АхIмад-Ханнул ппу Султан ивкIссар Цалчинмур ЦIувкIуллал шяраватусса. Цаймигу лакрал чиваркI куна, мугу лагайсса ивкIун ур цалва маэшатрал хъирив хIалтIилухун Къиримнавун, Алупка тIисса шагьрулийн. Султаннул ЦIувкIрав буссия Фатима тIисса ца ссу ва чIявусса ляхъин.
Аьпа биву, ттул ниттил нину буслан дикIайва, цила ниттиуссил Султаннул Къиримнава личIи- личIисса ахъулссаннул посилкартту дучIайва, цаллагу муначIан ккурккимайртту, кьаркь дикI, яттил нис гьан дайссия тIий. Мунила бусайва ца ишираву Султаннул чагъар бувкIшиву цанма щарну татар душ буцин ччай ура тIий. Мигу муний рязи хьуну бия. Хъиривмур шинал Насиба тIисса татардушнищал му буттал шяравун увкIун ур. КIиккува хъатIигу бувну, махъунмай тIайла бувкссия тIар.
Вана укун, цаппара шинну ларгукун, миннал увну ур кIия оьрчI. Хъунама арснангу дирзун дур АхIмад-Хан тIисса цIа. Школалалий ва Симферополлай ФЗУ-луву дуклакисса шиннардий ххира хьуну дур АхIмад-Ханнун самолётругу, някIсса ссавгу. Гания махъри мунал магьиршивугу дайл хъанай дарчусса, муная цIа дурксса летчик-испытательгу хьусса.
Оьрмул-оьрмулухун дакIний личIанссар, ттула ниттил ссурахъу жулла райондалийн увкIун, лакрал халкьуннащал хьунаавкьусса 1971-ку шин. Виричусса зунттал барзу лайкьну кьамул увна. Лагмара лархъсса лозунгирттал, художествалул самодеятельностьрал коллективирттал тIутIисса балайрдал, райондалий, колхозирттай, совхозирттай, идарарттай каялувшиву дуллалиминнал бувсса ихтилатирттал тасттикь буллай бия щалвагу Дагъусттаннай АхIмад-Ханнул цIа цуксса бюхттулну ва сий дуну дуссарив.
Ми гьантрай Виричунащал ляличIинура гъилисса хьунабакьавуртту хьуссия ттул ниттиуссу ХIажикьурбаннул, ссурахъу СахIибатлул. Цибанссар, инсаннал ялун личIи-личIисса кьадарду бияй. Къанясивну бивкIун бур ттул ниттил ссурахъун АхIмад-Ханнунгу, душманнаяр ххув хьуну, 70 шин шаврил байрандалий гьуртту хьун. Амма мунал цIа, ссавнийсса цIуртти кунна, муданна чанна лархъунна личIантIиссар.
Ттун хъинну ххуйну дакIний дур АхIмад-Хан Султан ттула буттал ХIажинал ва ниттил Арал къатлувун хъамалу увкIсса чIун. На буссияв ганий 7-мур классраву. Га дия жул кулпатрал АхIмад-Ханнущалсса цалчинсса хьунабакьаву. Жул къатри дия кIучIа тIий дурцIуну гъан-маччаминнал ва шяравусса халкьуннал. Гьарцама ия ганачIан гъан хьун ччай. Га ия лахъ акъасса, дянивсса чурх бусса. Циняв гъан-маччанащал хъямалагу агьну, ттул чIивимур ссу Фатимагу канил бувгьуну, цIухлай айивхьуна циняв гъан-маччаная. Фатима бия АхIмад-Ханнул буттарссин цIасса шанна шинавусса душ.
Ттул ниттихь, Арахь, ганал бувсуна цалва кулпатрая. Ганал ия кIия арс. Циняв халкь бия тамашалий буруглай ганал хъазамрайсса чанна цIурттах. Яла ттул ниттищал тIащилий къавтIунгу ивзуна.
Ганащал архIал увкIун ия цIа дурксса культуралул зузала Ярагъи ХIажикьурбанов – пагьламанчи. АхIмад-Хан ганахь ия: «Больше дела, меньше слов», — тIий. АхIмад-Ханнун къаххирая чIявусса гъалгъа буллан.
Ттул ниттил Арал, СССР-данул ва Дагъусттаннал культуралул цIардан лайкь хьусса зузалал, укунсса шеъри чивчуну бур цила ниттил ссурахъун хас бувну:
ЗУНТТАЛ ЛАЧИН
Ссавруннайх гьава байсса
Зунттал цIа дурксса лачин,
Душмантал ппив-ххив бувну,
Бюххттул хьусса виричу.
Совет халкьуннал цIаний
ЦIаравун ххяхлай ивкIма,
Чувшиврухлу орденнал
Хъазам пар-партIи бувма.
Аьзиз Ватан дуручлай
Дур къучагъшивурттахлу,
Коммунист партиялул
Лайкьсса кьимат бивщума.
НякI ссурулух ссур буллай,
Душмантал лиян бувма,
Партиялул бивхьу бурж
Намусрай биттур бувма.
Душманнаяр ххув хьуну
АрулцIалла шин хьунни,
Ина дур къучагъшиву
Абадлий личIантIиссар.
Ханум МахIаммадова,
ЦIуссаккуллал дянивмур даражалул 1-мур школалул директор
