Сентябрьданул 18-нний МахIачкъалалив «Восточная пальмира» шадлугъирттал къатраву хьунни хIала-ккаласса дандибуккавурттал дунияллул халкьуннал даражалул турнир. Турнир хас дурну дия республикалул хIала-ккаласса дандибуккавурттал ММА-1 федерациялул председатель, ва турнирданул сакиншинначи Аьбдулкерим Айгуновлул буттал МахIаммад Айгуновлул цIа абад даврин.
ХIасан Аьдилов
Ва турнир дуллалаву утти аьдатравун дагьну дур, гьашину шамилчинни дуллалисса. Гьар шинах кунма залдануву столлу бия дукиялул, нахIу-нацIушивурттал, ахъулссаннул, хIачIиярттал бувцIуну.
Турнирданий гьуртту хъанай бия Азирбижаннал, Узбакисттаннал, Украиннал, Франциянал ва цаймигу билаятирттал спортсментал. Бия, мукунма, Аьрасатнал цаппара регионная бувкIссагу. Миннащал ччалли буклай бия Дагъусттаннал дандибуккулт.
Бусравсса хъамаллуравух бия лакрал цIа дурксса спортсментал ва тренертал – бусалардавун агьсса, мукьийла дунияллул чемпион, Американал континентрал чемпион Рамазан Рамазанов, лачIунбуккаврил олимпий чемпион Ширвани Мурадов, цIа дурксса тренертал Аьбдул Гъазалиев ва Олег МахIаммадов ва цаймигу.
Шадлугърал тагьардануву турнир тIиртIунни Аьбдулкерим Айгуновлул ва Москавлия оьвкуну учIан увсса ринганонсер Александр Закорскийл. Миннал бувсунни турнир сакин дуван кумаг бувминная ва барчаллагь баян бунни ДР-лул УФСИН-далул хъунама, генерал-майор Муслим Даххаевлуйн, Ширвани Мурадовлуйн, Муса Мащалиевлуйн.
Турнир дайдишин хьхьичI балайрду увкунни Дагъусттаннал машгьурсса артистътурал, миннавух – Аьбдул Мурадовлулгу.
Биян бувккунни цалчинми дандибуккулт Азирбижаннал Руфат Асадов ва Дагъусттанналма Эльдар Атаев. Ухма, ххувма кIул ан къахъанай биян бивтунни 3 раундрай. Ахирдангу Эльдар ххув хьунни баллу хIисавну.
Франциянал дандиукку Эрик Бетащал иян увккунни жула Аьли ЧIанкIаев. Бугъ айсса прием дурну ххув хьунни дагъусттанлув.
Украиннал чарххичи Командор Оглы Улощал ччалли увккунни Дагъусттаннаясса Аьлим Черкесов. Миккугу жула спортсмен ххув хьунни.
Украиннал Арсен Менсиннитлущал данди увккунни лакку оьрчI Гьарун Даххаев (Москавуллал ва Москавуллал областьрал чемпион). Миннавату Гьарун ххув хьунни.
Азирбижаннал спортсмен Фуат Гадировлущал ччалли увккунни Юсуп Сулайманов. Ххув хьунни Юсуп.
Къазаннаясса Илья Соколовлущал ивну ххув хьунни Дагъусттаннаясса Башир Тажуттинов.
Лаккучу СалихI Къаравалиев (чулий цIа «Дикий») ххув хьунни Украиннал Андрей Красильниковлуяр.
Лаккучу Айгун АхIмадов ххув хьунни Украиннал спортсмен Алексей Кравченкояр.
Унгу-унгусса дандибуккаву хьунни дагъусттанлувтурал Муслимбек Муслимовлул ва Рамазан Парсуковлул дянив. Муслимовлун цIунцIия хьуну, Р. Парсуков ххув хьунни.
Ашттарханнаясса узбакI Хусанбой Артажановлуяр ххув хьунни лаккучу Марат МахIаммадов (чулий цIа «Лакец»).
Азирбижаннал дандиукку Тоджк Мусаев ххув хьунни дагъусттанлув МахIаммадсултан Аьликъулиевлуяр.
Константин Минник (Украина) ух хьунни Дагъусттаннал спортсмен Артур ХIусайновлуяр.
Турнирданий ххуй-ххуйсса бахшишру ва арцуйнусса гонорарду Аьбдулкерим Айгуновлул чулуха дуллунни циняв ххув хьуминнангу, миннащал дандибувкминнангу. А. Загорскийл барчаллагь увкунни Аьбдулкеримлухь ва турнир гьар шинах дуллалаврихлу.
