Гъинтнил каникуллал чIумал бигьагу лаган, цалла цIуллу-сагъшивугу цIакь дуван лагерьдайн лагай чIявуми оьрчIру. Мукунма детдомирттавасса, нину-ппу бакъасса, ягу нитти-буттал кьабивтсса, оьрчIругу. Мукун, Каспийск, Избербаш ва Дарбант шагьрурдал детдомирттавасса оьрчIру гьар шинах бигьалагайссар Избербашуллал «Маяк» лагерьданий. Ва гьарца гъинттул минначIа лагерьданий шайссар хъамал. Мукунма ва ххуллухгу.

Бадрижамал Аьлиева
Гьашину 18-сса шинни лагерьданий бигьалаглагисса детдомирттал оьрчIансса акция щаллу дуллай, мунил лагрулуву байранну дуллай. ОьрчIансса байрандалул сакиншинначитал хьунни «Матери России» суккушиннарал Регионал отделение, «Единая Россия» ВПП-лул КМО-лущал, ДР-лул Жяматийсса палаталущал, ДР-лул Миллатирттал политикалул министерствалущал, Каспийскаллал шагьрулул администрациялущал, «Дагестанский фонд Миралущал», ДР-лул Солдатътурал ниттихъал комитетращал, Каспийскаллал КIулшиву дулаврил управлениялущал, Каспийскаллал шагьрулул Кулпатран ва оьрчIан кумаг баврил центрданущал, динчитуращал, жяматийсса сакиншиннардал вакилтуращал, ишбажаранчитуращал, ЦБС-лул зузалт­ращал ва хъинсса даву дуван ччисса укунмасса инсантуращал цачIуну.
Ва даврил агьаммур мурадгу бур ятинсса оьрчIал, нитти-буттал ургала акъа ливчIсса оьрчIал масъаларттахсса общественностьрал бургаву ларай даву, миннан кумаг баву, нитти-буттал ттюнгъашиву, гъилишиву дакъа ливчIсса миннал оьрму чаннал ва гъилишиврул буцIин баву.
ОьрчIал ва миннал хъамаллурал хьхьичI махъ лавхъу­нни «М­атери России» суккушиннарал Да­гъусттанналмур отделе­ниялул Председатель Таиса Ма­хIаммадовал. Мукунма махъру лавхъунни махъсса хъамаллуралгу.
Ва акциялул лагрулуву аякьалулун лавсун ур Каспийскаллал, Дарбантуллал, Избербашуллал детдомирттавасса 80 оьрчI. Гьарцагу оьрчIан буллунни нацIу-кьацIурдащалсса кIи-кIива кьуцури, мороженое, футболкартту. Столовойлуву тIурча оьрчIах ялугьлай бия республикалий ххуйну кIулсса «ЗМ» кофейнилул чулухасса ва «Восток» ттучандалул чулухасса пироженыйрду.
ОьрчIру бялахъан бувансса программа хIадур дурну дия Къазан шагьрулиясса «МАЭСТРО» МКЦ-лул клоунтурал.
Ва акциялул сакиншинначитал ляличIийссава барчаллагь тIий бур машгьурсса балайчитал Хасбулат РахIмановлухь ва Руслан ХIасановлухь, чIавасса балайчи Таиса Темировахь, ва давривух дурсса хьхьичIунсса гьурттушиннарахлу.
Ва шадлугърал ахирданий ихIсаниятрал акциялувух яла хьхьичIунну гьуртту хьуми лайкь хьунни Щалвагу Аьрасатнал «Матери России» суккушиннарал чулухасса Барчаллагьирттан.
Ва батIаврия циняв ппив хьунни рязийну, ярг-яргсса асардащал.