Июль зурул 26-нний ттул уссин АхIмадханнун там хьунни ниттил увну 75 шин. ТIайланма учин, ванал бувтссар ца виричунал ххуллийсса оьрму. 1940 шинал Къичурлухиял шяраву, Лаккуй хъинну цIанихсса Къистилихъал авладрай увну ивкIсса АхIмадханнун 2 шиннагу къархьусса чIумал, ливтIуссар нинугу, ппугу. Ва хъунагу увну, ччаннай ацIан увссар буттарссил ХIабибатлул ва буттауссурваврал ХIасаннул ва Нуруллагьлул.

Ччаннай авцIуну махъ ванан оьрмулуву хьу­сса тIай­лабацIурттугу, бартбивгьусса ххуй-ххуйсса мурадругу хьхьичIва-хьхьичI АхIмадханнул цала итххя­ххаврицIун, чувшивруцIун бавхIусса буссар. ЦIагу, авторитетгу хъунмурчIин ванал цанна цалар хьун дурсса. Му тасттикь баншиврул буцинна ванал оьрмулувасса анжагъ ца-кIива мисал.
Оьрмулул 15 шиннагу къархьусса оьрчI лавгун цана цувалу Бакуйн, тикку кIанттулгу хьуну, спортрахун агьссар. Оьр­мулул 17 шинаву, классикалул лачIунуккаврил бяст-ччалливу гьуртту хьуну, бувгьуссар Бакуй цалчинмур кIантту. ЧIал къавхьуну хьуссар СССР-данул спортрал мастер. ЧIирисса чIумул мутталий спортрал дунияллий ванал сий муксса гьаз хьуну дурхха, Бакуяту Дагъусттаннайнгу учIан увну, ванан гьарца шартIру дузал дурну дур. Оьр­мулул 23 шинавусса жагьилнан буллуну бур МахIачкъалалив къатта. Та чIумал министрнангума мукун бигьанма къатта къабулайсса бивкIссар.
Ца ххуллух, АхIмадхан Киеврай институтраву дуклакисса чIумал, Хъусращатусса Карин тIисса оьрчI (кIайннал колхозрал председательну ивкIсса Бунияминнулгу куяв), Киеврайсса вокзалданий жипливату цуркинтрал арцу дурккун, шихунай гьансса кIапIикI дакъа ливчIун ивкIун ур. Дагъусттаннаясса ушиву кIул хьукун, тиккусса цуманаллив мунахь цIувххуну бур, Амирханов АхIмадхан кIуллив куну. Му цала дусри чайхту, лавсун билетгу, ххуллийхсса арцугу дуллуну, тIайла увккун ур Дагъусттаннайн Карин.
Ца цамургу мисал. Жула генерал Халилов пенсиялийн увксса ппурттуву, та чIумал хъинну сийлий бивкIсса ДСААФ-рал хъунману ивтун ивкIссар муниннин УзбакIисттаннай зий ивкIсса ца полковник. АхIмадханнулгу, цайми-цайминналгу тIимур бувагу ккалли къабуллай, хъинну къудурну къуццу тIий ивкIун ия му гьалмахчу. Ца кьини, дучIи дакъасса ссугругу дуллай, на тай «къумаяруннангу» ккаккан бувссар нава цурав, зунгу, «цIанагьулданун», ккаккан банна мютIи шайсса куц, къашайсса куц тIий, вев-гьарай тIисса полковник, шикку халкь бусса кIанттай аварашиву къадуллай, ачу вила кабинетравун ихтилат баннуча куну, увцуну, гивува кабинетраву АхIмадханнул му полковникнайн ххуйну ца-кIива лаян бувну бия, щихьчIав зумаахъарчагу къаитанна куну.
Мукун цува аски увсса хIаписар ацIайссияв къабувсун, баян бувну бия КГБ-лийн. Миччагу иш багьну бур Обкомрайн. Оьвкуссар АхIмадханнуйн обкомрайн. Ваналгу, цичIав кьюлтI къабувну, бувсъссар гьарца зат хьусса куццуй. АхIмадханнул хъирив оьвкуну му полковникнайн, 24 ссятрал дянив кьабити Дагъусттан куну бия.
Укунсса уссар укуннагу къа­чIирисса жул агьлу-авладрал сий хъиннура лахъгу, абадгу дуллалисса инсан, Амирханнул арс Амирханов АхIмадхан — лачIун уккавриву СССР-данул шамийла чемпион.
Укунмасса буссар ванаяту бивз­сса кIиягу арсгу – Амирхан ва Камил. КIиягу Дагъусттаннай цIа дурксса спортсменталли: цалчинма – кик-боксраву Да­гъусттаннал ряххийла чемпион, дунияллул чемпионатрал арцул призер, дунияллул халкьуннал дянивсса классрал спортрал мастер; кIилчинма – карате-долуву Аьрасатнал арийла чемпион, Европанал ва дунияллул чемпионатрал арцул призер.
Аьзизсса АхIмадхан, барча дуллай буру вил ххаллилсса оьрмулул ххари-шадсса юбилей! ЧIа тIий бур вин чIярусса цIуллусса шинну, цIу-цIусса ххуй-хъиншивуртту. ТачIаввагу чан къабаннав Заннал вин вила чумартсса ва чувшиву ххисса дакIнин лавхьхьусса бутIа!
Ися Амирханов