Лавгсса бигьалагай гьантрай Рязаннай хьуну дур СНГ-лул республикарттал чемпионнал цIанийсса кикбоксинграл турнир «Золотые купола». Муний 81 килорал кIушивруву чемпион хьуну ур жула лакку оьрчI, Къяннал шяраватусса Энгельслул арс ХIажимахIаммадов НурмахIаммад.
Зулайхат Тахакьаева
Гьамин ванал бияву ккалли дуллай бур турнирданий яла бунияласса бияврин. Цанчирча ванайн данди увккун ур цаярагу 10 шинал хъунасса, лап гужсса муттаэ, уттинингу 121 биявриву ххув хьусса Дунияллул чемпион Артем Макиян. Цала муттаэтураяр оьрмулул чIивисса ухьурчагу, кIулшивуртталгу, спортралгу, оьрмулулгу опыт НурмахIаммадлул къачIивисса бур. 15 шинаву экстерно школагу къуртал бувну, дуклан увххун ур, цала бутталгу хьхьичIунну къуртал бувсса (хьхьичIва Рязаннал аьрали училище), Рязаннайсса Аьрасатнал воздушно-десантный аьралуннал академиялувун. Дуккавривугу, спортравугу ххуйсса ккаккиярттащал къуртал бунни 3-мур курс, ласлай ур нитти-буттайн къаувккун цала цува щаллу уллансса стипендия. Ва ур отделениялул командир. ЧIивинияцIава спортраву итххявхсса НурмахIаммад ттинингу цимилагу хьуну ур аьрали гужирдал чемпион, карунний бияврил ва биатлондалул чемпионатирттай.
«Мунал оьрмулувусса чIаважагьилтал цаява ябуцан бан сислай бакъар нину-ппу, ина тIурча чIивисса оьрмулий арс тIайла увккун ур хъуни-хъунисса захIматшивуртту духIан багьайсса, дуклан бувхминнава бачIиннул бачIиссаннащавагу къуртал бан къабюхъайсса аьрали академиялувун», увкукун: «ЗахIматралли инсан сасангу айсса, бюхттулгу айсса. Мунияту чув-адамина кIанттуву унува кьянкьану тарбия уллан аьркинссар», — тIива ванал буттал. ДакIнийн бутанна, Энгельс МахIаммадовичлун цаппара зурдардил хьхьичI дуллуссар «Чувшиврул орден». Ва тамансса шиннардий зий уссия Чачаннал ХIукуматрал охраналул хъунаману, Кабардин-Балкьарнал паччахIлугърал мюхчаншиву дуруччаврил центрданул каялувчину, Аьрасатнал МВД-лул департаментрал каялувчину. ЦIанакул зий уссар Ингушнал виваллил иширттал министрнал хъиривчуну.
НурмахIаммадлунгу СНГ-лул чемпионнал цIа ххувшавурттал дайдихьу хьуну лякъиннав! Буттал ххуллийх гьансса, буттал кьяпа гьаз бансса, Къяннал щар лахъа-хъун дансса, лаккучунал цIа бюхттул дансса чув изаннав вия.
