Август зурул 27-нний Гъумучиял клубраву хьунни цIусса дуккаврил шинан хас дурсса кIулшиву дулаврил зузалтрал августовское совещание.

Муний гьуртту хьунни райондалул бакIдургьуми, ДР-лул зунттал территориал округрал зузалт: Амирхан МахIаммаддадаев, МахIаммад МахIаммадов, Оьмари Аьлиев; ДР-лул КIулшиву дулаврил ва элмулул министерствалул ялун ххисса кIулшиву дулаврил управлениялул каялувчинал хъиривчу Ирина ХIабибуллаева; ДР-лул наркоконтрольданул Лаващиял райондалийсса къуллугърал Лакрал ва Ккуллал районнал даврил ялув авцIусса зузала Казим ХIажимахIаммадов.
Зулайхат Тахакьаева
Совещание тIитIлай, райондалул бакIчи Юсуп МахIаммадовлул, цIакь хьусса аьдатрайн бувну, аьпагу куну, дакIнийн бивчуна ларгсса дуккаврил шинаву жуява яла лавгсса учительтал: Аьшаев Исрапил, Хъунайннал школалул директор; Мудунов Абакар, ГьунчIукьатIрал школалул учитель, Хъун дяъвилул ветеран; Гъужиева Аймисай, Ккурккуллал школалул учительница; Амаев Амир, аьлимчу, СССР-данул ПаччахIлугърал премиярттал лауреат.
Муния махъ цалва ихтилатраву райондалул бакIчинал кIицI лавгуна Республикалул БакIчи Рамазан АьбдуллатIиповлул ДР-лул Халкьуннал Мажлисрайнсса Рисалалуву кIицI лавгшиву республикалул ялун бучIантIимунилгу, жяматрал иш бачаврилгу хъунмур бияла хъун хъанахъисса никирал кIунттихь бушиву – цуксса диял хьусса дурив му ник кIулшивуртталгу, рувхIанийшиврулгу, мяърипатралгу, мунин лавхьхьусса шайшиву обществалул тIайлабацIугу.
«Ва залдануву щябивкIун бур райондалул ялун бучIантIимур цал кIунттихь бусса агьлу. Ххарира зул дянив чIявуми, жула хъун хъана­хъисса никирал ялун бучIантIимунил буруккинттарай, давриву дакI дирхьуну зий бушиврия.
ЧIаланну ххуй хьунни жучIара ЕГЭ-рдал хIасиллу – жущава чансса бухьурчагу хьунни оьрчIру ЕГЭ дулаврийн психологически хIадур бан.
Мунищалва архIал жула бакI цIуцIи бансса буруккин бур 16-хъул оьрчIру аттестатру къалавсунма личIаву. ЧIявусса школарттай оьрчIащал багьайкун зий бакъашиврийнур укунсса тагьар хIасул хьусса. ОьрчIру экзаменнайн хIадур баншиврул, чIявусса нитти-буттахъан багьунни, хъуни-хъунисса харжругу буккан бувну, шагьрурдайсса репетитортурайн буккан. Му цукунчIав битан къабучIисса ишри. Жулла район оьрчIру чаншиврул чулуха республикалий 2-мур кIанттай дур, БежтIиял участокрал хъирив. ЖучIава ца учительнан иллай ур 3, 2 дуклаки оьрчI, 90 % оьрчIал отличниктал бан бюхъанссар вай шартIирдаву. Жува вардиш хьуну буру жулва-жулвами хIуччарду исват буллан, хаснува харжру булун чIал хьурча ягу дарсру кьукьирча, амма жулвами буржирдаяту хъамава битлай бур.
Республикалийссагу, щалва билаятрайссагу тагьар жунна цинявннан чIалачIисса дур. Му тагьарданухгу къабурувгун, каширдугу ляркъуну, райондалий бувгьуну буру ялун ххисса кIулшиву дулаврил 3 идара. ЧIярусса районнай вай идарартту бувгьуну буссар нитти-буттахъая датIлатIисса арцух, жучIара тIурча цурда ца къуруш нитти-буттая къадатIлатIиссар, миннал кулпатирттал ахIвалгу хIисавравун лавсун, жулва оьрчIру итххявхсса шаву мурадрай», — увкуна Юсуп МахIаммадовлул. АвцIуна вай идарарттал давривусса диялдакъашивурттайгу.
Хъирив райондалул кIулшиву дулаврил управлениялул каялувчи Явсупи ХIамзаевлул гьарза-гьартасса доклад бувуна ларгсса дуккаврил шинал хIасиллая ва ялун нанисса дуккаврил шинаву хьхьичI бихьлахьисса мурадирттая.
«Просвещенный Дагес­тан» тIисса ДР-лул БакIчинал хьхьичIун­сса проектирдал лагрулуву райондалул кIулшиву дулаврил идарартту зий бур вай ххуллурдайх: «Языки народов Дагестана», «Англоязычный Дагестан», «Ислам и просвещение», «Спортивный Дагестан». Вай проектирдал пландалуву школарттай сакин дурну дуссар лакку мазрал ва ингилис мазрал сий ларай дансса давуртту: олимпиадартту, семинарду, тIиртIусса дарсру, сочинениярттал ва назмурду дакIних дуккаврил конкурсру ва цаймигу. Амма мунищалва архIал, Хъурхърал, Ххюлуссуннал, Щардал, Карашрал ва цаппарасса цаймигу школарттай биялну бакъар кьатIаллил билаятирттал мазурдил дарсру дишайсса учительтал. Вай школарттал каялувчитуран багьлай бур ва масъалалул ялув бунияла бакI цIуцIаву дан, цанчирча 2020 шиная тиннай кьатIаллил билаятирттал мазурдил ЕГЭ чара бакъа дулун аьркинсса экзаменнал сияхIравун дутлай бур», — увкунни ванал.

Детсадирттая

Аьрасатнал Президентнал Указрайн бувну, жунма багьлай бур школалийн гьан бувасса оьрмулул (3-7 шин) оьрчIан оьрчIал багъирдавун занансса 100 % дузалшин дан. Му масъала жулла райондалий бигьану щаллу шайсса бакъар. Райондалий, къутандалий ялапар хъанахъи­сса оьрчIругу хIисав бувну, ва шинал январь зурул 1-ннийн ЦСУ-лул сияхIрай ур 1115 оьрчI (1-7 шинал оьрмулувусса). Вайксса оьрчIан щалва райондалий зий бур бувагу ца детсад, 120 оьрчIансса. Миккун занай бур 80 % Гъумук ялапар хъанахъисса оьрчIал. Райондалул администрациялул лявкъунни ва тагьар ххуй дансса чаран – цIанакул байбивхьуну буссар Гъумучиял байбихьулул школалул къатри гьарта-гьарза дуллай, гиву ва шинал ахирданийннин бантIиссар 60 оьрчIансса кIану. Шикку гъансса шяраваллавасса (Хьурттал, ШавкIуллал, ГьунчIукьатIрал) оьрчIру школалийн хIадур байсса группарду тIитIин дакIний буссару..
КIулшиву дулаврил ва тарбиялул даву цIудаврил ва даража лахъ баврил ялув Гъумучиял детсадрал педагогтурал ва тарбиячитурал хъуннасса къулагъас дуллай бухьурчагу, ттизаманнул педагогикалул технологияртту ишла давриву миннал пишакаршиву лагьсса душиврий чIурчIав дуллай, ларгсса шинал хъунмурну бивтсса Лиана Муртузааьлиевайн тапшур бунни оьрчIал цIуллушиву цIакь дансса, педагогтурал даврил даража ххуй бансса шартIру дузал дан.

Байбихьулул школартту зий буссар ФГОС-рай

«Об образовании в РФ» федерал закондалуву хьусса дахханашинна дур байбихьулул школалул ФГОС (Федеральные государственные обязательные стандарты). Му райондалий щаллуну зий дуссия байбихьулул школалий. 1-4-ми классир­ттал дуклаки оьрчIру цинявппагу дузал бувну бур уквасса луттирдал. Байбихьулул классирттал 7 учительнал бувккуну бур пишакаршиву ларай дайсса курсру. Гьашину ФГОС-райн бучIан тIий бусса бур 5-ми классругу. КьутIирдугу чирчуну, тIалав бувну бусса бур луттирду.

Чансса оьрчIру дуклакисса школарттая

ФГОС-райн бучIаврищал ва кIулшиву дулаврил оборудование цIудаврищал райондалун агьамсса буруккиннува личIлай бур чан­сса оьрчIру заназисса школартту. Райондалий мукунсса школа бур 8. Миннува 6 – байбихьулул школа, Хъунайннал ООШ ва Ххюлу­ссуннал СОШ. Вай школарттай ца учительнан иллай усса ур 3, 4 дуклаки оьрчI.
Ларгсса шиналсса докладраву на бувсъссия, ДР-лул КIулшиву дулаврил ва элмулул министерствалул дурсса анализрайн бувну, дуклаки оьрчIал аьдад чансса районнан хъунмасса харж буклай бушиву. Масалдаран, вай школарттай ца дуклаки оьрчIал дуккаврин харж хъанай дур 100 азарунния лирчусса къурушру. Вай школарттал кIулшиву дулаврил ва тарбиялул даврий ларгсса шинал критика дурну дунурагу, гьашинугу, ялтту бувккукун, вара тагьар аьлтту хьунни. КIулшиву дулаврил даража мунин буккан буллалисса харжиран лавхьхьусса бакъар. Зулва кIулшиву дулаврил идарартту ябан ччай бухьурча, школарттал каялувчитуран багьлай бур кIулшиву дулаврил ва тарбиялул даража лахъ буллан.

ЕГЭ-рдал хIасиллу

ЕГЭ-лийн хIадур баврил ва му дулаврил ялув кIулшиву дулаврил управлениялулгу, школарттал каялувчитуралгу хъуннасса даву дурссар. Райондалул бакIчи Юсуп МахIаммадов цува уссия ЕГЭ-рдайн хIадур баврил ялув авцIуну шинал лажиндарай. ЧIярусса хьунабакьавуртту дурссар 9-11-ми классирттал дуклаки оьрчIащал, учительтуращал ва нитти-буттахъащал. Цинявппагу школарттай сакин дурну дуссия пробныйсса ЕГЭ-рду ва ГИА-рду. Мунийну бювхъунни жуща цасса экзамен ккалли бансса гъалатIругу итакъабавкьуну, низамгу лиян къадурну сакин дан.
2015 шинал ГИА ОГЭ-рал кьяйдалий дуллуссар 118 дуклаки оьрчIал. Вайннава оьрус мазрал экзамен дуллуссар 100 %, математикалул экзамен дуллунни 97, 5 % (яни 4 дуклаки оьрчIал — 2 Гъумучиял, ца Ххюлуссуннал ва ца Щардал школардал дуклаки оьрчIал лавсун бур «2»). Вайннавасса кIинналлив кIилчин дуллалийни экзамен ххуйну дуллуну дур.
ЕГЭ дуллуну дур 87 выпускникнал. Оьрус мазрал экзамендалул дянивсса балл (49,6) лавсун бур 95, 4 % дуклаки оьрчIал, математикалул экзамен дуллуну дур 82% дуклаки оьрчIал. ЕГЭ-рдал хIасиллайн бувну, 16 оьрчI ливчIун ур школа къуртал бувшиврул аттестатру къалавсун.
Щардал школалул выпускниктурал цинявннал лавсун бур аттестатру.
Вай хIасиллал буслай бур жухьва жулва оьрчIал кIулшивурттал даражалия.
Цинявппагу педколлективрдайн тапшур бунни учительтурал батIавурттай ЕГЭ-рдал хIасиллу ххалдиргьуну, дуклаки оьрчIал кIулшивурттал даража лахъ бансса давуртту дуллан.

Гьунар бусса оьрчIащалсса даву

УО-лул хъуннасса къулагъас ялагу дуллай бур гьунар бусса оьрчIру ялун личин баврин кабакьулун 2014-2016 шиннардий дан ккаккан дурсса муниципал программалух. Гьунар бусса оьрчIру ялун личин бан бюхълай бур олимпиадарттал ва конкурсирдал кьяйдалий.
Ларгсса дуккаврил шинал райондалий хьуну дур 17 дарсирал олимпиада. Миннуй гьуртту хьуну ур 570 дуклаки оьрчI, миннавагу ххув хьуну ур 31, 43-ннал бувгьуну бур хьхьичIунсса кIанттурду.
Гъумучиял лицейрал 9-мур класс­рал дуклаки душ Макаева Аймисайл (каялувчи ХIасанова Асият) «Шаг в будущее» тIисса республикалул элмийсса конференциялий бувгьуну бур 3-мур кIану, чIава ахттарчитурал конкурсрайгу бувгьуну бур 2-мур кIану.
«Талантливая молодежь» номинациялуву Аьрасатнал Президентнал грантран лайкь хьуну бур Хъурхърал школалул 11-мур классрал дуклаки душ Хизиева Къисттаман, ниттил мазрал литературалул олимпиадалий 1-мур кIану бувгьуну, ва Гъумучиял оьрчIал магьирлугърал школалул дуклаки душ Абакарова Сабина, 2014 шинал «Очаг мой – родной Дагестан» республикалул конкурсрай Ватандалухасса балайлул номинациялуву 1-мур, Ккавкказуллал къавтIаврил номинациялуву 2-мур кIану бувгьуну.

Учительтурал пишакаршиву ларай даву

Ларгсса дуккаврил шинал учительтурал пишакаршиву лахъ дансса курсру бувккуну бур 53 учительнал.
Февраль зуруй хьусса «Лучший учитель родного языка» республикалул конкурсрай лакку мазрал учительтурал дянив 1-мур кIану бувгьуну, «ДР-лул КIулшиву дулаврил отличник» цIанин лайкь хьуссар ГьунчIукьатIрал школалул учительница Кьурбанова Бадрижат.
Мартрай хьусса «Лучший учитель года – 2015» конкурсрай 3-мур кIану бувгьуссар Гъумучиял лицейрал биологиялул учительница ХIасанова Асиятлул. Конкурс лявхъуния шихунмай 25 шинал лажиндарай Асият Абумуслимовнайн бияннин Лакрал райондалия хьхьичIунсса кIану щилчIав бувгьуну бакъар.
Ххувшаврил 70 шин шаврил юбилейран хасну ДР-лул КIулшиву дулаврил ва элмулул министерствалул баян бувсса «В зеркале истории 70-летие Победы ВОВ» конкурсраву Ккурккуллал школалул директор Даниял Магьдиевлул ахттаршинна дурсса даву лайкь хьуну дур 2-мур даражалул дипломран, «Растим патриотов» тIисса конкурсрайгу ванал даву лайкь хьуну дур 3-мур кIану бугьан.

Низам дуруччаврил даву

Тарбиялул давриву агьамсса кIану бугьлай бур балугъравун къабивсса оьрчIал дянив низам дуру­ччаву мурадрайсса ва наркотикругу, экстремизмалул пикрирдугу ппив хьун къабитаву мурадрайсса даву.
2014-2015 дуккаврил шинал райондалий хьуну бакъар балугъравун къабивминнал тIулдакъашиву дурсса цавагу иш. Бухьурчагу, учительтуран дуклаки оьрчIая я хIура бан бакъассар, наркомания ва экстремизм ппив хьун къаритансса профилактикалул давуртту чялиш дуллан аьркинссар.

ЦIуллусса оьрмулухлу

«Спортивный Дагестан» подпроектрал ца агьамсса ххуллуну ккаклай бур дуклаки оьрчIал цIуллушиву цIакь дансса давуртту дуккаврил идарарттай чялиш даву. Му чулухуннайгу райондалул УО-лул дуллай бур цин лархьхьусса давуртту. Аьдатравун дагьну дур сайки 90 % дуклаки оьрчIал гьуртту шайсса «Президентские состязания», УО-лул кубокрансса футболданул турнир, волейболданул ва лачIунбуккаврил турнирду.
Райондалул администрациялул ляхълай бур агьали спортрахун бичинсса шартIру дузал дансса чаранну. Гъумучиял паркраву буллай бур оборудованиялул дузалсса спортрал майдан. Гъумучиял ва ГьунчIукьатIрал школартту бивчуну буссар оборудованиялул дузалсса спортрал майданну бансса КIулшиву дулаврил министерствалул программалувун.

Ялун ххисса кIулшиву дулаврил даву

Райондалий зий бур ялун ххисса кIулшиву дулайсса 3 идара: Гъумучиял оьрчIал магьирлугърал школа, ОьрчIал творчествалул къатта, ДЮСШ. Мивун занай бур 550-нния ливчусса дуклаки оьрчIру. ОьрчIал творчествалул къатлуву зий дур 140 оьрчI заназисса сайки 20-нияр ххисса кружокру. Шинал лажиндарай шикку хьунни личIи-личIисса конкурсру, выставка-ярмаркарду, кружокирттал ккураннал каялувчитал гьуртту хьунни республикалул конкурсирдай.
Исяева Гуламаннул каялувшиннаралу «Моя малая родина: природа, культура и этнос» конкурсрай М. Жалаевлул бувгьуну бур 2-мур кIану, ванилла каялувшиннаралу М. Маммаевлулгу бувгьуну бур 2-мур кIану щин рутIайсса машина баврихлу. Лув-ялув шамилчинсса шинни Исяева Гуламаннул тарбия буллалисса оьрчIал республикалул конкурсирдай хьхьичIунсса кIанттурду бугьлай.
Му бакъассагу, 2-сса кIантту бувгьуну бур Акаева Залиххал ва Парамазова ПатIиматлул хIадур бувсса А. Аьшуевал, З. Аьлиевал ва А. Будайчиевал.
Гъумучиял магьирлугърал школалий зий дур 5 отделение. Миккун занай ур 135 дуклаки оьрчI. Школалул дуклаки оьрчIру гьармудан гьуртту шайссар райондалий хъанахъисса гьарцагу магьирлугърал мероприятиялий. Чялишну гьуртту шайссар республикалул конкурсирдайгу. 2014 шинал КIулшиву дулаврил ва элмулул министерствалул баян бувсса ялун ххисса кIулшиву дулаврил идарарттал дянивсса конкурсрай Гъумучиял магьирлугърал школалул бувгьуну бур 1-мур кIану. 2015 шинал тIурча школалул дур­ххуссар ДР-лул БакIчинал грант (100 азарда къ.).
Ялун ххисса кIулшиву дулаврил программалийн бувну, физкультуралул ва спортрал давурттаха зий бур ДЮСШ – оьрчIал ва чIаважагьилтурал спортшкола. Ва школалул сипталийну шинал лажиндарай райондалий сакин бунни тамансса бяст-ччаллу: волейболданул, лачIунбуккаврил, теннисрал, цIубуклай бур хъаннил волейбол. Ларайсса сакиншиннарай дунни къуллугърал буржру биттур буллай ливтIусса низам дуруччай органнал зузалтрал аьпалун хас дурсса, ряхра райондалиясса спортсментал гьурттусса, лачIун буккаврил турнир. Ляхълай буру бокс хьхьичIунмай бансса чараннугу.
Хъун хъанахъисса никираву спортрахсса гъира ва ччаву цIакь дан хъунмасса бияла буссар миннал тренертурахьгу. Масалдаран, ласунну ЧIурттащиял школалул физкультуралул учитель МахIаммадов Сергей. Школалий увагу дуклай уссар 12 оьрчI. 6-8-ми классирттал дуклаки оьрчIая сакин хьусса волейболданул командалул дух дайссар Гъумучиял ва КIундиннал школарттал хъунисса оьрчIал командартту. БувчIлай бур, гьарца школалий дакъар оьрчIру спорт­рахун машхул бансса шартIру. Амма волейболданий буклан цукунчIавсса шартIру къааьркинссар.

Вай гьарцагу бутIуву Явсупи ХIамзаевлул хьхьичIуннай­шивурттащал архIал кIицI ларгуна диялдакъашивурттугу.
Гихунмай КIундиннал школалул директорнал тарбиялул даврилсса буллалисса хъиривчу Жасмира Ибрагьимовал бувсуна цалва школалий ФГОС-рал тIалавшиннардацIун бавкьуну, дуккаврил кьатIувсса даву сакин даврия, мунил опытрая ва буруккинттая.
Гъумучиял лицейрал учительница Асият ХIасановал бувсуна гьунар бусса оьрчIащал цилла дайсса давурттая.
ГьунчIукьатIрал школалул директор Малик Къушиевлул бувсуна дуклаки оьрчIан кIулшиву дулаврил ва тарбиялул давриву ттизаманнул технологияртту ишла даврия.
Гъумучиял детсадрал хъунмур Лиана Муртузааьлиевал доклад бия ФГОС-рал тIалавшиннардацIун бавкьуну, школалийн гьаннинсса кIулшиву дулаву сакин даврия.
Щардал школалул директорнал хъиривчу Тигрина ХIажиевал бувсуна дуклаки оьрчIру ГИА-лийн хIадур баврия.
Хъирив совещаниялийн бувкIцири хъамал хIайран банну, чувчIав бяйкъавкьуну, пасихIну ва дюхханну, учительтуран хас дурсса назмурду дурккуна ШавкIуллал школалул байбихьулул классирттал дуклаки оьрчIал (учительница Учуева Аксана).
Юсуп МахIаммадовлул барчаллагь увкуна оьрчIру хIадур бувминнахь. «НахIакь къаучайсса бур, «дургьумурди ттихIайсса», куну. Вай оьрчIал хIадуршиннарайну чIалай бур вайннащал бунияла дакI цIуцIисса пишакар зий ушиву. Вай назмурду ккалаккиссаксса хIаллай ттун гьарцагу мукъул хъирив хъат рищун ччай бия, муксса асар хьунну ккалай бия», — увкуна ванал.
Ирина ХIабибуллаевал ххуйчулий кIицI ларгуна Лакрал райондалий ялун ххисса кIулшиву дулаврил идарарттал дуллалисса давуртту. Бувсуна республикалул КIулшиву дулаврил ва элмулул министерствалул дуллалисса конкурсирттай ми идарарттал дуклаки оьрчIал чялишсса гьурттушиннагу дурну, хьхьичIунсса кIанттурду бугьайшиву. Цаппарасса учительтуран дуллуна министерствалул чулухасса ХIурматрал грамотарду.
Казим ХIажимахIаммадовлул цалвамур ихтилатраву кIицI лавгуна, цайми районнах бурувгун, Лакрал райондалий наркотикру ппив буллалисса ишру махъсса шиннардий ялун къаливчушиву. Бувсуна наркотикирттайн къаршисса акциярду ва мероприятияртту райондалул КIулшиву дулаврил управлениялулгу, оьрчIащалсса ва жагьилтурал даврил отделданулгу ччя-ччяни дайшиву, миннуйн гьуртту хьун цайнмагу оьвчайшиву сакиншинначитурал.
«Лакрал миллат дуккавриву мудангу цайминнаяр цимигу шачIанттул лавайну бивкIшиву ттун цал ттигу исват бунни вай назмурду ккалаккисса мюрщултрал ва ихтилатру бувсса учительтурал. ДакI ххари дансса бия наркоконтрольданул пишакарнал бувсса ихтилатгу», — увкуна Амирхан МахIаммаддадаевлул.

КIулшиву дулаврил управлениялул каялувчиналгу, махъру лавхъсса учительтуралгу ихтилатирттал жям дуллай, райондалул бакIчинал цIунилгу барчаллагь увкуна кIулшиву дулаврил зузалтрахь.
«Дурмунияр данмур ттигу чIярусса дур жучIара. ХьхьичIва-хьхьичI жунма багьлай бур оьрчIру, школа къуртал бувну, жучIатува лавгун махъ цайнува цивппасса оьрмулийн хIадур буллан, ми заманалул къуркъабацIурдал лахIан къабулланшиврул, жяматрал оьр­мулуву цанмасса кIану лякъин вардиш буллан. Мунияту кIура баен аьркинну хьхьичIрасса практикалийн. Зун дакIний бухьурча, тани школарттай булайссия трактористнал, шофернал, заргалнал удостоверенияртту. Ларайсса кIулшиву ласун къахьурчагу, ми цалва пишардай зий бикIайссия. На шикку барчаллагь учивияв заргалтал хIадур буллалисса кружок, анжагъ, багьандаран дакъача, давривугу, оьрчIавугу дакI дирхьуну зузисса Куяев Нураттиннухь. Мунан кабакьу буллан жугу мудан хIадурссару.
Ххуйну хьунссия школарттай бизнес дачин даврил дарсругу дихьларча, цанчирча хIакьину ишбажаранчишиву республикалийгу, билаятрайгу агьамсса кIанттай дур», — увкуна Юсуп МахIаммадовлул.
Райондалул бакIчинал кIицI лавгуна, билаятрайсса кризис сававну, чIявусса буруккинтту щаллу бан хъанай бакъашиву. Масалдаран, цIуну дуллалисса Гъумучиял школалул къатри, капитальныйсса ремонт дансса школартту.
«Республикалий ишлану дур цивппа заллусса детсадру буллалисса практика. ЧIаххувсса районнай инвестортурал буллай бур школартту, детсадру, магьирлугърал къатри. Зул сиптарду жугу хъинчулий ккакланну», — увкуна ванал. ЦIунилва-цIунилгу барчаллагь увкуна тарихрал, архитектуралул гьайкаллу дакьин дан кумаг бувсса, чIарав бавцIусса ватанлувтурахь, миннал цIардугу кIицI дурну.
Жагьилтал наркоманиялия ва экстремизмалия байщун баншиврул, яла хъуннасса къулагъас спортрах дуллан багьлай бушиврий чIурчIав дуллай, бувсунни Гъумук буллай байбивхьушиву футболданул ва волейболданул майданну. Ми площадкардугу бикIантIишиву ГТО дулунсса оборудованиялул лащу-щаллусса.
Бувсуна лакрал миллатрал яла къалагайсса буруккин – газ буцаврил масъала ахиргу чулийн буклай байбивхьушиву. Республикалул БакIчи «Газпромрал» каялувчинащал хьунаавкьуну, Лакрал ва Ккуллал районну газрал дузал дансса Федерал программалувун дирчушиву.
Социал-экономикалул ккаккиярттайн бувну, зунттал районнал дянив 1-мур кIану бувгьуну, Лакрал район цIунилгу Республикалул БакIчинал грантран лайкь хьушиву буслай, ва хьхьичIуннайшивруву райондалул учительтурал даврилгу биялсса бутIа бушиву кIицI лаглай, Юсуп МахIаммадовлул, цIакь хьусса аьдатрайн бувну, сайки 50-хъул учительнан дуллуна администрациялул чулухасса ХIурматрал грамотарду ва арцуйнусса бахшишру. Бахшишру дуллуна ларгсса дуккаврил шинаву «Самый классный классный» ва «Лучший учитель родного языка», «Учитель года – 2015» конкурсирдай хьхьичIунсса кIанттурду бувгьусса учительтурангу.