Октябрь зурул 23-нний ЦIуссалакрал райондалийсса ТIюхчардал 1-мур школалий хьунни Литературалул шинан хас бувсса райондалул школарттал дянивсса конкурс.
Шикку гьуртту хъанай бия Новостройрайсса ЦIуссалакрал райондалул шяраваллавусса цинявппа школартту.
Сакин бувну бия конкурс шанма бутIуя: 1-мур бутIа бия «ТIабиаьт ва фантазия» тIисса, оьрчIал захIмат бувну каруннал дурсса затирттан хас бувсса; 2-мур бия «Ттул яла ххирамур лугу, нагу» тIисса, суратру дишавриясса; 3-мургу бия «Оьруснал классикалул поэзия» тIисса, пасихIну шеърирду буккавриясса.
Конкурсрал даву дайдишиннин хъамаллурал хьхьичI аьнтIикIасса къавтIавуртту ккаккан дунни ТIюхчардал школалул 2-мур классрал дуклаки оьрчIал.
ОьрчIал гьунардан кьимат бишлашисса жюрилуву бия райондалул КIулшиву дулаврил управлениялул методист Мисиду Шагьмарданова, ДПШ-лул директор Пакият Гаппаева. ХьхьичIва-хьхьичI жюрилул барчаллагь увкунни мероприятие лавайсса даражалий сакин дурсса ТIюхчардал 1-мур школалул коллективрахь. Цаннаяр ца итххявхсса, гьунар бусса оьрчIава хьхьичIунма язи угьан, кIанттурду булун бигьану бакъая жюрилун.
«Оьруснал классикалул поэзия» тIимур номинациялий ххув хьунни ДучIиннал 2-мур школалий дуклакисса Юсупова Салимат ва ТIюхчардал 1-мур школалул дуклаки душ Кьурбанова Диана.
«Природа ва фантазия» тIисса номинациялий каруннил дурсса давурттахлу хьхьичIунсса кIану буллунни Гьамиящиял школалул дуклаки душ ХIусайнова Аьйшатлун.
«Композиция» тIимур номинациялий ххув хьунни ЦIуссачIурттащиял школалул дуклаки душ ХIадисова Завжан.
Шамилчинмур «Ттул яла ххирамур лу ва на» тIимур номинациялий ххув хьунни ТIюхчардал 1-мур школалул дуклаки душ ХIаммадова Фатима. Ахирданий цинявппа гьуртту хьусса оьрчIахь ва бувкIсса хъамаллурахь барчаллагь увкунни ТIюхчардал 1-мур школалул директор ШайхахIмад Дадаевлул.
ХIадур бувссар
И. Саидовал
