Уттара дурккун дия Бархъаллал щар

wkpor_6Дагъусттаннал ттиркьюкьи хьусса, дунияллийх машгьурсса Бархъаллал щар уттара дурккун дия вай чаннасса гъинтнил гьантрай.

Шяравун нех дирхьуну най бия машинартту. Хъун хьуну дия ва кьини щар, бувцIуну бия цинявппагу шяравусса ккурчIа-чIира шагьрурдая, щархъая бувкIсса хъамаллурал ва ссавур дакъа миннах ялугьлай бивкIсса, буттал буттахъаява нанисса цалва хъамал бусса Бархъаллал жяматрал. IMG_8490Ва кьини Бархъалав хъамаличу акъасса бакъахьунссия цавагу ужагъ. ЧIявуми хъамал шиккун гьант­рал хьхьичIва бувкIун бия. Август зурул 7-8-нний шяраву най дия хьхьичIазаманная шихуннай нанисса Бархъаллал тIахIунтту дувултрал сянат машгьур дуллалисса билаятрал даражалийсса фестиваль.
Хъатлий дирхьусса кунна Бархъаллал щар чIалачIисса щюлли къурув бивщуну бия хъамаллурансса ва фестивальданий цалла сянат ккаккиялун дишин, мастер-классру ккаккан буван бувкIминнансса чятирду. Бивзун бия къазанну, дуллай бия мажлисрал ссупрарду тIитIинсса лакку дукрарду, ишттахI багьманаща гъан хьуну ххал дуван бюхълай бия Бархъаллал гьарацIава хьамаран дирзун нанисса дукьрахIан. Гьарица чулуха баллай бия балайрдал чIурду, тIуркIу тIий лечлай бия байрандалия ххарисса мюрщи оьрчIру.
Бархъаллал цIанихсса тIахIунтту дувай усттартал бакъассагу, цалла карунних дурсса эмаратру ккаккиялун дишин бувкIун бия Оьргърал (Кубачиял), УнцIукIуллал, Гъумучиял заргалтал, СсурхIиял бартбисуртту щащулт ва цаймигу республикалул щархъавасса усттартал. Шикку ккаккиялун дишин ларсун бувкIмур чIяруя, цаннияр ца ххуйсса, магьирлугърал ттиркьюкьая ябатIин хъанай бакъая. ЛяличIинува ябацIлай бия Бархъаллал чIявуми кулпатирттаву уттинин цимигу никирая шихуннай ядурсса, байраннайн, хъатIайн дакъа къалаххайсса, нукIузаманнул гузмардай ва лачакирттай.
IMG_8475Фестивальданийн бувкIун бия республикалий бакъассагу, Аьрасатнавугу, дазул кьатIувгу цикссагу выставкардай гьуртту хьусса дунияллийх цIа дурксса, кару мусилсса усттартал. Бия шикку буттахъал сянат узданну ирсирай дачин дурсса оьрчIру, оьрчIал оьрчIру, хIасил щаллу­сса кулпатрува.
Бархъалав байран лахъа-хъун дан бувкIун бия республикалул ва райондалул къуллугъчитал. Миннавух бия ДР-лул миллатирттал политикалул министр Татьяна Гамалей, ДР-лул Финансирттал министерствалул отделданул начальник МахIаммад МахIмудов, ДР-лул промышленностьрал, машлул ва инвестициярдал министрнал хъиривчу Расул Гъаирбеков, вара министерствалул Халкьуннал художествалул сянатру цIудуккан даврил отделданул хъунама ХIамзат ГъазимахIаммадов, ДР-лул Туризмалул комитетрал председатель Виталий Демченко, ДНЦ РАН-далул геотермиялул масъаларттаха зузисса институтрал элмийсса секретарь Саид Ниналалов, Лакрал, Ккуллал, ЦIуссалакрал администрациярдал вакилтал, Ахъушиял райондалул администрациялул бакIчи, мукунма Москавлиясса, Санкт-Петербурграясса ва республикалиясса творчествалул интеллигенция.
Фестиваль дайдишиннин мунийнсса хIадуршинна дуллай, цинявппа къайгъурду цалва бакIрайн лавсун, букIлакIисса хъамалгу кьамул буллай, гьарица давурттавух цува хIала увххун зий ия фестивальданул спонсор, ххаллилсса, уздансса бархъарачу, «Калибр» компаниялул генеральный директор Расул Кьаландаров.
ЛичIинува кIицI лаган ччива щаллу-ккурккисса зуруй, ва фестиваль лавайсса даражалий тIайла дуккаву мурадрай, ухха­ву, ацIаву дакъа зий ивкIсса, шяравугу, райондалийгу бусравсса, Бархъаллал шяраваллил администрациялул бакIчи Аьвдулжалил Абакаров.
Гьарица буттал шяра­ва­лли­цIун бавхIусса иширттавух чялишну гьуртту шайсса, Аьрасатнавугу, чил билаятирттайгу Бархъаллал цIа машгьур дурсса цIанихсса къавтIала ХIаммадов Къачул душ ПатIиматлулгу ва фестивальданийгу хъуннасса хъар лархъунни. Дунияллийх жулла сянатру машгьур даву мурадрай, ПатIиматлул бучIан бувну бия халкьуннал сянатир­ттал минахуртал хьусса чIявусса пишакартал, магьирлугъраха ва искусствалуха зузими. Фестивальданул программа хIадур даву, фестиваль дачин даву бакъассагу, ПатIиматлун цинмагу, уссу-ссурваврангу чIявусса хъамалгу кьамул буллан багьунни.
Чил миллатрал дянив, Ахъу­шиял райондалий лайкьну, бусравну оьрму бутлатисса Бархъаллал жяматрал сий хъиннура гьаз дансса даву хьунни ва фестиваль. Чумартсса, сахаватлувсса Расул Кьаландаровлул хIарачатрайну ца ттигу яргсса лажин чирчунни цIанихсса Бархъаллал тарихраву. Ва даврийну Бархъаллал шяраваллил цал утти­гу ккаккан бунни цалва бюхъу ва гьунарду.
Бархъаллал жямат ва хъуннасса байрандалущал барча буллай, миннал яргсса тарихрая, щарнил ляличIишиврия, цIанихсса тIахIунтту дувултрая, заргалтурая, къавтIалтрая бусласисса ихтилатру бунни фестивальданийн бувкIсса бусравсса хъамаллурал.
Цинявппагу ва байрандалийн бувкIминнахь, шикку гьуртту хьуминнахь, байран лавай­сса даражалий тIайла дуккан хIадуршинна дуллай цала чIарав бавцIуминнахь барчаллагь увкунни фестивальданул спонсор Расул Кьаландаровлул.
Выставкалий ккаккиялун дирхьусса кьай-кьуйгу ххал дурну, машригу бувну махъ байбивхьунни шяраваллил жяматран хъуннасса агьамшиву дусса масъалартту гьаз буллалисса, хъунмасса мюнпат бусса инвестициялул проектрал кьутIи чичлачисса «ккуркки стол». Фестивальданул спонсор Расул Кьаландаров, Ахъушиял райондалул ва Бархъаллал шяраваллил администрациярдал бакIчитал цалийн бувкIун, чирчунни 20 миллиондалия ливчусса арцунсса инвестициялул икьрал. Му икьралданийн бувну, ялунчIилсса шинал Бархъалав буллай байбишин тIий бур Этнический центр ва шиккун бувкIсса хъамал бацIансса къатри.
Хъирив, Бархъаллал тIахIун­ттив дувултрал сянат ядуллай, му духлаган къаритлай, чIярусса шиннардий муниха зузисса усттартурал даврин лавай­сса кьимат бишлай, райондалул администрациялул чулуха дуллунни ХIурматрал грамотарду. ЛичIиссара бахшиш дунни бусса оьрмулий тIахIунттив дуллай бивкIсса ХIажиева ПатIиматлун. Райондалул администрациялул хъунаманал ванин буллунни эмаратсса бартбису.
Ва фестивальданийннин презентация дунни, Расул Кьаландаровлул харжлугърайну буккан бувсса, «Бархъал — тIахIунтту дувултрал шяравалу» тIисса, Бархъаллал шяраваллил гьану бивзния шихунмайсса, та синааьрщи цалчин каруннил дургьусса усттартурая шихунмайсса Бархъаллал цIанихсса тарих чивчусса лу.
Мукунма байрандалий бачIлай бия фестивальданул лишанну дирхьусса кIяласса кьяпри ва футболкарду. Гьай-гьай, цумур духьурчагу байран концертрал чIюлу дай. Бархъалав вайннал кьини хъун дан бувкIун бия Ккуллал, Лакрал, ЦIуссалакрал районнал культуралул зузалт. Концерт дайдишайхту гъарал ялун дагьнугу, лакку балайрдах мякь бувксса бархъал, дири-диривмургу ялун дуртун, концерт къуртал хьуннин сукку къавхьуна. Тамашачитуран ляличIинура ххуй дирзунни ЦIуссалакрал райондалул культуралул къатлул зузалтрал ккаккан дурсса хъатIул аьдат. Вайннал кьинибархан ччаннай бавцIусса тамашачитал лакку дук­рардал чIюлу дурсса авадансса хъатIул урцIай хъамалу бунни.
— Агь, зу цIуллу бивухъул, душрув, хьхьичIарасса хъатIул аьдат ккаккайхту, тай жува щар хъанахъисса жагьил заманнай­сса чIунну дакIнийн дагьуннихха, — тIий зукьлай бия жул чIарав бавцIусса бугьарасса хъами.
Гихунмайгу буссар.
Андриана Аьбдуллаева
Имара Саидова