Бивщунни цалчинсса гюнгутIи, щябивкIунни оьрчIру партардах – цавай цалчинма-цалчин, цавайгу – цалла ласласисса кIулшивуртту гихуннай дачин дуллай. МахIачкъалаллал шагьрулул школарттаву хьхьичIунмунин ккаллийсса 22-мур школа-лицейравугу сентябрьданул 1-сса кьини дия хъуннасса уттарашинна.

Бадрижамал Аьлиева
Гъинтнил 3 зуруй пахъ дагьну диркIсса хIаят ларсун дия оьрчIал ххарисса чIурдал. Ва кьини школданул хIаятраву хьусса шадлугърал линейкалий гьуртту хьун бувкIун бия хIурмат бусса хъамалгу: ДР-лул Халкьуннал Мажлисрал Председательнал хъиривчу Сайпуллагь Исакьов, МахIачкъалаллал шагьрулул администрациялул бакIчинал цалчинма хъиривчу Запир Алхасов, ДР-лул Халкьуннал Мажлисрал депутатътал Камил Давдиев, Нариман Асваров, Сергей Акулиничев, АьбдулхIалим Мачаев, аьлимчу, Аьрасатнал космонавтикалул академиялул хIурмат бусса академик Шамил Аьлиев.
Ва ххарисса чаннасса кьинилущал дуклаки оьрчIру, миннал нину-ппу ва педагогтал барча бунни Сайпуллагь Исакьовлул. Цалва ихтилатраву ванал чIурчIав дунни ва кьинилул яла-яла агьамшиву душиву 1-мур классравун нанисса мюрщулт­ран ва миннал нитти-буттан. Бувсунни ва кьини республикалул школарттал партардах щяикIаншиву 10 азара дуклаки оьрчI, кIицI ларгунни республикалул каялувшиннарал цIусса школартту буллалаврих хъуннасса къулагъас дуллай бушиву, уттинингу вай махъсса шиннардий тIивтIушиву цимивагу цIусса школа, вания тинмайгу кIира шинал дянив тIитIинтIишиву 12 цIусса школа.
Цинявппагу цIусса дуккаврил шинащал барча буллалисса ихтилат бунни Запир Алхасовлулгу, чIа увкунни оьрчIан дуккавриву тIайлабацIу, хьхьичIуннайшивуртту.
Ва школалун ДР-лул Халкьуннал Мажлисрал чулуха дуллунни цIусса интерактивный класс буван­сса сертификат.
Школа-лицейрал директор Саламат Закарияевнал барчаллагь увкунни хIурмат бусса хъамаллурахь цахра дурсса къулагъасрахлу.
Махъру лавхъун махъ, ва школданул дуклаки оьрчIал ккаккан дунни хъун дакъасса концерт.
Ахирданий хъамал ялтту був­ккунни ва школа-лицейрал кла­ссирттал.
Ва кьини дирхьунни тIиртIусса дарсругу, миннувасса ца дирхьунни аьлимчу Шамил Аьлиевлул.
Сентябрьданул 1-сса кьини ххарисса ва мунищалла гьалакшиву хIала дурхсса дикIай цалва оьрмулуву цалчин школалул хIаятраву ша бивзсса мюрщултран. Гьашину ва школалий хъанай бур урчIва 1-сса класс, цинявппагу 300-ннийн бивсса оьрчIру.
Цалчинмур классравун нанисса мюрщултращалгу, чара бакъа, ва агьамсса кьини ка дургьуну най бикIай нину-ппу. Ва кьини 22-мур школа-лицейравун мюрщулт бувцуну бувкIсса ниттихъал дянив бия жулва лакрал балайчи, тамашачитуран ххирасса Марианнагу. Ванил арс МахIаммадов Асадула ва кьини лавгунни 1-мур классравун.
— Ххирасса чIивитIулт ва миннал нину-ппу! КказитрайхчIин на дакIнийхтуну барча буллай бура зу школ оьрмулул цалчинсса кьинилущал. Ва кьини жунна цинявннан тIитIлай дур оьрмулул цIусса лажин, цIусса этап, махIатталсса цIушиннардил, яргсса асардал, агьамсса ххувшавур­ттал дурцIусса. ЦIуну школ оьрмулувун бувхминнан цалва ххуллий хьунадакьинтIиссар къачансса захIматшивуртту, амма жува, нитти-буттахъул, мудангу миннал чIарав бикIантIиссару захIматсса масъалартту щаллу буван кумаг буллай, ми тIайласса ххуллийн тIайла буллай. Умуд бур школ оьрмулул шинну жулва оьрчIан ххарисса дикIанссар, чIярусса кIулшивуртту дулунссар, миннул оьрчIан хъиншивуртту дуллан, тIайлану къуццу тIун лахьхьин буванссар тIисса. Цал уттигу, барча КIулшивурттал кьини, — тIий бур Марианна.