БувкIун бия шиккун, байрандалун лархьхьуну чIюлусса яннардугу ларххун, Къизлардал щалла райондалиясса агьали ва бусравсса хъамал. Байран дуллалисса гьантрай чан къавхьунни балайлул ва музыкалул чIурду. Мяйжаннугу, цумур-духьурчангу байран чIюлу дай балайчитурал ва къавтIалтрал.
Шиккугу сахIналия чан къавхьунни бацIаву дакъа балай тIутIисса, къавтIутIисса Дагъус­ттаннал эстрадалул балайчитал, личIи-личIисса миллатирттал ансамбльлу. КЭМЗ-рал дворецраву хIасул дурну дия дуки-хIачIиялул ва цаймигу выставкарду.

Ларгсса нюжмардий, октябрь зурул цалчинсса гьантрай,
Къизлардал шагьрулун 280 шин шаврин хас дурсса шадлугъру хьунни Къизлардал
шагьрулул дянивсса стадиондалий ва «Концерн КЭМЗ» -рал дворецраву.

И. Саидова
Юбилейращал Къизлардал шагьрулул агьали барча буван бувкIун бия ДР-лул ХIукуматрал председатель Аьбдуссамад ХIамидов бакIчисса делегация. Миннавух бия ДР-лул Халкьуннал Мажлисрал комитетрал пред­седатель ЖахIпарбаг Шамхалов, Да­гъусттаннал Ухссавнил территориал округрайсса полпред Вячеслав Паламарчук, МахIачкъалаллал ва Грозный шагьрулул епископ Варлаам, МахIачкъала шагьрулул мэрнал бигарду чIумуйнусса щаллу буллалисса Муса Мусаев, ДР-лул информациялул ва печатьрал министр Азнаур Аджиев, ДР-лул жагьилтурал политикалул министр Заур Кьурбанов ва цаймигу.
Мукунма юбилейращал шагьрулул агьали барча бан бувкIун бия Къизлардащал уссушиврий­сса ххювагу шагьрулул вакилтал.
Байрандалийн бувкIсса хъамал ва Къизлардал шагьрулул, райондалул агьали барча буллалисса ихтилат бувна Къизлардал шагьрулул бакIчи Александр Шуваловлул.
— ХьхьичIва-хьхьичI дакI­нийх­­туну барчаллагь учин ччай ура Къизлардал шагьрулул юбилей лавайсса даражалий кIицI лагансса хIукму бувсса ДР-лул Президент Рамазан АьвдуллатIиповлухь. Мукунма барчаллагь тIий ура юби­лей хьунадакьинсса давурттаха зузисса комитет сакин бувсса ДР-лул ХIукуматрал Председатель Аьвдуссамад ХIамидовлухь. Гьашинусса шин цурдагу дур агьамсса юбилейртту хьунадакьлакьисса. Лавайсса даражалий щалвагу билаятрай кIицI ларгунни Ххувшаврил 70 шинал юбилей, мунил хъирив лахъа-хъунну тIайла дуккарду Дарбант шагьрулул 2000 шинал юбилей. Утти хьунадакьлай буру Къизлардал шагьрулул юбилейгу. ДакIнийхтуну ва чаннасса, ххарисса кьини цинявппагу барча буллай, чIа тIий ура дунияллий дакьаву, чIяру-чIярусса хъиншивуртту! Жулла аьрщарай мудангу яхьуннав халкьуннал дянивсса дусшиву, нахIу-хIалимшиву, – увкуна Александр Шуваловлул.
Рамазан АьбдуллатIиповлул чулухасса барча баврил адрес дур­ккуна Аьвдуссамад ХIа­ми­довлул:
— ХIурмат лавайсса Къизлардал жямат! ДакIнийхтуну барча буллай ура Къизлардал шагьрулун гьану бивзун 280 шин шаврин хас дурсса юбилейращал. Къизлардал шагьрулул тарих цIакьну бавхIуну буссар Аьрасатнал билаятрал тарихрацIун. 1735 шинал Петр1-нал аманатрайн бувну, Аьрасатнал Баргъбу­ккавал билаятращал дахIаву дуллалисса бувагу ца ххуллу буну, микку буллай байбивхьуссар цIусса дазуйсса къала. Яла гихунмай ва хъун ба­къасса шагьру хьуссар Аьрасатнал, Ккавкказнал, Баргъбуккавал билаятирттал агьали цачIун буллалисса, машлул-промышленностьрал ва культуралул ва рувхIанийшиврул центрну. Шиккур бувсса региондалий цалчинсса гарнизондалулсса, къазахънал ва мукунма Ухссавнил Ккавкказнаву цалчинсса оьрус школарду. Ялагу Къизлардал шагьру тарихравун бувхссар машгьур­сса оьруснал чичултрал Толстойл, Лермонтовлул ва мукунма цайми-цайминналгу творчествалуву хъунмасса кIану бувгьусса шагьруну. Ва шагьрулийри дайдирхьусса бусалардавун агьсса военачальник Петр Багратионнул тарихравун дагьсса цалчинсса талатавугу.
Хъун дяъвилуву Къизлардал агьалинал дурсса чувшивурттал хъунмасса бияла буссар. Тай шиннардий душманная Ватан дуруччин Къизлар шагьрулия 14 азарунния ливчусса инсантал лавгссар. Миннаватугу 11 азара инсаннал Ватан дуручлай жанну дуллуссар. Миннал цIардугу чирчуну дуссар шагьрулул дянив дирхьусса мемориалданий. Дяъвилий гьуртту хьусса 5000-хъул лайкь хьуну бур аьралий наградарттан, 8-ннан дуллуну дур Совет Союзрал Виричунал цIа. Дяъвилия махъсса шиннардийгу Къизлардал агьалинал ччаннай дацIан дурну дур шяраваллил хозяйство, буллай байбивхьуну бур цIу-цIусса заводру. Тания шихунмай хIакьинусса кьинигу, дунияллийх машгьур хьуну, зий бур Къизлардал коньяк­ру дайсса завод.
1980 шинал Къизлар респуб­ликалий «Знак Почета» тIи­сса ордендалун лайкь хьусса цалчинсса шагьруну ккаллину бивкIссар. ЧIяву миллатру ялапар хъанахъисса Къизлардал агьалинал лайкьну дурурччуссар цала дянивсса уссушиврийсса арарду. Миннал дянив питна бутан къавхьуссар 1996 шинал ххярхсса къачагътурал кьюкьращагу.
ХIакьинусса кьини Къизлардал шагьру хъанахъиссар Ух­ссавнил Дагъусттаннайсса ца яла хъуннамур промышленностьрал центрну. Вайннал хIарачатрайну шикку хъинну хьхьичIунмай хъанай бур экономикалул, культуралул ва интеллектуал потенциал. Республикалий шяраваллал хозяйстварттал комплексру хьхьичIунмай бавривугу Къизлардал шагьру хьхьичIххуттай буссар.
Дуллалимуниву тIайлабацIу хьуннав, Къизлардал аьрщарай барачат ликканнав, агьалинахьхьун цIуллушиву дулуннав! – укун чивчуну бия Республикалул БакIчинал чулухасса барча баврил адресрай.
ХIакьинусса кьини Къизлар­дал шагьру хъанай бур Ух­ссавнил Дагъусттаннайсса промышленностьрал ва культуралул центрнугу. Къизлардал шагьрулий­сса заводирттай итадакьлай бур щалвагу билаятрай ишласса продукция. ОАО «Концерн КЭМЗ», ОАО «КЭАЗ», ГУП «Кизлярский коньячный завод», ОАО «Кизлярагрокомплекс» ва цаймигу предприятияртту машгьурну дур, республикалий дакъассагу, щалвагу билаятрай.
Ихтилатру бувну махъ байбивхьунни хьхьичIунсса зузалтран ПаччахIлугърал наградартту, бахшишру дуллалисса мажлис.
ДР-лул каялувчитурал Къизлардал шагьрулун бахшишран буллунни шанма ххаллилсса автобус.
Къизлар шагьрулул ва райондалул учительтуран ДР-лул Жагьилтурал политикалул министерствалул чулухасса ХIурматрал грамотартту дуллунни Заур Кьурбановлул.
Хъирив дайдирхьуна юибейран хас дурсса концертрал прог­рамма.
Концертрал сий гьаз дунни Дунияллул халкьуннал аьдатирттал ва культуралул «Цамаури» фестивальданул.
Ахирданий шагьрулул юбилейрал шадлугъ къуртал дуруна фейерверкрайну. Къизлардал агьалинал байран хъиривмур кьинигу дуллайнма бия.