Октябрь зурул 7-нний АхIмад-хан Султаннул цIанийсса МахIачкъалаллал аэропортрал «Турухан» авиакомпаниялущал цачIуну сакин дунни Минводы шагьрулийнсса Дагъусттаннал журналистурансса пресс-тур. Укунсса пресс-турду дуллалаву махъсса шанна-мукьра шинал дянив аьдатравун дагьну дур жулва аэропортрай.
МахIачкъалаллал авиакомпаниялул Минводылийнсса рейсру цIудуккан дурну махъ цалчинсса рейс хьуну дур октябрь зурул 2-нний.
КIилчинмур рейсрай хьунни ялув кIицI ларгсса журналистурансса пресс-тур. Утти МахIачкъалалия ва шагьрулийн самолетру лехлан тIий дур нюжмардий шамийлла: арвахI, нюжмар ва алхIат кьинирдай. Рейсрал ца чулийнмайсса багьа 1800 къурушрая тихунмайсса бур. Дагъусттанная Ккавкказуллал регионнайсса курортирттайн хъин хьун, бигьалаган заназисса инсантал тачIавгу чан къашай. Миннансса хъуннасса къулайшиву хъанай дур Минводы шагьрурдайнсса рейсру цIудуккан даву. Минводылийн дакъассагу, МахIачкъалаллал аэропортрал цIудуккан дурну дур мукунна Ростоврайнсса, Курскалийнсса ва Самаралийнсса рейсру.
[audioplayer file=» [audioplayer file=»http://ilchi.beget.tech/wp-content/uploads/audio/imara.mp3″ bg=»ff7f1a»
leftbg=»ff7f1a» lefticon=»294781″ track=»ff1b2c» tracker=»ffff00″ text=»000000″ righticon=»294781″ width=»300″
rightbg=»408080″ volslider=»ffffff» skip=»ffffff»]Утти жулва аэропортрая Минводы шагьрулийн нюжмардий шамийлла лехлан тIий дур самолетру.
Октябрь зурул 4-нний хьунни МахIачкъалалия Курскалийн Минводы шагьрулийхчIин лехлахисса цалчинсса рейс. Ва рейсрал ца чулухунмайсса багьа 2800 къурушрайн бивсса бур. Августрая тихуннай самолетру лехлан тIий дур МахIачкъалалия Самаралийн ва Ростоврайнгу. Ми рейсру дикIан тIий дур итни, арвахI ва нюжмар кьинирдай. Миннул ца чулухунмайсса багьагу 2800 къурушрайн бивсса бур.
— Аэропортрал хъуннасса даву дурссар ца шинал хьхьичI дацIан дурну диркIсса Минводы, Ростов, Самара, Курск шагьрурдайнсса маршрутру цIудуккан дуллай. Ахиргу, хъунмасса хIарачат бувну, жуща бювхъунни багьри ялавай бан, мукунма Дагъусттаннайн цIусса авиакомпанияртту кIункIу дан. Утти ялув кIицI лавгсса шагьрурдайн мудан лехлантIиссар самолетру, — тIий ур «Аэропорт Махачкала» ОАО-лул коммерческий директор Илдар Кьадиев.
«Авиакомпания «Таймыр» ОАО-лул (ва хъанай дур NordStar авиакомпаниялул бренд) тIиртIунни МахIачкъалалия Москавлив ва Исттамбуллайнсса рейсру. Мукунсса цалчинсса рейс хьунни октябрьданул 4-нний. Ва зуруй Москавлийн нюжмардий кIийлла (арвахI ва алхIат кьинирдай) лехлан тIий дур самолетру. Октябрь зурул 25-нния байбивхьуну тIурча, Москавлив самолетру лехлан тIий дур гьарица кьини. Му рейсрал ца чулухунмайсса багьа 2600-нния ливчусса бикIан тIий бур. Октябрь зурул 4-нния байбивхьуну МахIачкъалалия Исттамбуллайнсса самолет лехлан тIий дур нюжмардий цал – алхIат кьини. Тиха махъуннаймур рейс дикIан тIий дур арвахI кьини. Миннул ца чулухунмайсса багьа 64 евролун бацIлай бур. Цалчинсса рейс дайхтува, чIалан бивкIунни ва агьалинан хъинну тIалавну душиву. Му рейсрайн цинявппагу билетру бавххуну бур. ЦIана авиакомпаниялул ххал бигьлай бур Исттамбуллайнсса нюжмардий цал лехлансса ца рейс ттигу тIитIаврил масъала.
«NordStar» авиакомпаниялун пикри бур МахIачкъалалиясса рейсру чIяру дан. ЦIана миннал ххал бигьлай бур 2016 шинал гъинттулсса чIумал МахIачкъалалия Санкт-Петербургливсса, МахIачкъалалия Екатеринбург – Красноярскалийнсса рейсру зузи даврил масъала. МахIачкъалалия Санкт-Петербургливсса самолетрал багьа бикIан тIий бур 3500 къурушрая ливчусса. Вай рейсирдай лехлан тIий дур къулайсса шартIру дусса ттизаманнул Боинг-737-800 ва Боинг-737-300 самолетру.
ЦIусса рейсру тIитIланнин ва авиакомпаниялул хъуниминнал хIисавравун лавсун бур лавгсса шиннардил опыт. МахIачкъалалиясса рейсру ялу-ялун гьарза дуллай кIира-шанна шинал дянив ялагу 6-7 шагьрулийнсса рейсру тIитIинсса пикри бур авиакомпаниялун. Лехлахи дан тIий дур шанна ттизаманнул Боинг-737-800 самолетру.
2001 шинал март зуруй «Туруханские авиапредприятия» тIисса ПаччахIлугърал унитар предприятиялул гьанулий сакин дурсса «Турухан» авиакомпания Дагъусттаннай зун диркIун дур 2015 шинал август зуруй, Ростоврайнсса ва Самаралийнсса рейсру тIиртIуну махъ.
«Турухан» авиакомпания духлай дур Аьрасатнаву ца яла хъуннамур авиациялул группалун ккаллисса «ЮТэйр» компаниялувун.
ХIакьину ва авиакомпаниялул паркраву аьмну 50-нния ливчусса самолетру ва вертолетру дур.
Ухссавнил дазуйсса районнайн лехлахисса хъунмасса опыт бусса лавайсса даражалул летчиктурал ва техперсоналданул цалва пассажиртал мюхчанну биян булланшиврий цукунчIавсса щак бакъар. «Турухан» авиакомпаниялул сипталийну хьунни ва ххуллухсса журналистурансса пресс-тургу.
«Турухан» авиакомпаниялул пресс-конференциялий икьрал дурсса куццуй, октябрь зурул 7-нний кIюрххила республикалул СМИ-рдал зузалт бувкIунни МахIачкъалаллал АхIмад-Хан Султаннул цIанийсса аэропортрайн. Аэропортрайн чIал къахьуншиврул, жун ччяни буккан багьлай бия шагьрулува. Ва ишираву жун хъуннасса къулайшинна хьунни цилва машиналий нанисса жулва коллега, «Пенсионер Дагестана» кказитрал корреспондент Шагьалай МахIаммадова архIал бацIаву. Гихунмайсса аьрххилийгу жу мудан цачIу бивкIру. «Ххуллийри гьалмахчу кIул шайсса» учай. Ванил буниялагу жул аьрххи-ххуллу ххуй бунни. ЦIу бусса хъярч-махсарттайну цинявппагу тяхъа буккан буллай бия Шагьалай. Яла-яла журналистал ххари хьунни гьашину ва аьрххилийн цащала МахIачкъалаллал аэропортрал пресс-центрданул хъунама Алексей ХIажиев най ушиврия. Алексей ХIажиев журналистурал дянив нукIува бусравну ур, мудангу аэропортрая цIу-цIусса хаварду баян буллалисса, журналистуращал ххуйсса дахIаву дусса пресс-центрданул каялувчи хIисаврай. Вай пресс-турду щаллу дансса циняв масъаларттугу ванал цалва бакIрайн ласай.
Ккаккан дурсса чIумуй, ссят 10-нний, МахIачкъалаллал аэропортрай регистрациягу дурну жу, 16-гу журналист, щябивкIру Минводылийнсса самолетрай. Самолетрай, журналистал бакъассагу, тамансса цаймигу пассажиртал бия.
— Ва рейс тIитIаврия инсантуран хъуннасса къулайшинна хьунни. МахIачкъалалия Минводылийн ияннин ттулва машиналий най, хъуннасса чIунгу харж шай, навагу авчIара, уххара. Ва ссал маша бакъар, ца кьини аьркинсса кIанайнгу ивну, махъунай зана хьун! ХIакьину самолетрайнсса билет на ласав 1800 къурушран. Хъуннасса хIаллихшинна дур агьалинан, — тIий ия Минводылийн левххун нанисса пассажир.
Журналистурал группалувух бия «Дагестан» РГВК-лул журналист ПатIимат Бурзиева. Уттигъаннугу Сочилий хьусса журналистурал форумрайн гьан аьркинссия ПатIимат, цинна дуллусса премия ласун. Тихуннайгу, шихуннайгу ххуллийх хъуннасса чIун харж хьун най дуну, давугу чIярусса душиврийн бувну ва къалавгунма ливчIун бия. Утти, вай рейсру цIудуккан дурсса кIул шайхту, хIайп тIий бия цилла наградалул хъирив цуппа гьанссиявхха тIий.
Аэропортрай зузисса оператортурангума кIулну дакъая вай рейсру тIиртIушиву, хъинну рязину бия, журналистурал миннул хIакъираву агьалинахьгу бусанссар тIий.
Ца ссятуксса хIаллава жу ливкру Минводылул аэропортрай. Шикку жу хьунабавкьунну щалва аьрххилий жун экскурсия буллантIисса гиднал. Минводылия Кисловодскалийн бияннин хьунабакьлакьисса шагьрурдал тарихрая, цинявппагу та аьрщарайсса дарувсса минерал щинал щаращая ва лагма-ялттусса зунттурдая тамашасса хаварду бувсуна экскурсоводнал.
ХьхьичIва-хьхьичI жу бувцунну Кисловодск шагьрулул ухссавнил чулийсса, бусалардавун багьсса, ккутIду муруллуйн, «Кольцо-гора» учай ванийн. Ва зунттуйн лавхъукун, хъатлий бивхьусса кунма чIалай бур Кисловодск шагьру. Ва зунттуйсса нухру бишлашисса мурчал дурсса нухрур тIий буслай бия экскурсовод. ЦIанакул та мурлу, хъякру дуну, нигьачIаву дуну бия. Бунугу, гьарца шиккун увкIма, нуххучIан лавхъун, суратру ришлай ия.
Ва пресс-турданийсса хъунмур экскурсия хьунни, Кисловодск шагьрулия арх бакъасса, Къарачай-Чаргаснал республикалийсса Красный Курган тIисса шяравусса «НицIал жюружанттайнсса» (Медовые водопады). Мунил лахъшиву 18 метралийн диллалисса дур. Ва дур щаращуя нанисса жюружани, цурдагу хъанай дур Аликоновка неххал ца къяртта. Бусласаврийн бувну, лагмасса ххяллаву вахIшисса найрдал мина диркIун дур. Гъараллу ларчIсса чIумал кIай найрдал дурсса ницI, гъарал дяххан дурну, жюружанттавух экьилагайсса диркIун дур, мунияту жюружанттал щингу нацIу шайсса дур.
Цамур бусалалийн бувну тIурча, вай жюружанттачIа гьан байсса бивкIун бур эшкьи-ччаву хьуминнал «ницIал барз».
ЦIанасса чIумал шиккун нех дирхьуну туристал най бия. Шиккун чIявусса туристал занай бухьувкун, тIивтIуну бия Къарачай-Чаргаснал халкьуннал багьу-бизулуву ишла дайсса хьхьичIарасса кьай-кьуй, лаххи-ликкия ккаккиялун дирхьусса музей. Та музейравусса чIяруми матахI дия жулва халкьунначIагу хьунадакьайсса. Мукунма шикку экскурсиялийн бувкIми бигьалагансса шартIру дузал дурну дия. «НицIал жюружантту» ххал дурну, лавай лахъайхту, хьунабакьлай бия фореллу гьузузисса хIавзру. Буслай бия вай фореллу ябуллай, вайннуя дукра дуллай буссар шиккувасса кафелуву тIий.
Шиккува бия экскурсиялийн бувкIминнан дакIний личIансса сувенирду дахлахисса хъун бакъасса ттучан. Маша бувну, ссайгъатру лавсун махъ, ттучандалий бахлахисса къуттакьяпри бивхьуну, варсив лавххун, дакIний личIансса суратругу рищарду. Жу хIаз бивзун, ттучанчи яла-ялагу вайгу ххал дувара тIий, жуйн лахханмур ларсун укIлай ия.
Аьрххилул яла тIааьнмур экскурсия чяй хIачIай къатлувунсса бия. Шикку ххуллулссаннан мякь лиххан бан дирзунна самоварду дия. НахIусса урттул чяй хIачIан бюхълай бия 300-нния лирчусса журардал мураппалухун. Жу махIаттал бувру, уттинин къаххалдурсса, лаччуя, ччикьрая, ттуккулнисирттая дурсса мураппалул. Вай цинярдагу журалул мураппалухун укра чяйгу хIарчIун, ххуй дирзмургу машан ласун бюхълай бия. Чяйлул къатлуву мукунна дахлай дия микссара журардал дарувсса уртту-щинну. ЧIаравмур къатлуву дия мукунна личIи-личIисса журардал мархха-ххатинну. КьатIурдай ппив хьуну най дия куннивух кув хIала дурхсса тIааьнсса мархха-ххатиндалул кьанкь.
Шиккувасса кафелуву чаргаснал халкьуннал дукрардащалсса авадансса ссупра тIивтIуну ялугьлай бия журналистал бучIаннин. Хъинну усттарну, нахIуну дурсса дукралухлу, ххуйсса хъамалушиндарахлу барчаллагь тIутIисса чагъарду чивчуну жугу кьабитарду.
Ва ца кьини жуща бювхъунни, марцIсса, чурххан бузсса гьава бусса, дарувсса щинну дусса курортирттал шагьрурдал караматсса тIабиаьтрая неъматгу лавсун, вава кьини шаппайн зана хьун. Ва, буниялагу, инсантуран чIярусса къулайшиннарду дусса рейс дур. Ца кьинилул мутталий курортирттал шагьрурдайн экскурсиягу бувну, махъунмай зана хьун ссал къабагьари.
Имара Саидова
