Инсан лихъачунайн кIура аллай ур къатта-къуш ялун ххявхсса чапхунчинал лекьа-пIякьу бувсса чIумал. Ва иш хъанай бур инсаннал оьрмулуву яла бала-апатIсса, банмур бухлавгсса. Лихъачулт­рал дурцIуну бур Европанал хIукуматру. КьюлтIсса зат ба­къар, вай иширттал дайдихьу най дур США-нал хIукуматрал чулуха.

Вайннал увкумур буллали_сса Европанал хIукуматирттал канай дур гана гай США-нал бувгьусса мурхьирдаясса «ахъул­сса». Бюхълайгу, хъанайгу бурчала тIий, США-нал хIукумат демократиялул законну дунияллийх ппив дуллай, паракьатсса хIукуматру «бугълул» хъирттарайх лахлай, ппив-ххив дуллай дур.
Таксса инсан, хъунисса хIукуматру хьуннав ца-ца чIумал муна-танал увкумур буллалиний, цанма хайрмур личIи къабуллай, чIярумур чIумал ххурххуппалувун багьай. Муна мукунсса иш бур утти Европанаву. Тайннан ххай бухьунссия архсса Африканал, Аьрабнал хIукуматру ппив-ххив дуллан цала кабакьлакьисса чIумал, га бала архнува личIансса. Таксса инсаннал дакIнивун, гьай-гьай, букъав­ххун къабикIанссар «хъинсса къелли» тIисса пикригума.
Шиккува ттун кIицI буван ччай бур, кказитирттай чичлай бур, дукIу Украиннаву хьу­сса ишру сававну, Аьрасатнавун ца миллиондалия ливчусса лихъачалт бувкIшиву. Вайнная бусайсса цучIав акъар. Буну тIий жулва инсантал дакIру тIиртIусса, чIаххуврал бакIрайн бивсса баларду цалва кунма кьамул бувайсса.
Дяъви, гьай-гьай, чув най бухьурчагу, баларду лавсун бучIайсса ишну хъанай бур. Амма паракьатну яхъана­хъисса инсантал тивил-хъивил буллалаву цукунчIавсса законнал ххуттавун буххайсса ишну къахъанахъир. Ливан, Ливия, Сирия, Иракь, Авгъанисттан ва цаймигу хIукуматру ппив-ххив дунни тайнна тай Европанаву­сса хIукуматирттая лехлахисса самолетирттал.
Ванихава лавхьхьусса иш хьуссар СССР лирсса чIумал. ХIатта га чIумал дяъвирду къа­бивкI­хьурчагу, чIявуми Аьрасатнал лагмасса хIукуматирттал инсантал «ччатIул хъирив» Аьра­сатнавун бувкIссар ва уттигу найнма буссар. Жулла лакрал районнайн букIлай бивкIунни корейцы.
Журу «кIялами», зу «лухIи­миру» тIутIаву кьаритан чIун дуркIун дур.
Тарив жулла дунияллий диркI­ссар, тIар, Атлантида тIи­сса инсаният. Га инсаният дур инсантурал цал хIасул дурну, яла, аькьлу-кIулши авадан шайхту, цалла духлаган дурну. Дунияллул хIукуматирттал цачIуну дузал буллан багьлагьисса ишру чIявусса бур. Учайхха «Дяъвирдал оьрчI къабайссарча, бувмургума бивчIайссар», куну.