Оьрмулуву чIявусса ккавкнугу, диялсса захIматшивуртту дугьан багьнугу, дакIнил къалп къавхьусса, инсантуращал хIал бавкьусса, аьчухсса хъамитайпа бур ттул чIаххущар, Убурдал шяравасса Аьйшат Мустапаева.
Андриана Аьбдуллаева
МарцI-кIяласса бурчу, ссав кунма чаннасса яру бусса Аьйшатлул жагьилнийсса ххуйшиврул лишанну цIанагу, оьрмулул 80-хъайсса шинну хьуну дунугу, яхьуну дур. Даврийн ягу даврия нанисса нагу,
цила иширай кьатIув бувксса Аьйшатгу ччя-ччяни хьунабакьару. Ванищалсса хьунабакьаву мудангу тIааьнсса дикIай. Цуксса мажал бакъа нава бухьурчагу, Аьйшат хьунабакьаврия на ххари шара, ванищал жап увкукун рахIат буккара. Бургъия кунма чани ва гъилишиву нанисса, ттулла ххирасса бавахъал лащин дусса лакку инсаннахь «бивзрав, Аьйшат» учин биривсса кьини ттун тIайлабацIусса дикIай. Аьйшат къаккаклай гьантри хьурчарив, ванин цичIаввагу къавхьурвав тIисса ццах багьай.
— Ина чун бакъа хьуну буссияв, дадал, къаша-шавайвагу бакъарвав тIий нигьадурсун диркIрахха, — тIий цIунилгу на ккаккаврия Аьйшатгу ххари шай.
Кьадарданул хъихъи диртминнавасса дакъар ттул Аьйшат-бава. 1931 шинал бувсса ванил оьрчIшиву дяъвилул шиннардийн тIайла дарцIуну дур. Танийсса чIявуми оьрчIан кунма, ванингу ккавккун бур ккаши. Аьйшат чIивисса чIумал личIи хьуну бур ванил нину-ппу, Аьйшатгу бутталщарнихун багьну ливчIун бур. Ччяни байбивхьуну бур ванил захIматрал ххуллугу.
Оьрмулул 12 шинаву Аьйшат зун байбивхьуну бур Микояннул цIанийсса Убурдал колхозраву. Колхозрал дояркану зий, ххулув буллай, къарду дахIлай, мицI къабацIайсса бивкIун бур чIивисса оьрмулух къабурувгун. 14 шин хьусса чIумал Аьйшат тIайла бувккун бур къутандалийн, гиккусса зузалтран дукра дуллан. Калпуширттая цила карунних бувсса пачливу ччатIгу шавхьун, дукрагу дайсса диркIун дур.
Буттал щар буллуну бур Аьйшат чIивисса оьрмулуву. Щар хьуну, лавгун, ласнащал Челябинскалий 3 шингу дурну, зана хьуну бур МахIачкъалалив. Ласнаягу ванин цичIав неъмат къаккавккун бур. Цила къатта-къуш щаллу бан зунсса кIанттурдах луглан бивкIун бур. Ванил хIакьинугу барчаллагьрай дакIнийн утай цинма та захIматсса чIумал вокзалданийсса ресторандалувун зун буххан кумаг бувсса, таний къуллугърайсса СутIаев фамилия дусса лаккучу. ЦIубутIуй му ресторандалуву кухрабочаяну зий бивкIун бур. Ца-кIива зурува, ванил занакьулушиннарай дакI даркьусса ресторандалул хъуниминнал 3-мур разрядгу дуллуну, поварну бивтун бур. Хъунма хIал къавхьуну Аьйшатлун 4-мур разрядгу дуллуну дур. «Мустапаевай, жу вин 5-мур разрядгу дулувияв, вил образование дакъашиврийн бувну, хъанай дакъар», — тIий бивкIун бур Аьйшатлия рязисса хъуними.
Ца чIумал ресторандалул хъуниминнал гьан бувну бур Аьйшат Минводылийн повартурал дянивсса конкурсрайн. Дурккусса, хасъсса кIулшивуртту ларсъсса бакъанугу му конкурсрай Аьйшатлул цалчинсса кIану бувгьуну бур. Ванил бувсса узбакI пулав, къавахърал буркив ва лакку ккурккимай цинявннан ххуйдирзун дур, ванин лавайсса кьиматру бивхьуну бур конкурсрал жюрилул. Укунмагу бакIрал ххуйсса Аьйшат цуппагу кIяла халатраву цинявннал ябацIанну бивкIун бур.
Сайки 29 шин дурну дур Аьйшатлул ва даврий зий. Цилалу хъуни бувну бур 6 оьрчI.
Аьйшат бур дяъвилул ва захIматрал ветеран.
Гьашину Хъунмасса Буттал КIанттул цIанийсса дяъвилий Ххувшаву ларсун 70 шин хъанахъисса байрандалул гьантрай ванин дуллунни юбилейрал медаль.
Цинна дуллусса медальдануцIагу ххарину, Аьйшат дакIнийхтуну барчаллагьрай бур, тай дяъвилул шиннардий цилва бивхьусса захIматрал кьимат бишлай, цуппа кунмасса инсантураха аякьа чан хьун къаритлатисса Аьрасатнал Президент Владимир Путиннуйн ва Дагъусттаннал БакIчи Рамазан АьбдуллатIиповлуйн.
Цалва оьрмулуха къалавхьхьуну хъунисса захIматру бивхьусса Аьйшат кунмасса бавахъул чIивимунилгу ххари бувай. Зий аьдатсса вай оьрмулул шиннахьхьун рай къабуллай ххяп-шап тIий, шаймур буллай бугьара хьуну махъгу мицI къабацIай.
Хьунабавкьуру хIакьинугу даврийн нанисса нагу, ттучандалийн нанисса Аьйшат-бавагу гава кIанай:
— Бивзрав, Аьйшат! Ина хьунабавкьусса кьини ттун тIайлабацIу бусса дикIантIиссар.
— Бивзрав инагу. Лакку зумувну ттухь бивзрав учин ина ттун чан къабаннав.
