Вин гьунттийсса оьрмулийнгу тамахI бурив?

— Ина янсаврал ччуччивуй, му ттул хъунил дянийх ттукку цан бувцуну най ура! – тIий, вев-гьарай тIий, дяъвай-талай диркIун дур ПатIима.

— Валлагь, гьунттийгу гьаннахха, — куну бур танил оьлусса мукъурттил ссибизан увсса оьрчIал.
— Вин гьунттийнинссагу оьрмулийн тамахI бурив, на ина ивкIуния тIийрахха дусса, — чайва тIар щар­ссанил.

Кьунклунуксса кIулсса ура

Оьрмулул угьарасса Чуди аьличIан ан къаччай, ккурчIав арамтал ссихI къадуклай, ссавурданий вичIи дирхьуну бивкIун бур. Ахиргу, та къуртал къахъанахъикун, Гъанил чайва тIар:
— Ина, Чудий, ницалуксса дур­ккусса, кьунклунуксса кIулсса ура, — куну.

Ина оьккиравкьай,
на оьккирав?

КIира щарсса – лас усса ва акъасса, – оькки-ххуйлийн дагьну диркIун дур.
— Агь, дучIидакъуй, вил ттущал гъалгъа тIунсса лажин дуссарив. Кьунну вичIату увккун най вай ттула яруннин чув-адамина ккав­ккунни, — куну бур лас умунил.
— Хъунмасса тамаша. Ца хьхьуну адамина увкIсса на оьккиравкьай ягу мудан адамина уттуивхьунасса ина оьккирав? – чайва тIар лас акъамунил.

Ялув ликкаву цира?

Классраву ца яла вяйливманан хIисав айсса ХIасаннухь учитель цIухлай ивкIун ур:
— АфрикIа чув буссар? АфрикIа чув буссарарч?
ХIасан цувама АфрикIаная, хъинну кувкун, хъинну архну ивкIун ур. Уттигъанну цува муна му учительнал багъравун гьивч бацин увххун ивкIшиву дакIнийн багьсса ХIасаннул, африкIа тIисса махъгу «ахърикIа» тIисса кунма бувчIуну, чайва тIар:
— Ярчу, ляличIину ттул ялув ликкаву цира, миминнахьгу цIухха, на акъа вил ахъувун цама къаувхсса ххай урав! – куну.

Къарчигъайлия хьусса вяркъу

Хъунисса къуллугъирттай зий, мажлисирттай, хъатIай тямадашиву, шагьшиву дуллай ивкIсса Зангу яла махъ, ссаллив ялув авара хьуну, къуллугъраягу укьан увну, хIанттихун агьну, хъинну зия хьуну ивкIун ур.
Ца хъатIий, зума-къира­гъи­райгу щяивкIун, лап ялгъузну чIалай ивкIун ур Зангу. Ганахгу урувгун, Чудил чайва тIар:
— Бургира жула Гасановичлух (хьхьичIва цинявннал укун чайсса бивкIун бур ганайн). Ххал бара, цукунсса къарчигъайлия цукун­сса вяркъу хьуну бурив! – куну.

Хъярчру чивчуссар
ЧчитIал Исял,
ш. Вихьул