Медициналул элмурдал доктор, профессор, Дагъусттан Республикалул элмулул лайкь хьусса ишккакку, Дагъусттан Республикалул лайкь хьусса хIакин, Дагъусттан Республикалул халкьуннал хIакин ХIажиев Хайруттин Апаннинал арснан вай гьантрай хъанай дур 95 шин. Му юбилейрал даталун хас бувсса элмийсса ва практикалул «Традиции и современность. Актуальные вопросы внутренней медицины» конференция хьунни МахIачкъалалив Дусшиврул къатлуву.

Бадрижамал Аьлиева
Юбиляргу барча уван, конференциялул давривухгу гьуртту хьун бувкIун бия жулла республикалул шагьрурдаясса ва районнаясса, республикалул дазул кьатIатуссагу чIявусса инсантал. Конференциялул сакиншиннаралсса бувну бия Аьрасатнал Федерациялул ЦIуллу-сагъшиву дуруччаврил министерствалул «Дагестанская государственная медицинская академия» ГБОУ ВПО-лул, ДР-лул ЦIуллу-сагъшиву дуруччаврил министерствалул ва Дагъусттаннал терапевтътурал элмийсса медициналул обществалул (ДНМОТ), мунил бакIчи Маммаев Сулайманнул.
Дагъусттаннал элмурдал академиялул мяйжаннугусса член, Аьрасатнал терапевтътурал элмийсса медициналул обществалул хIурмат бусса член, Дагъусттаннал терапевтътурал элмийсса медициналул обществалул хIурмат бусса председатель, Щалагу Аьрасатнал кардиологтурал элмийсса обществалул хIурмат бусса член, «Знак почета», «Трудового Красного знамени», «Дружбы народов» орденнан, «За доблестный труд в Великой Отечественной войне», «За трудовое отличие», «За трудовую доблесть» медаллан, цикссагу цIардан, паччахIлугърал чулухасса грамотарттан ва личIи-личIисса бахшиширттан лайкь хьусса Хайруттин Апанниевичлул ххаллилсса оьрму бур махъа нанисса жагьилтурансса эбратну. Мунаяту бусланмур ва чичланмур хъинну чIявур ва анжагъ ххуймур, хъинмур.
Конференциялул даву дар­чIуну дия 3 секциялийх.
Конференция бачин бувну ия ДНМОТ-рал председатель, ва конференциялул сакиншиндарал комитетрал председатель, профессор Маммаев Сулайман Нураттинович.
ХIурмат бусса юбилярнан цIа кусса махъру ва кьини Дус­шиврул къатлул сахIналия чIя­вусса баллай бия: ДР-лул БакI­чинал ва ХIукуматрал чулуха, МахIачкъала шагьрулул администрациялул чулуха, АьФ-лул ва ДР-лул ЦIуллу-сагъшиву дуруччаврил министерствар­ттал чулуха, Дагъусттаннал паччахIлугърал медициналул академиялул ва ДНМОТ-рал чулуха ва м.ц..
Конференциялул давривух гьуртту хьун вай гьантрай республикалул хъуншагьрулийн бувкIун бия билаятрал хьхьичIунсса медициналул вузирдал вакилтал: И.М. Сеченовлул цIанийсса Цалчинсса Москавуллал паччахIлугърал медициналул университетрал, Н.И. Пироговлул цIанийсса Аьра­сатнал элмийсса ва хъиривлаявурттал медициналул университетрал ва цаймигу.
Юбиляр барча уван сахI­налийн лавхъун, медициналул личIи-личIисса темардайн багьайсса докладру бунни профессор Маммаев Сулайман Нураттиновичлул, И. М. Сеченовлул цIанийсса Цалчинсса Москавуллал паччахIлугърал медициналул университетрал № 2 госпитальный терапиялул кафедралул заведующий, профессор Леонид Дворецкийл, мува кафедралул профессор Сергей Яковлевлул, профессор Нина Новиковал, оьрчIал азардалмур кафедралул доцент Иван Дроновлул, Н. И. Пироговлул цIанийсса Аьрасатнал элмийсса ва хъиривлаявурттал медициналул университетрал оториноларингологиялул кафедралул доцент Александр Гуровлул ва чIявусса цайминналгу.
Конференциялул 2-мур секциялун цIа дия «Профессору Х.Э. Гаджиеву от благодарных учеников» тIисса. Мунил лаг­рулий докладру бунни профессортал А. Щ. Хасаевлул, И.А. Шамовлул, Н.А. Новиковал ва цайминнал. Хайруттин ХIажиевлуясса, захIматрал виричушивурттал бувцIусса мунал оьрмулул ххуллуясса доклад бунни доцент, ДНМОТ-рал председательнал хъиривчу Жамиля Оьмаровал.
Махъва-махъмур «Научные достижения молодых ученых» секциялий ххалдигьлай бия жагьилсса аьлимтурал ккаккияртту, давуртту.
Ва конференция баврил хъунмур хъар цийнна лархъун, ва даву лавайсса даражалий дунни ДНМОТ-рал (Дагестанское научное медицинское общество терапевтов), мунил председатель Маммаев Сулайман Нураттиновичлул каялувшиндаралу. Уку-укунсса давур­ттайнугу, Хайруттин Апанниевич кунмасса ххаллилсса инсантурал ва хIакинтурал цIардайну, тарбия буллай махъа нанисса жагьилсса хIакинтал, аьлимтал, хьхьичIмур никирал ва ялун нанисса никирал дахIаву дуцан къадитлай, му хъиннура цIакь дуллай зий бур ДНМОТ. Сулайман Нураттиновичлул мукъур­ттийну учин, лавгмургу буручлай, ялунбучIантIимунивунгу сивсуну буруглай, дагъусттаннал медициналул язими аьдатру ядуллай, авадан дуллай. Мукун­сса мурадрай, ва Обществалул чIун-чIумуй дувайссар, цалла харж-хуржирацIухгу, жулла республикалулми пишакартурайн бикIу, билаятрал медициналул центральный вузирдалми пишакартурайн бикIу оьвкуну, уку-укунсса конференцияртту, давуртту.
Хайруттин Апанниевичлул юбилейран хасну бувсса конференциялул хIасиллайн бувну, итабавкьунни, юбилярнал цалла суратгу дирхьусса, ххаллилсса статьярттал сборник.
Республикалул ва кьинисса хъамалгу, махъсса цинявппагу рязийну ливчIунни, хъинну чIявусса инсанталгу гьурттусса ххуйсса конференция хьунни тIий.