Октябрьданул 27-нний МахIачкъалалив Оьруснал театрдануву хьунни Совет Союзрал КIийла Виричу, СССР-данул лайкь хьусса летчик-испытатель АхIмад-Хан Султаннун 95 шин шаврил юбилейран хас бувсса мажлис. Микку гьуртту хьунни Виричунал мачча-гъансса, ватанлувтал, аьралийтал, республикалул общественность ва Къиримнаватусса делегация.
Шадлугърал батIаврийн бувкIун бия ДР-лул ХIукуматрал Председатель Аьбдуссамад ХIамидов, ДР-лул ХIукуматрал цаймигу члентал.
ДР-лул Шяраваллил хозяйствалул ва бакIлахъиялул министр Баттал Батталовлул «Мусил ссут – 2015» тIисса Аьрасатнал агропромышленностьрал выставкалул Гран-при дуллунни ДР-лул ХIукуматрал Председатель Аьбдуссамад ХIамидовлун. Ва наградалун лайкь хьуссар Дагъусттаннал хъузалт. Жулва хъузалтрал ва фермертурал хозяйстварттал ласайсса бакIлахъия ккаккан дурну диркIссар октябрьданул 8-нния 10-нин Москавлив хьусса билаятрал яла хъунмур аграрий форумрай.
ХI. Аьдилов
Выставкалул яла лараймур даражалул награда Гра-при дакъасса, республикалул предприятиярттан дуллуссар 20 медаль, миннувату – 12 мусил, 3 арцул, 3 чарвитул.
Выставкалий Дагъусттаннал экспозиция ххал дан бувкIун бивкIссар федерал министерстварттал ва ведомстварттал каялувчитал, Аьрасатнал регионнал бакIчитал цаппара чил билаятирттал делегациярттал вакилтал ва цаймигу.
Выставкалий ккаккан дурну диркIссар Дагъусттаннал коньякру, чахирду, дикIул ва накIлил сурсатру, зунттал урттул чяй, республикалул багъ-бахчардава дуркIсса ахъулсса ва ахънилсса.
Микку чялишну гьуртту хьуссар мукунма жулва ризкьичитал ва фермертал. Миннал ккаккан бувссар гьаннарал кунни. Миккун ларсун диркIссар мукунна ацIраксса инвестициярдал проектру.
