Лакрал вирдакI, лакрал байтагъ Гъумучиял школа хьуну бур сайки гьарцагу Лакрал щархъавасса оьрчIансса кIулшивурттал кюруну ва дусшиврул къалану. ХIакьинусса кьининийнгу рукъарцун дур миннал дусшиву. Уттигъанну МахIачкъалалив, «Олимп» ресторандалуву, хьунни Гъумучиял школданул 1965 шиналсса выпускниктурал хьунабакьаву.
Зулайхат Тахакьаева
Ва шинал школа къуртал бувну бур 34 инсаннал. Ва цуппагу бивкIун бур 26-мур выпуск. Вайннава мусил медальданущал школа къуртал бувну бур Айгунов ХIасаннул, Камалов АьбдурахIманнул, Зингеров МахIаммадлул, Аьбдуллаев Мусал. Цуксса пашманнугу, 50 шинал мутталий вайннава яла лавгун ур 7 инсан, аьпа баннав цал! Илиясов Хайруттин, АхIмадханов ХIабибуллагь, ЦIургъулов Мурад, Сулайманова Зунзул, Штанчаева Сиянат, Аьбдуллаев Муса, Зингеров МахIаммад. Мажлис байбишин хьхьичI цинявнналагу цалва гьалмахтал дакIнийн бивчуну, вайннах аьпа увкуна.
ЧIяву-чIявусса цаймигу жулва ватанлувтал кунма, 50 шинал хьхьичI школа къуртал бувмигу щалва билаятрайх кIама бивщуну бур, ми Дагъусттаннал кьатIувгу бучIи лявкъуну бур, цивппа буний лакрал цIа-кьини лайкьну дуручлай бур.
Мажлисрал тямадашиву дуллай ия ца лакран акъассагу, щалва республикалий кIулсса, бусравсса ХIасан Айгунов, профессор, математикалул элмурдал доктор, ДР-лул элмулул лайкь хьусса зузала, Аьрасатнал Федерациялул пишакаршиврул кIулшиву дулаврил бусравсса зузала. МарцIсса ххювардай ДГУ-рал математикалул факультетгу къуртал бувну, ХIасан Айгунов дуклан увххун ур аспирантуралувун. ЧIал къавхьуну дурурччуну дур кандидатнал диссертация Ростоврай. Зий ивкIун ур ДГУ-лул машлул ва экономикалул факультетирттай математикалул дарсру дихьлай. Мадагаскардай зий дурну дур 5 шин. ЧIярусса шинну дурссар ХIасан Аьбдуллаевичлул ДГУ-рал проректорну зий. 2010 шиная хIакьинусса кьининийн зий ур Дагъусттаннал паччахIлугърал политехнический колледжрал директорну, архIала ДГУ-рал математикалул факультетрай дарсругу дихьлай. Амма тиккусса харж ванал къаласайсса бур, хьхьичIунну дуклакисса студентътуран учредить бувну бур аьпалухьхьун лавгсса, дакIния къабуккайсса цалва учительтурал цIанийсса (Таймуразовлул, Мейлановлул, Мухтаровлул ва Лихманнул) 4 стипендия.
ХIасан Айгуновлул бувсуна цува МахIачкъалалив дуклакисса чIумал автобусраву хьунаавкьусса аьпабиву Шяпи МахIаммадовичлул бувсмур. Гъумучиял школалий бавтIун бивкIун бур педсовет, ца лап мютIи акъасса оьрчI школалия уккан аврил ялув, дуклаки оьрчIал нитти-буттахъайнгу оьвкуну. Учительтурал ва нитти-буттахъал цалва пикрирду бувсун махъ, ва суалданул ялув чIурду булун ккаккан байхту, га уккан уллалисса оьрчIал, кагу гьаз дурну, увкуну бур: «Аьс ан увцуну наниманахьхьунгума махъва-махъсса махъ бусансса ихтияр дулайссархха, ттухьхьун махъ къабулайссарив? На зухь цIуххин ччай ура, на адаминаривкьай, акъарив?» — куну. «Вар ина цукунсса адаминара, ина ура оьнцIул оьрчI», — увкукун, ганал чайва тIар: «Вар, туну, итияра на оьрчIшиву дан», — куну. Ганал хъярчлил цинявппа хъяхъи бувну, ганайн бивзсса ссигу ляливну бур.
ОьрчIи тIуллугу оьрчIнийра дурну, Гъумучатусса Къуркъахъал уздансса авладраясса Ризван Оьмаров, ххаллилсса кIулшивугу ларсун, зий ивкIун ур цал институтраву дарс дихьлай, яла Пятигорскалий совхозрал директорнал хъиривчуну зий дурну дур 18 шин. Муния махъгу дакI тIайлану цайми давурттайгу зий ивкIун ур. ЦIанасса чIумал зий усса ур Сочи шагьрулул базаллул директорну.
Ва хьунабакьаву сакин дан хъунмасса захIмат бувсса Зоя Къюннуева, Дагъусттаннал паччахIлугърал пединститутрал кьатIаллил билаятирттал мазурдил факультет къуртал бувну махъ, Гъумучиял школалий дарсругу дихьлай, хьхьувайсса школалул директорнугу зий бивкIун бур. Щар хьуну махъ бивзун бур Ростоврайн. Тийх зий бивкIун бур Халкьуннал хозяйствалул институтраву. Тиха МахIачкъалалив бувкIун махъ зий бивкIун бур Ленинский райисполкомрал орготделданул каялувчину. Муния махъ зий бивкIун бур ДР-лул Экономикалул министерствалул отделданул каялувчину, яла – Пенсионный фондрал аьмсса отделданул каялувчину. Гичча лавгун бур пенсиялийн.
ШавкIуллал шяраватусса Какваев Руми, ларайсса кIулшиву ларсун махъ, зий ивкIун ур найрдучину, Лакрал, Ккуллал, Гъуниннал ва ЧIарадиял районнай найрдал хозяйствалул ялув авцIуну. Махъсса шиннардий зий ур Лакрал райондалий ветуправлениялий найрдай азарду ппив хьун къаритлай.
Буршиял шяраватусса Халидов Халид 20 шинал мутталий зий ивкIун ур ЦIуссалакрал райондалул азарханалий ккарччал хIакинну. Гийх Чачаннал дяъви байбивхьусса чIумал ивзун ур Владикавказрайн, тийх шагьрулул стоматологиялул протезру бай отделениялул хъунаману зий ивкIун ур. Мукьра шинал хьхьичI ивзун ур Каспийскалийн.
КIулушацIрал шяраватусса Камалов АьбдурахIман, Дагъусттаннал паччахIлугърал университетрал физикалул ва математикалул факультетгу къуртал бувну, зий ивкIун ур Казбековский райондалий физикалул ва математикалул дарсру дихьлай. ГДР-наву аьралуннаву къуллугъ бувну зана хьуну махъ зий ивкIун ур Дагъусттаннал политехнический институтраву аьмсса физикалул кафедралий. 1976 шинал дурурччуну дур диссертация. 30 шинай зий ивкIун ур Москавуллал физикалул институтрал астрономиялул отделданий. Муния мукьах зий ивкIун ур Каспийскаллал энергетический техникумраву, Дагъусттаннал паччахIлугърал политехнический колледжраву.
ГьунчIукьатIатусса Штанчаев Нажиблул къуртал бувну бур Москавуллал энергетический институт. Зий ивкIун ур Каспийскалий Горьковский заводрал филиалданул директорну. ЦIанакул зий ур «Порт-Петровск» пивзаводрал хъунама инженерну.
Хъунатусса Малакаева Аминат, институтгу къуртал бувну, зий бивкIун бур Ккурккуллал школалий, яла, 11 шинай, зий бивкIун бур МахIачкъалалив детсадраву тарбиячину, муния махъ, 30 шинай, бивкIун бур МахIачкъалаллал детдомраву хъунмур тарбиячину. ХIакьинусса кьинигу зий бур шиккува психологну.
Ххаппалаева Жарият, ДР-лул Халкьуннал кIулшиву дулаврил отличник, Аьрасатнал бусравсса учитель, ДР-лул культуралул лайкь хьусса зузала. Институт къуртал бувну махъ зун бувкIун бур Гъумукун. Яла, щар хьуну махъ, бувкIун бур МахIачкъалалив, зий бивкIун бур 13-мур школалий. Дагъусттаннал цачIун був музейрал хъунама директорну зузисса лас Ххаппалаев Рамазан ивкIуну махъ, республикалул каялувчитурал тавакъюрайн бувну, бакIрайн ларсун дур ласнал канилу диркIсса бигьа дакъасса даву. Микку зий дурну дур 13 шин. ЦIанакул зий бур Дагъусттаннал магьирлугърал колледжраву сакиншинначину (организаторну). Ванил курс ккаллину бур колледжраву яла хьхьичIунмунин.
ХьурукIратусса Кьурбанов Оьмарил чIярусса шинну дурну дур Каспийскаллал точный механикалул заводрай зий, монтажникная, спецпроизводствалул каялувчинайн ияннин. АрхIалла бакIрайн ларсун дур жяматийсса давугу, заводрал профкомрал хъунаману, жамирду бувултрал профсоюзрал ЦК членну зий. Ленинградрай къуртал бувну бур Лаваймур профсоюзрал школа. ЦIанакул ва ур Аьрасатнал ГУ ФСС Дагъусттаннайсса отделданул консультант.
Ххюлуссуннал шяраватусса Халилов Халил Дагъусттаннал мединститутрал стоматологиялул факультет къуртал бувну махъ тамансса шиннардий зий ивкIун ур Челябинскалий. ЦIанакул зий ур Каспийскалий.
Пятигорскалия бувкIсса Сиянат бия школа къуртал бувния махъ одноклассниктуращал хьунакъабавкьуссара тIий, хьунабакьаврил сакиншинначитурайн барчаллагьрай.
Хьунабакьаврийн бувкIсса вайннал бусравсса учительницахъул Эльза Алексеевна Парамазован ва Аьжа Шабановна АькIиевангу ххуйсса ва хъинсса асарду ливчIун бия ва выпускрая.
