АБАКАРХЪАЛ ХIАЖИМУРАДЛУЛ АРС АБАКАР-ХIАЖИ
Июль зурул 26-нний, оьрмулул 83 шинаву, ахиратравун лавгунни жула жяматрангу, лап чIявусса кIулминнангу бусравну ивкIсса, миллатрал кIинилун ккалли ан лайкьсса, журат дусса, мубараксса бусурманчу Ххутиятусса Абакархъал ХIажимурадлул арс Абакар-хIажи.
ЧIивинийва, школданий дуклай унува тай кьянкьасса дяъвилул ва танияр махъсса шиннардий захIматрал кьадру кIул хьусса Абакар колхозраву хьхьичIунну зий ивкIссар, чIун дирукун лавхъссар цала Ватан ххирашиврул буржгу ххаллилсса Совет Аьралуннаву – Германнаву.
Армиялия увкIун махъ дяъвилий дирсса щавурдал мушакъат увсса бутталссагу, цаярва мюрщисса уссил ва ссилссагу бувссар. Дазу-зума дакъа ххирая мунан цалла нину ХIулаймат – дяъвилул ва танияр махъсса шиннардий колхозраву зий аьйплу хьусса. Ганил цила мукьав, колхозрал ххуллу буклай, 100-нияр ххишаласса кило ласайсса диркIссар ва жагьилну дуна аьпалувух дирхьуссар. Ппугу, нинугу ливтIусса чIумал, 70-ку шиннардий, Абакар айивхьуна цайнува цува куртIнивун увххун дин-ислам лахьлан. ЧIивинийва чак байсса Абакардул ччясса мутталий лавхьхьуна дакIних кьурандалул чIявуми сурарду ва мунийну тасттикь бувна цува пагьму-гьунар бусса динчи ушиву. Та чIумалния шихунмай Абакардул ккаккан буллай ур цанма цуксса кIанийн бувтун кIулссарив иман-исламрал мяъна ва цимигу бивкIу-букку тIайла бувккунни лавайну кьулгьу-кьуран буллай, бивкIулул заллухърунналгу бусрав-барачат буллай.
МахIачкъалалив къатригу ларсун, Лаккуя шилун ивзсса шиннардий Абакар зий уссия заводирттал экспедиторну. Давриву хьхьичIунну зузаврихлу грамотартту, арцуйнусса бахшишру дуллуну дур, мунал сурат заводирттал ХIурматрал улттуй рирщуну дур.
Цахава лавхьхьусса, гьунар бусса, ччарча дуккавриву, ччарча давриву, ванал арсгу уссия, душругу бур. Цала душваралгу, арсналгу, миннал оьрчI-душваралгу ларайсса кIулшивуртту ларсун дур, миннаватугу ца душнил медициналул элмурдал, ца душнил арсналгу математикалул элмурдал кандидатшиврул цIарду ларсун дур. Абакардул хъинну ссавурданий, хъунасса дурккучунал кунма кьамул бувна ванияр цаппара шиннардил хьхьичI, милицалтран кумаг бан лавгун уна, цала чIаххурайсса къатраву кьадарсса къачагътурал ккуллалул увтун бат хьусса цала ца акъа-акъасса арснал бивкIу.
Абакар шамийла хIажлив лавгун, хIажинал цIагу ларсун, Абакар-хIажи хьуссар.
Абакар-хIажинал хIурмат-изат, бусравшиву, ганал мубаракшиврул сий цуксса лахъсса дуссарив мяйжан бунни га уччин хIатталлив бувкIун бивкIсса ва кIюрххи-кьуннилсса кьулгьулийн букIлакIисса мухлукьрал.
Абакар-хIажинал бивкIулул кьурчIишиву кIидачIлай, дакIнийхтунусса жижара буллай буру ванал щарссанихь Аминатлухь, арснал щарнихь ва душваврахь, цала душваврахь, гайннал оьрчIахь ва куявтурахь, ва махъсса цинявппагу гъан-маччанахь. Цал аьпа баннав, гьав нурданул дуцIиннав, алжаннул ххари аннав. Амин!
Ххутрал жямат ва кIулцири
————————————
АЬЛИЛ АРС АЬЛИЕВ АБАКАР
Июль зурул 22-нний, оьрмулул 78 шинаву, хар-хавар бакъа бивкIулул хьунни Дагъусттаннал машгьурсса жяматийсса ишруккакку Аьлил арс Абакар Аьлиев.
Абакар Аьлиев увну ур 1938 шинал ЦIуссалакрал райондалийсса ЧIаящиял шяраву. Ванал захIматрал ххуллу байбивхьуну бур трактористнал пишалия. 1958 шиная 1963 шинайн ияннин къуллугъ буллай ивкIун ур Совет армиялул кьюкьлуву. Кироворогуллал зунттал мяъдандалул институт бувккуну махъ, Донецк шагьрулул шахталий ванал бивтун бур ххуллу укунасса зузалая айивхьуну, «Главволговодстройрал» ххюл-чIучIрал карьерданул директорнайн ияннин.
1991 шинал А. Аьлиев увчIуну ивкIссар Къизилюртуллал халкьуннал депутатътурал шагьрулул советрал председательну, 1993 шинал октябрь зуруя шинай зий ивкIссар Къизилюртуллал шагьрулул администрациялул бакIчину. 1994 шинал ва увчIуссар Дагъусттан Республикалул Верховный Советрал Председательнал хъиривчуну, 1995 шинал – Дагъусттан Республикалул Халкьуннал Мажлисрал депутатну. 1995 шиная 1999 шинайн ияннин ва зий ивкIссар Дагъусттан Республикалул Халкьуннал Мажлисрал Председательнал Цалчинма хъиривчуну.
Ци даврий зий ивкIун ухьурчагу, Абакар мудангу лажин кIялану ва жаваблувшиву ххину биттур буллай ивкIссар даврил мурадру. Инсаншиву, профессионализм, хьхьичIунсса граждан позиция, инсантурал чIарав ацIаву – вайнна ванал хасиятрал агьамсса лишанну.
А. Аьлиевлул дурмунин лайкьсса кьимат бивщуну, ванан дуллуссар паччахIлугърал лахъсса награда – Чувшиврул орден.
Аьлил арс Абакар Аьлиевлул цIаницIун бавкьусса чаннасса аьпа мудангу яхьунтIиссар жулла дакIурдиву.
Р.ХI. АьбдуллатIипов, Х.И. Шихсаэдов, Аь.М. ХIамидов, Р.М. Аьлиев, Ю.А. Левицкий, А.Ш. Карибов, С.С. АхIмадов, С.Б. Исякьов, Р.Д. ЖахIпаров, Г.И. Идрисов, М.И. Исяев, А.В. Сибеков, Ш.И. Шарипов, Р.А. Юсупов, М-ХI. Ш. Айдиев.
—————————————
Жула лакрал ва республикалул ххаллилсса вакил
Аьлил арс Аьлиев Абакар
хар-хавар бакъа жуятува личIи шаврил дардгу кIидачIлай, дакIнийхтунусса жижара буллай буру Абакардул ичIуваминнахь ва цинявппагу гъан-маччаминнахь.
Цал бунагьирттал аьпа баннав, рухI бигьаний дишиннав!
«Илчи» кказитрал коллектив
————————————
РАМАЗАННУЛ ДУШ БАРИЕВА ПАТIИМАТ
Рамазан зуруй, июльданул 15-нний, оьрмулул 89 шинаву, мадара хIаллай къашавайгу хьуну, аьпалухьхьун лавгунни чIявучин бусравсса, Лакрал райондалунгу ххуйну кIулсса, дакI-аьмал хъинсса, захIматрал ва дяъвилул ветеран, Хьуриятусса Рамазаннул душ Бариева ПатIимат.
ПатIимат бувну бур 1926 шинал Грозналий Рамазаннул ва Асватлул кулпатраву. Цилва оьрмулул 22 шинаву нину ва ппу ливтIуну, ванин багьссар мюрщисса ссин Ххадижатлун ва уссин МахIаммадлун нину-ппушиву дуллан. Медициналул курсругу бувккуну, зун бивкIссар Лакрал райондалул больницалий медсестрану. Цилва пиша лавайну кIулсса бушаврийну, хъунмур медсестрану бивтссар. Яла операциярттал ялувсса сестра хьуссар. 1949 шинал щар хьуссар Бариев Аьвдулбаринан. Дяъвилул шиннардия шинмай, 1977 шинайннин зий бивкIссар хъунмамур медсестрану Лакрал райондалул больницалий. Ласнащал хъунигу бувну, чивун буккан бувссар 7 оьрчI.
Хьхьу дакъа, кьини дакъа шяравусса къашайшалтрачIан лагайссия, кумаг байссия ПатIиматлул. Мунияту шяравуми ва даврийми рязину зукьлай бикIайва ваниха. Ва лайкь хьуну бия ХIурматрал грамотарттан, бахшиширттан, медаллан.
ПатIиматлул бивкIулул кьурчIишиву кIидачIлай, жижара буллай буру ванил арсурваврахь, душваврахь, вайнная бивзминнахь, гъан-маччаминнахь. ПатIиматлул бунагьирттал аьпа баннав. РухI хъинний дишиннав. Алжаннул ххари баннав.
Хьурттал жямат
———————————
Хъинну чIявусса дагъусттанлувтурал, лакрал бивкIу-буккулул цимирагу хъар бусраврай лахълай ивкIсса инсан, Заннал лагъ
Абакаров АбакархIажи,
аьпалухьхьун лагаврийн бувну, дакIнийхтунусса жижара буллай буру Абакар-хIажинал щалвагу агьлу-авладрахь ва махъсса гъан-маччаминнахь.
Ина Аллагьнал цачIана лавсъсса ххуллу алжаннул ххуллуну лякъиннав!
«Илчи» кказитрал коллектив
————————————
МАХIАММАДЛУЛ ДУШ КАМИЛОВА ЗУЛАЙХАТ
Июль зурул 22-нний аьпалул хьунни ххаллилсса зунттал душ, яхI-къириятрал ва инсаншиврул хъунмасса бутIа буллуну бивкIсса инсан, ххаллилсса нину, Камилова Зулайхат МахIаммадлул душ (Кьулгьухъал МахIаммад).
Оьрмулул 60 шин дуван нясив къавхьуну, 14 гьантта биял хьун къабивтун, цинявппа махъмигу аьтIутIи бувну, захIматсса азардануща ххассал къавхьуну, Аллагьнал биялалий ахиратрал хьунни Зулайхат.
Зулайхат бувну бур 1955 шинал Кьасумккантуллал райондалий Куркант тIисса шяраву, ЧIятусса Кьулгьухъал МахIаммадлул ва Изазал кулпатраву.
ЧIявусса ЧIяйннал инсантал рязину бикIайва, дяъвилул шиннардий МахIаммадлул захIматсса азардан дарман бувну, хъин бувссару тIий. Куркантлив дянивмур даражалул школагу къуртал бувну, Зулайхат дуклан бувххун бур Буйнакскаллал финансирттал техникумравун бухгалтер шайсса пиша лахьхьин. Мугу къуртал бувну, зун байбивхьуну бур МахIачкъалаллал Ленинский райфинотделданий бухгалтерну. Ташулул хьуну махъ Зулайхат Къизлардай зий бивкIссар Центральный Сбербанкрай бухгалтерну, муния махъ заместительну ва хъунмур бухгалтерну. Даврил пиша ххуйну кIулсса Зулайхат бувцуну бур хъунмасса Рисоводстройрал трестрал отделданул хъунмурну зун. Муния махъ бивтун бур Бабаюртуллал объединениялул налоговый отделданул хъунмур бухгалтерну. Микку зий бунува, Зулайхат бувххун бур дуклан Дагъусттаннал университетравун ва ххуйну къуртал бувну бур экономист-бухгалтер шайсса факультет.
Зулайхатлул ларсун дур чIярусса ХIурматрал грамотарду ва бахшишру. Ванин дуллуну дур «ДР-лул налоговый даврил лайкь хьусса зузала» тIисса цIа. Ва даврия бувккун бур пенсиялийнгу.
Цибанссар, ажалуннин мажал бакъассар учай. Аллагьнал ванинсса кьадар укунсса бухьунссия.
Зулайхатлул ххуйсса симан абадул-абадлий дакIниву личIантIиссар махъминнан.
Зулайхат ахиратрал шаврил кьурчIишиву кIидачIлай, жижара буллай буру ванил ласнахь ЯхIиянахь, уссихь Мудуннухь, арсурваврахь Кьасимлухь ва Арсеннухь, душнихь Тамарахь, махъсса цинявппагу гъан-маччанахь.
Алжан булуннав, гьав нурданул дуцIиннав.
ЧIяйннал жяматрал цIания АьвдурахIманов ТIалхIат
