САЙПУННУЛ АРС АЬВДУРАХIМАН АЬЛИЕВ
Вай гьантрай хархавар ба­къасса, кьюлтI учин захIматсса кьурчIишиву дирунни Ккур­ккуллал шяравасса Аьлиевхъал кулпатравун.
Цалла ххирасса нинугу хIас­ратрай кьадиртун, жагьил­сса оьрмулуву дунияллия лавгунни Сайпуннул арс Аьлиев АьвдурахIман.

АьвдурахIман увну ур 1974 шинал май зурул 31-нний МахIачкъалалив.
МахIачкъалаллал 38-мур школагу къуртал бувну, заргалнал касму лархьхьуну, арцу-мусил кьай-кьуй дуллай уссия. Ва ия кару мусилсса усттар, дакI-аьмал хъинсса, хасиятрал авкьусса жагьил.
АьвдурахIман шяраву бусравсса нитти-буттал арсъя. Ца-кIира шинал хьхьичI аьпа­лул хьусса ванал ппу Сайпун физикалул ва математикалул элмурдал кандидатъя. Нину Уммугьанат аьчухсса, гъан-маччаначIагу, чIахху-чIарахначIагу хIурматрайсса хъамитайпа, бусса оьрмулий оьрчIал багъраву тарбиячину зий бур. Ванил ялун дирсса кьурчIишиву дюкъархсса цучIав акъар ва кIулминнаву.
АьвдурахIман аьпалул хьу­сса кьурчIишиву кIидачIлай, жижара буллай буру ниттихь, уссурссуннахь, махъсса гъан-маччанахь. Цал рухI хъинний дишиннав, алжаннул ххари аннав. Ванан къабуллусса оьрму махъсса цинявннан булуннав.
Ккурккуллал жямат

——————————————-

ЮНУСЛУЛ АРС КЬАРНАЕВ КЬАРНАЙ
КIира-шанна шинал мутталий сакъатнугу ивкIун, июньдалул 23-нний, оьрмулул 86 шинаву, аьпалул хьунни чувнайн учин бюхъайсса язими цIарду учин лайкьсса лаккучу, ларгсса ттуршукулул ахирданий билаятрай хъанахъисса аварасса ва нигьачIисса иширттаву цалва чIивисса миллат­ралгу, щалва Дагъусттанналгу оьрмулуву хъанахъимунил ва бучIанмунилсса буллай, чялишну хIала увххун ивкIсса патриот, жяматийсса ишккакку ва маслихIатчи (народный дипломат) Кьарнаев Кьарнай.

Кьарнай увссар 1929 шинал Лакрал райондалийсса Гьущиннал шяраву, ХIучIахъал ттуршамасса тухумраясса Юнуслул ва Аьишатлул кулпатраву, 6-ма оьрчIну. Буттал шяраву 4, яла Гъумук 7 классгу бувккуну, махъсса шиннардий дуланмагърай лавгун ур Къазахъисттаннайн. Ти­кку, ккарччал техникнал касмугу дургьуну, зий ивкIун ур частный предприятиялий. Мунил цIаний органнал чан-кьанну кIункIу-хъит увну махъ буттал миналийн зана хьуну ур, зун ивкIун ур, кулпат бувну бур. КIия арс ва кIива душ хъуни бувну, цинявнная ларайсса кIулшивуртту дусса сянатчитал бувну бур.
ЧIивисса чIумала чIунархIал оьрчIаву зирангшиврул, за вив ласаврил ялун ливчусса Кьарнайл мура тура дургьуна яла щалва оьр­мулувугу. Мунияту бакъаяв аьпа бан, Хачилавхъал МахIаммадлул мунайн хIурматрай «Чаннасса бакIрал ва кьянкьасса закканттул заллу» тIун икIайсса. Мукунсса угу-ия, мяйжаннугу, Кьарнай. Элмулуву, дин-исламраву личIисса кIулшиву ларсъсса акъанугу, га ия «оьрмулул университетру» циняв бувккусса чумарт ва аькьил. «Гъази-Гъумучи» дастталугъ дурния тинай мудан икIайссия ганил Милли Советрал, яла Хъунисриннал советрал уртакьну. Ххуйну дакIний бур, гайннуву агьамсса масъала ххалбигьлагьисса чIумал, агарда Кьарнай акъахьурча, чара бакъа кувн­нахь кув ганал ци пикри бурвав тIий бикIайссия. КIулну тIий та цIурувкьюсса чIумал цикссагу иширттаву хъанахъисса къурхъру ттирихIин ганал бугьлагьисса кIану. Кьарнайл оьрмулуву ва багьу-бизулуву бизлазисса шару бикIайва кIира принципрайн чул бивщусса – тIайлашиву ва кIира лажин дакъашиву, учин ччимур ттявх увкуну учаву. Дащуй бихьлан икIайссия, лахьхьу-цархьхьу ятIул билет хIурматрай хъаралужипливу бивхьуну бивкIсса «коммунистътал» янил ляпI къакуну щюллиссаннух баххана буллалийни. «Иш багьарча, мукунсса «перевертуштурал» гьунттийва щюлли билет михакрал рангиращалгу баххана бантIиссар», — тIун икIайссия. Ци диялдакъашивур­тту, циксса бяйкьу-шяйкьурду циву бивкIхьурчагу, Совет хIукумат дия тIайламунихсса, захIматчинал хIукумат. Га экьиличин къааьркинссияча, гивусса диялдакъашивуртту духлаган дурну, цIулаган дан аьркинссия тIун икIайссия гьар кIанай, га цува Совет хIукуматрал тамансса ссуссукьу увну ивкIнугу.
Лавгунни тти жула Кьарнай. Аьпа баннав цал, рухI хъинний дишиннав! Ххаллилсса чув, лавай авцIусса ппу, вихшаласса дус жуятува лагаврил кьурчIишиву кIидачIлай буру мунал арсурваврахь Шихамирдухь ва Амирдухь, душварахь Нажаватлухь ва Мадинахь, кулпатрахь Шюъванатлухь, циняв гъан-маччанахь.
Киров Султанов