Нанисса шинал май зуруй Аьрасатнал Виваллил иширттал министерствалул баян бувну буссия экстремизмалийн ва терроризмалийн къаршисса видеороликирттал конкурс. Вай гьантрай Дагъусттаннал МВД-лул конференц-залдануву ларгунни му конкурсрал хIасиллу дуллалисса видеоконференция. Му дачин дурну ия Аьрасатнал виваллил иширттал министрнал хъиривчу Игорь Зубов.
Андриана Аьбдуллаева
Цалва ихтилатраву ванал бувсунни Аьрасатнал МВД-лул ва конкурс гьашину кIилчин дуллай бушиву, мунил мурадгу агьалинан цал ттигу экстремизмалия ва терроризмалия цуксса нигь дуссарив баян баву бушиву.
— Террор ппив хьуну дур щаллагу дунияллийх. Щаллусса регионну биривну бур терроризмалул ва экстремизмалул ххурххуппалухьхьун, чIявусса бала-апатIру хъанай бур инсантуран. Ва конкурсрайн дуркIсса видеороликру жу ккаккан дуллан тIий буру, инсантал укунсса иширттая махъаллил баву, бакIрай бацIаву мурадрай, — увкунни цалва ихтилатраву Игорь Зубовлул. Ванал бувсунни ларгсса шиналмур конкурсрах бурувгун, гьашинусса конкурсраву кIилий ххишаласса инсантал гьуртту хьушиву.
Конкурсрайн дуркIун дур 140 ролик. Миннува пишакартурал язи дургьусса 26 ролик тIайла дурккун дур Аьрасатнал МВД-лул экстремизмалийн къарши бацIаврил агьаммур управлениялийн, миннувагу хасъсса комиссиялул язи дургьуну дур 11 видеоролик. Финалданувун дагьсса видеороликру социальный сетирдаву дирхьуну, кIира нюжмардий ми ххал дурну дур сетирдавун бухлахиминнал. Миннал чIурдайн бувну дурну дур конкурсрал хIасиллугу. Конкурсрал хIасиллая бувсунни Аьрасатнал МВД-лул экстремизмалийн къарши бацIаврил агьаммур управлениялул хъунаманал хъиривчу, полициялул генерал-майор Владимир Макаровлул.
Ва конкурсраву цалчинсса кIану бувгьуну бур Дагъусттаннал жагьилтурал хIадур дурсса «Своими глазами» тIисса видеороликрал. Му ххал дурну дур 12 азаллий 500 инсаннал. Мунихлу буллуну бур яла чIявуми чIурдугу – 541 чIу. Видеоролик хIадур дурсса Мурад Гайдарбеков, Сайгит Сайгитов ва Кьасим Исмяилов Дагъусттаннал Жагьилтурал министерствалий зузисса оьрчIру бур.
— Дагъусттаннал халкьуннан щиннияргу кIулссар террор цирив, му балаллухьхьун биривссар чIявусса Дагъусттаннал кулпатру, оьрмулуцIа хьуссар чIявусса инсантал. Терроризмалун ххуллу кьукьаву мурадрай дуллалисса гьарца давриву жу хьхьичIва-хьхьичI бачинтIиссару. Жула роликрайнугу жун ккаккан бан ччай бия террордания цучIав мюхчанну акъашиву, му цумур бухьурчагу кулпатравун, хIатта цала террористнал кулпатравунгума буххан бюхъайсса бала бушиву, — тIий ур Мурад Гайдарбеков.
Цала видеороликрал байбихьулий автортурал ккаккан буллай бур бавкьусса, тяхъасса, кулпат – жагьилсса лас ва щаргу, чIивисса оьрчIгу. Хъиривсса лахIзалуву кулпатравусса бутта ккаккан уллай бур автобусраву пIякь учайсса зат дирхьусса сумкагу кьабивтун увккун най. Так автобус чIарах бувккун махъ ххал хъанай бур ванан чIавахьулттивух автобусраву нанисса цалла щарссагу, арсгу. Вев-гьарай тIий хъирив левчуну нанисса буттал хьхьичI пIякь тIий бур автобус. Гава ссят СМИ-рдал баян буллай бур террористнал пIякь учин бувсса автобусраву жагьилсса хъамитайпа ва чIивисса оьрчI оьрмулуцIа хьушиву.
Ва видеоролик муксса усттарну, иш кIулну, дюхханну хIадур дурну дияхха жулва жагьилтурал, ва асар къавхьусса цучIав акъая залдануву. Акъахьунссия му асар къархьусса социал сетирдаву ккаркминнавугу. Ва видеороликрах яла чIявуми чIурдугу багьавай буллуну бия. Дагъусттаннал жагьилтал цалчинсса кIану бугьаврищал барчагу бувну, Владимир Макаровлул бувсунни гайми призертурая.
КIилчинмур кIану бувгьунни «Меняемся вместе» тIисса Пензеннал областьраясса Денис Кострюковлул видеороликрал. Ванал видеороликрахлу социальный сетирдаву 217 чIу буллуну бур.
Шамилчинмур кIану бувгьунни «Будьте бдительны» тIисса Новгородуллал областьраясса Денис Семеновлул видеороликрал. Ванихлу буллуну бур 125 чIу. Конкурсраву ххув хьуминнан цинявннан буллунни дипломру ва видеокамерарду.
ХьхьичIунсса кIанттурду бувгьуми барчагу бувну, Игорь Зубовлул кIицI лавгунни укунсса конкурсру мудан дуллан аьркиншиву, конкурсрай ххув хьусса видеороликругу инсантал террордания арх баву мурадрай ччя-ччяни ккаккан дуллантIишиву.
