Гьантри лаглай, шинну лаглай, жуятура арх дуклай дур тай кьурчIисса дяъвилул шинну. Духлаглай дур буттал кIану ххассал буллай бивкIминнал кьюкьри. Вана, гьашину жура тIайла дуклай буру Ххувшаврил 70 шин шаву. Щинни хъамабитантIисса та дяъвилуву бувсса захIмат, харж дурсса жанну.

Ца жулла Ккуллал райондалия дяъвилий жанну харж дурну дур 1380 виричунал. Ххувшавугу ларсун, зана ивкIсса 780 виричуная гьашинусса Ххувшаврил байран хьунадакьин ливчIун ия 2 дяъвилул гьурттучи ва 320 дяъвилул къинттуллух зий бивкIми.
Вайннал бувсса захIматгу, вай цивппагу муданма дакIний личIантIишиву ккаккан дурунни, Ххувшаврил байран хьунадакьлай, райондалий дурсса давурттал. Ца агьаммур кIану минну­ву бугьлай бур Ваччиял шяраву кIийла СССР-данул Виричу АхIмад-Хан Султаннун, ЧIяйннал шяраву СССР-данул Виричу ЦIаххай Маккаевлун гьайкаллу дацIан даврил.
Ялагу ца лайкьсса давуну хьунни, райондалул администрациялул хIукмулийн бувну, гьарца шяраву бачин баву «Аьпалул альбом».
Ва альбом буцIин буллай хъунмасса захIмат бувссар шяраваллал администрациярттал, школар­ттал, культуралул идарарттал, шяра­валлал ишккаккултрал. Ва альбомращал архIал занай бивкI­ссар гьарца шяравух Берлиннай бивщусса Ххувшаврил ттугълил копия.
Майрал 7-нний ва альбомгу, занази ятIул ттугъгу буллуссар райондалул музейравун. Вания тинмай ххуйну школа къуртал бувсса дуклаки оьрчIал сурат рищавантIиссар ва ттугъличIа, альбомгу канил бувгьуну.
Вайннущала оьрчIал чIярусса давуртту дурссар школарттай, клубирттаву. Библиотекарттаву райондалул хъуними хьунабавкьуссар гьарца шяраваллил жяматращал, дуллуссар 70 шин шаврин хас дурсса юбилейрал медаллу.
ДакIний личIансса давуну хьунни, 100-ннийн бивсса жагьилтал бахьтта лавгун, Щуну-Зунттул яла лахъмур мицIлий Берлиннай бивщусса Ххувшаврил ттугълил копия бацIан баву.
Райондалий Ххувшаврил кьини хьунадакьлай, щалла райондалул жямат гьуртту хьуссар. Вай­ннал каруннахь диркIссар «Бессмертный полк» тIисса цIанилу Хъун дяъвилуву гьуртту хьуминнал, зана хьуминнал сурат­ру. Жяматрал хьхьичIун увкссар, цанма цуксса захIматнугу, Буттал КIанттул дяъвилул гьурттучи, ЧIяйннал шяравасса Самедов Садикь.
Дяъви бакъагу, гьарца инсаннаща шайссар буттал кIану ххирашиву ккаккан дуван цува зузисса давриву, дуккавриву.
ХIурмат лавайсса гьалмахтал! Буруччара Буттал кIану, му буржри гьарца инсаннал. ТачIавгу хъамамабитари Буттал кIану ххассал буллай бивкIми.
Аьбдул Загьидиев,
Ккуллал райондалул
Ветерантурал советрал председатель