Ларгсса нюжмардий, октябрьданул 8-9-нний, Москавуллал ХIукуматрал ва Дагъусттан Республикалул уртакьшиврийсса кьутIилул лагрулий, хьунни Москавуллал Кьинирду Дагъусттаннай. Республикалул хъуншагьрулий ва уттигъанну бюхттулсса юбилей кIицI ларгсса Дарбантлив хьунни личIи-личIисса батIавуртту, хьунабакьавуртту.

Бадрижамал Аьлиева
Дагъусттаннайн бувкIун бия биялсса делегация. Муний каялувшиву дуллай ия Москавуллал ХIукуматрал министр, Москавуллал шагьрулул Культуралул департаментрал бакIчи Александр Кибовский.
Дайдихьу хьуна МахIачкъа­лалив Лениннул Комсомолданул паркравусса Аьраличунал гьайкалданучIа ва Оьрус­нал театрданучIасса Расул ХIамзатовлул гьайкалданучIа тIутIив дишаврийну.
Му давривух гьуртту хьунни Дагъусттан Республикалул ХIукуматрал председательнал цалчинма хъиривчу Анатолий Карибов, ДР-лул миллатирттал политикалул министр Татьяна Гамалей, ДР-лул культуралул министрнал цалчинма хъиривчу Муслим Телякавов, Дагъусттаннал Чичултрал союзрал председатель МахIаммад АхIмадов ва цаймигу.
Шикку махъ лахълай, Александр Кибовскийл чIурчIав дурунни жулла паччахIлугърал хъуншагьрулул ва билаятрал регионнал дянивсса дахIавуртту цIакь дуллалаву ца агьамсса ишну хъанахъишиврий.
— Ванил кумаг буллалиссар хъинну аьркинсса аьрххирду, ххуллурду буклан ва ми культуралул программалийну цIакь буллан, — увкунни мунал.
Мура кьини Оьруснал театрданул Хъунмур залдануву хьу­сса концертрал программалийн бувкIун бия чIявусса къуллугъчитал, Республикалул БакIчи Рамазан АьбдуллатIиповлуя тIайла хьуну. Мунал цIанияту махъгу лавхъун, цинявппа барча бувна ДР-лул ХIукуматрал председатель Аьбдуссамад ХIамидовлул:
— Хъунмасса пахрур жун рес­публикалий билаятрал хъуншагьрулиясса хъамал кьамул буллалаву, миннащал культуралул аралувусса даврил кIулшивуртту кIидачIлачIаву. Культура хъанахъиссар инсантал кувнначIан кув гъан буллалисса ламуну. Дагъусттаннайсса Москавуллал Кьинирдал хъиннура цIакь дуллалиссар жулла дянивсса дусшиврул арарду…
ХIакьину Москав хъанай бур Аьрасатнал регионнаву ца яла хьхьичIунмурну. Хъинну тIааьнну бур регионнал дянив­сса уртакьшиврийсса зузаврих Москавуллал каялувшиндарал чулухасса къулагъас, аьмсса тарихрал ва культуралул ирсирахсса хIурмат чIалай, — увкунни ванал. Ваналва бувсунни ноябрьданий Москавлий хьунтIишиву Дагъусттаннал Кьинирду. Баян бувна, Республикалул БакIчинал хIукмулийн бувну, Александр Кибовскийн дуллушиву «Дагъусттан Республикалул культуралул лайкь хьусса зузала» тIисса бусравсса цIа.
Хъирив Александр Кибовскийл бувккунни Москавуллал мэр Сергей Собяниннул чулуха­сса барча буллалисса ххару:
— ХIурмат бусса Рамазан ХIажимурадович! Ххирасса дус­тал! Жулла регионну кувннищал кув дархIуну дур ччянирасса дусшиврул ва уртакьшиврул арардайну. Москавуллал Кьинирду хъамал ххирасса Дагъусттаннал аьрщарай дуллалавугу хъанахъи­ссар жулла дянивсса хъинсса арардал ца чIалачIинну. ЧIа тIий ура вин ва Дагъусттаннал агьалинан цIакьсса цIуллу-сагъшиву, буллугъшиву, республика цIулаган дуллалисса захIматраву цIу-цIусса хьхьичIуннайшивуртту.
Хъирив оьруснал халкьуннал балайрдайну концерт дайдирхьуна РСФСР-данул лайкь хьусса артистка, РСФСР-данул халкьуннал артистка Людмила Рюминал ва «РУСЫ» ансамбльданул. Ва кьини сахIналийн бувккуна «Новая опера» (Тенора 21 века) театрданул солистал, дунияллийх цIа дурксса музыкант ва балайчи, цалла тарихийсса ватандалийн цал ххишала ияврия ххарисса Марио Аьли Дюранд Сутуев ва Георгий Фараджев, машгьур­сса балайчи Евгений Кунгуров, группа «Республика» ва цаймигу. Укунманий хъатру рищун курчIил хъанахъисса жулва тамашачитал ва хьхьуну мяш бакъа хъатру ришлай бия. Хъатурдищал архIал цинявннал цал архIал гьаваллавун гьаз буллалисса ттугърдалгу цирив ца ляличIишиву, караматшиву ххи дуллай дия ва хьхьуну­сса шадлугърай. «Дни Москвы в Дагестане» тIий чивчусса ттугъру концертрайн най Оьруснал театрданул жанахIравун увххун нанисса гьарцаннахьхьун буллай бавцIуну бия жагьилтал. Ххишала дакъа гъилисса, дакIнийхтунусса хьунни ва хьхьунусса шадлугъ. Язисса бия билаятрал хъуншагьрулиясса хъамаллурал программалул гьарцагу номер, ми лайкь-я гьарцаннуй цайва-цайва бавцIуну, цаятува личIи-личIину бусан.
Ва кьини концертрайн ва муния наними кIул хьунни театрдануву тIиртIусса «Москва праздничная» фотовыставкалущалгу.
Концертрая махъ Рамазан АьбдуллатIипов ва Аьбдуссамад ХIамидов гъан хьунни артистуращал яхши-хаш буван.
Дагъусттаннайсса Москавуллал Кьинирдай Москав­лиясса делегация бивунни Изобразительный искусствардал музейравун, Шеърилугърал театрданувун (Театр поэзии).
Поэзиялулмур театрдануву хьусса ихтилатраву А. Кибовскийл чIурчIав дунни Да­гъусттаннай укунсса идарартту тIитIлатIаврия цува хъинну ххарину ушиврий, му иш щалвагу билаятрай поэзиялухсса бургаву ларай хъанахъаврил ца лишанну душиврий.
Республикалул хIурмат лавайсса хъамал бивунни билаятрал ца хьхьичIавамур шагьрулун ккаллийсса Дарбантливгу. Микку ми хьунабавкьунни шагьрулул бакIчи Азади РахIимовлущал, гьуртту хьунни личIи-личIисса темардайн багьайсса «ккуркки» столлавух, бивунни Нарин-Къалалийн, I Петрдул къатлувун ва цаймигу тарихийсса гьайкаллачIан, хьунни чIярусса хьунабакьавуртту ва дакIнийхтунусса ихтилатру.
Дагъусттаннайсса Москавуллал Кьинирду хьунни лавайсса даражалий, миннуя рязину лавгунни хъамалгу, рязину ливчIунни республикалиймигу. Утти ялугьланну ноябрьданий Москавлив хьунтIисса Дагъусттанналми Кьинирдах.