаллу хьушиврул хаварду бувсунни СМИ-рдал.
П. Рамазанова
Котровалийсса мизит цила чIумал, дахьва агьали чантI увкуну мизитру буллалисса ппурттуву, аьпа бивухъул, уссурвал Хачилаевхъал бувсса мизит бур, лакрал агьалиналгу, гьай-гьай, му мизитраву хъанахъимуних диялсса къулагъас дур. 
Ларгсса тталат кьини «Черновик» кказитрал редакциялий МахIачкъалаллал хъун мизитрал имам МухIаммадрасул-хIажи Сааьдуевлул журналистътурахь бувсуна, угьарасса инсан ухьувкун хьхьичIвама имам ХIасан-хIажи ХIасанаьлиев, цIуллу-сагъшиврул тагьар багьана хьуну мунан имамнал даву кьаритан багьшиву, органнал зузалт му мизит лава-лакьин най буну тIий, цIусса имам ивтшиву. Имамнугу ивтуна исламрал куртIсса ва цIакьсса кIулшивуртту дусса Давуд-хIажи Тумалаев. ЦIусса имам итаврил циванни мукунсса аваза гьаз бувсса тIисса журналистътурал суалданухьхьун жаваб дуллай, МухIаммадрасул-хIажи Сааьдуевлул увкунни: «Цаппараннан къабувчIлай бур Дагъусттаннал муфтиятрал му даву циван дурссарив. Жу хIала къабувхния, ихтиярду дуруччай органнал зузалтрал мизит лакьин най бия, мизитрал къапулий кьункьула дишаву жун кьамулну бакъая. Мунияту чIумуйну имамну цIакь увссар Давуд-хIажи Тумалаев».
«Новое дело» кказитрал журналистнал, «Инава имамну итарча зун хIадурну урав?» тIисса суалданухьхьун жаваб дуллай, МухIаммадрасул-хIажинал , «Муфтийнал му мизитравун къаралчину зун насу учирчагу, гьан хIадурну ура» куна. Мура кьини гьанттайнмай баян бунни Котровалийсса мизитрал имамну цIакь увшиву МухIаммадрасул Сааьдуев. КIивагу мизитрал имамнугу зий, мунал бусурманнал дянив хIусутшиву дагьан къаритансса хIарачат буваншиврий дакI дарцIуну бур.
Надиршагь Хачилаевлул арснал Муртазялилгу «Фейсбукравусса» цалла страницалий баян бувна, хIатта мизитравун батIайцириннахь цIухху-бусу къабувнува республикалул муфтиятрал имам аххана уварчагу, миннал хIукмулуцIун къабакьлай, къалмакъаллу дуллан аьркиншинна дакъашиву, ссавурданий ва аькьлулий къуццу тIун аьркиншиву.
