Дагъусттаннал хъузалтрал, махъра-махъсса ккаккиярттал хIасиллайну, ларсун дур 50 азаллий 700 тонна ппиринжрал. БакIлахъия ларсун дур 11 азарда гектардания.
ДР-лул Шяраваллил хозяйствалул министерствалул бувсъсса куццуй, ппиринж бугьаву республикалий хъанай дур ца яла приоритетмур бутIану шяраваллил хозяйствалул бакIлахъия ласавриву. ЦIанасса ппурттуву ппиринж ххяххан бавриву Дагъусттаннал билаятрай бугьлай бур 2-мур кIану, 1-мур кIанай бур Краснодардал край. Ппиринж бугьлай бур Дагъусттаннай, хъунмурчIин республикалул ухссавнил чулий, Хасавюртуллал, Бабаюртуллал, Тарумовкаллал ва Къизлардал районнай.
Так махъсса 2 шинал мутталий республикалий ппиринж бугьаву ххи хьуну дур сайки кIийла – 9,5 азарда гектардания 16 азарда гектарданийн диянцIа. ЦIанасса ппурттуву ппиринж чIявуну бугьаврил мурад бур бакIлахъия машай дуккан дан хъанахъаву, му бакъассагу, шяраваллил хозяйствалуву импортозамещениялул программагу дузрайн дуккан давугу ца мурад хъанай бур.
ДакIнийн бутанну, Дагъусттаннай ппиринжрал яла хъуннамур бакIлахъия ларсун диркIссар 1989 шинал – сайки 90 азарда тонна 26 азарда гектардания.
«Эффективный АПК» тIисса ДР-лул приоритетсса проект дузрайн дуккан даврин хасну, цIанасса ппурттуву мадарасса лябукку хъанай бур: дукIу республикалул хъузалтрал ларсъссар сайки 59 азарда тонна ппиринжрал, гьашину тIурча ласун тIий бур сайки 70 азарда тонна ппиринжрал.
