На тачIав кказитрайн макьала чирчусса инсан акъара, амма Бархъаллал шяраву хьусса хъуннасса байрандалул на ххаригу, пашмангу унна.

На 1977 шинал МахIачкъа­лаллал художествалул комбинатрай зий уссияв художникну. Ттун ххуйну дакIний бур та чIумал директорну зузисса ла­ккучу Айгунов МахIаммад Аьбдуллаевичлул, цалла бакIрайн гьиву ларсун, шиннардий зий къабивкIсса Бархъаллал тIахIунттив дайсса цех зузи бан бувсса захIмат.

Цехрая дучIаймур дакъа, хайр бакъану тIий, хьхьичIвами директортурал тIахIунтту дай­сса цех лавкьуну бивкIссар. Директорну зий 3-4 барзвагу къавхьуна, Бархъаллал цехрал начальник Умалаев Сулайман занай, Айгунов М.А. хъунама, кумаг бувакьай тIий, нагу увцуну, бигьалагай кьини, цалва машиналий, цалчин нава директорнащал Бархъалав лавгсса чIун ттун дакIния къадуккай. Цехраву цаягу зузисса инсан акъая
ЧIамурдайгу, щявгу хьхьичIра дурсса 200-ксса тIахIни дия. ТIахIни ччуччайсса чара лащинну, заллу акъасса кунма бия. Директорнал Сулайманнухгу вичIидирхьуну, Зубайдатлухгу (ванал кулпат), цамур Ххадижат тIисса бугьарасса цIа дурксса зузалащалгу хьунаавкьуну, школалул директорнащал ва цайми шяраваллил халкьуннащал цех зузи баврия ихтилатругу бувну, жу шаппай зана хьуру.
Директорнал 1978 шинал пландалувун бувтуна, бакьингу бувну, керамикалул цех зузи бан. Яла жул зузалтрал коман­дировкарду гьарза хьуну, нагу цайминнащал мукьийла Бархъалав лавгссара, нормарду, расценкардугу дурну, шаппа зузисса хъамигу даврийн кьамул бувну, зун бивкIссар керамикалул цех. Директорнал цехрал начальникнал кумагчину кьамул увна Абакар тIисса художник (фамилия дакIний дакъар), даврих гъира бусса жагьил. Зузи бувну мукьах цехрал продукция даххансса кьутIирду «Росгалантерея», «Дагестан» ттучаннащал щаллу дурнугу, директор М. Айгунов Москавлийн лавгун, Кутузовский проспектрай «Русский сувенир» ттучандалущалгу кьутIи «о поставке керамических изделий» щаллу дурну, контейнердай тIайла дуккайссия. ЦIуну ивтсса художникнал хIарачатрайну ассортимент ххуй хьуна, амма брак чIярусса зана хъанан диркIуна. Зузалтрал захIмат зия хъанай, хIала дайсса чIумал аьрщараву ливчIсса известняк пIякьа тIий, хIадурсса тIахIнилия парчри багьлай бикIайва. Абакардул бувсуна, цехраву вибро сито. фильтро пресс бакъассаксса, вай захIматшивуртту дикIантIиссар куну. Айгуновлул Москавлия «НИИ народных художественных промыслов РФ» институт­рава пишакартал тIалав бувна Бархъарав. Вайннащал жугу бувцунав. КIива зурул дянив дуркIуна жучIан тIалав дурмур, дирхьуссия цехраву, гания шинмай бувсса захIмат зия къавхьуссар.
М. Айгуновлул сипталийну 1984 шинал Ленинградрай «Музей этнографии народов СССР»-дануву дурссар «Выставка Балхарской керамики». ЧIявусса усттартал дипломрайну, арцуйну барча бувссар. «Огонек» журналданий чIярусса Бархъалавсса суратру дуссия.
Комбинатрайсса экономистал, бухгалтертал, инженертал «вай ссан аьркинсса тIахIунттиври», «от них одни убытки комбинату» тIий бунува, Айгуновлул, цалва миллат ххирашиврул, ва аьрщарая дуллалисса кьай гьаз дуллай, Ленинградрай выставка тIитIлатIиний увкуну бия: «За любовь к родной земле, жителям села Балхар необходимо установить памятник» куну.
Выставка къуртал хьувкун музейрал директорнал Да­гъусттаннал Обкомрайн, Министерствалул советрал председательнайн барчаллагьрал чагъар бувкIссар, лавайсса даражалий выставка дузал дурсса МахIачкъалаллал художествалул комбинатрал директор М. Айгуновлун «Заслуженный работник культуры ДАССР» дулун куну (ва цIагу къадуллуссар).
Ахирданий, ва фестивальданул спонсор Расул Кьаландаровлухь барчаллагьгу тIий ва ххаллилсса даврихлу, учивияв – тачIав жула чIарав захIматний бавцIусса чиваркI хъамабитан къаххуйссар, амма фестивальданий М. Айгуновлул цIа къарирщусса ттунма кIул шайхту, ттун хъинну къаччан бивкIуна. Укунсса миллатрал патриотътал жулва дянив чIяву баннав, цIуллушиву дулуннав.
1977-1986-ку шиннардий Комбинатрал художникну ивкIсса С. А. МахIаммадов