ХIурмат хъунмасса «Илчи» кказитрал редакцияй! Октябрь зурул 2-нний Бакуй хьуссия Дагъусттаннал миллатирттал вакилтал бавтIсса мажлис. Му мажлисгу хас бувну буссия машгьурсса чичу ва революционер Гьарун Сяидов увну 100 шин шаврин, микку гьуртту хьунни азирбижаннал, лазгиял, лакрал, яруссаннал, къумукьнал ва цаймигу миллатирттал агьлу.

Гьарун Сяидовлул оьрмулия, мунал творчествалия ва даврия гьарза-гьартану бусласисса доклад бувна филологиялул элмурдал кандидат, лазгиял шаэр ва литературалахьхьу К. Мусаевлул. Хъирив ихтилатру бувна Гьарун Сяидовлул цIанил хIурмат бусса, мунал кьиматгу кIулсса инсантурал. Ххуйсса ихтилат бувна цIадурксса чичул ва аьлимчунал, Курди Закуевлул арснал Фаик Закуевлул. «Дагъус­ттан» центрданул правлениялул чулуха хъунмасса миннатри ванал ихтилат «Илчи» кказитрай бищаву.

Хъунмасса хIурматращал «Дагъусттан» маданиятрал
центрданул председатель, «Ватан» ассоциациялул
Азирбижаннавусса вице-президент С. Сулайманов.
ш. Баку, 4 октябрь,
1994 шин.

ХIакьину, цIунилва-цIунил Гьарун Сяидовлул сипат хьхьичI дацIан дурну, мунал бувтсса оьрмулул, дурсса давурттал хIисав ласлай, махIаттал хъанайна ура, га инсаннаща кутIасса, 25 шинал лахъишиврийсса оьрмулий цукунни гукун чIярусса давурттив дан бювхъу­сса, тIий. Мяйжаннугу, дуклай ивкIун ур Щурагь ва Москавлий, агьну ур лакрал литературалул классиктурал кьюкьлувун, ярагъгу кIунттихьну талай ивкIун ур цала халкьуннал чаннасса бучIантIимунил цIаний ва, цIупар кунма яргсса оьрмугу бувтун, лавгун ур дунияллия хIакьсса виричу-революционер куна. Лагу-лавгун ур байчарасса дагъусттаннал агьалинал тархъаншиврухлу ва талихIрахлу цалла жан дулун махъаллил къавхьуну. Этель Войничлул луттиравасса АькI (Овод) куна, цалва халкь ххассал буван Жан дуллусса Ися-Идавс куна. Лавгун ур дунияллия, ливчIун ур халкьуннал дакIурдиву. Ттун ттунагу, цайминнангу Гьарун Сяидов хьхьичI ирглий бусрав­сса, лакрал агьали чантI учин бувну чаннайн буккан буван чялиш хьуну ивкIма хIисаврайри ва жард къакуну цала бюхттул­сса идеярдайн дакI тIайланува ливчIун тIийри. Шикку тарихравасса цаппара ишру дакIнийн бутанна: философ Сократлуща ххассал хьун бюхълай бивкIссар, агана цалва пикрирдая махъаллил хьурча. Амма му цалва пикрирдайн хаин къавхьуссар. Мува му ххуллийхри лавгсса яхIлусса Гьарунгу. Амма, хIакьину жува гьулусан буллай буру цавай бяйкьусса хавардал ва иширттал: Дагъусттаннай тархъаншиву бугъ дуллай ивкIсса НикIалай паччахIнаяту Аьрасат ххассал бувсса «бюхттул мямма» уллай бур, агьали оьттуйн буккан бувсса Деникинхъая ва Колчакхъая телесериаллу хIадур дуллай бур. ХьхьичIва хъуни къуллугъир­ттай зий бивкIсса коммунистътал маша-хашалий, инсантал хъяврин буллай авадан хьусса бизнесментуращал уртакьну революциялуха, Совет хIукуматраха зайлай, нааьнарду дуллай бур. Нааьнарду дуллай бур мискинминнал чул бувгьуну бивкIсса революционертурайнгу, миннавухва Гьарун Сяидовлуйнгу. Му ивкIссар, революциялийн бувагу къабучIарчагума, Италиянал агьалинал бучIантIимунил цIаний цIаравун ххяххан хIа­дурсса Овод кунасса виричу. Агар му Занная ивзсса революционер къаивкIссания, букканавав дунияллийн ххаллилсса драма «Къалайчитал», багьа бищун къашайсса назмурду ва публицистикалул куртIсса макьаларду? ХIасил, революциялул цIанийрихха му Щурагьгу, Порт-Петровскалийгу, зунттавугу хъудугьултралсса буллай ивкIсса, партизантурал кьюкьлуй каялувшиву дуллай ивкIсса, кказит итабакьлай ивкIсса! Дагъусттаннал, Ухссавнил Ккавкказуллал агьалинал ххуйсса, куннащал кув бавкьусса оьрмур мунал мурадвагу бивкIсса, му мурад бартлаганшивруллив уххаву дакъа зий, лечлай ивкIсса. Лахъи къабан, га ивкIссар классикалул яргсса образ, кьянкьасса хасият дусса хIакьсса революционер: талатавриву сивсусса, цалва иширая акъаччайсса, хъинну за кIулсса, ххаллил акъасса, тIайлашиву ххирасса. Му мукунсса ивкIшиву бувчIуна ттун ччя-ччяни Бакуйн буттачIан бучIайсса ХIавинахъал Саэдлул, историк МахIаммад Пашаевлул бусласимунива. Мукунма бу­ттал хьхьичIунсса дуснал, чичу Ибрагьим-Халил Кьурбанаьлиевлул бувсмунива. Хъинну хIайп тIий ура тара чIумал чичрурду къадуваврий. Магнитофонну таний къабикIайва записьру дуван, видео японнанвагу макIра къаккаккайхьунссия. Ттулмур бакIравугу, ичIувацириннал тIийкун, «марч сайрданий» бухьунссия. Буттан тIурча Гьаруннуя чIявусса затру кIула – революциялул иширттаягу, творчествалиягу. Гьарун Сяидов ва ппу цимилагу хьунабавкьуссар, хIатта Гьаруннул буттал шяраву Ваччавгума цачIу щябикIлай, бизлай бивкIссар, ца даврихагу зий ухьувкун кIиягу. Гьаманки Гьаруннул маслихIатрайн бувнур ганаяр махъ ттул ппу «Илчилул» редакторну зий ивкIссагу. Гьарун аьс аврил хавар буттан бавссар анжагъ 1920 шинал дайдихьулий Турциянаву, дагъус­ттаннал мугьажиртурая. Му хавар къюкIливун бияннин кьувтIусса буттал гацIана ххирасса дуснан хас бувссар шеъри-элегия:

Ина хьунна, Гьарун,
хIакьсса виричу,
Инкьилабрал ххуллий
жан пана дурсса,
Зулму-зулмутращал
жигьардай увккун,
Шагьид хьунна ина
ургъил къабувну.
Ина ххуй дурунни
Дагъусттаннал цIа,
Виричуну авцIун
истибдардал хьхьичI,
Ина ккаккан бунни Лаккуй бушиву
ХIуриятрал ххуллий
жан дулай вирттал.
Зулмукартал вия имин хьунугу,
Вил цIа личIантIиссар
абадлий Лаккуй,
Мустибадтал утти
ххари хьунугу,
ТIутIайх бичинтIиссар
вил ххуйсса пикри.
Жу вин гьайкал данну
ссурулун щусса,
Ина шагьид хьусса
ЦIахъардал дазуй,
Жу вил гьаттал ялув
къуппа буванну,
Ялувгу чивчуну варакьрай
вил цIа.
Тти дикIувча рутIлай
оьлуркъусса макь,
Хъювсулну къуману
Къайсу аьтарттул,
Тти дикIича лакрал
мюрщисса нехру,
Къумасса ратIавух
экьи най, аьтIий…
Январь, 1920 шин, Истанбул.

Гъинттул 1943 шинал бу­тта Гъумучату Ваччав лавгссия, Гьаруннул гьаттайн ияншиврул. Тти, ва хъунасса чичул ва революционернал юбилейрал ппурттуву къабувсун къабучIир Ачунащалсса, Дагъусттаннал цалчинми комсомолкахъавасса цаннищалсса, Сяид-ХIусайнова Ххадижатлущалсса хьунабакьаврия. На ганищал хьунаавкьуссияв 1960 шинал «Зунзул чани» журналданул тIалавшиннарайн бувну, амма , цуксса утти начнугу, Гьаруннуя цичIав кIул къабувссия. Ачуна ва Гьарун цачIу зий бивкIссар, цаннайн ца чагъарду чичлайгу бивкIссар. Ганил ттухь, нач-начгу хъанай, бувсуна цуппа Гьаруннун буцин куну бивкIшиву. ЗахIматну бия ва дурхIусса дардирдал кьарчI дикIан дурсса, дугьарасса щарссаниву, авурсса, оьвхъусса, жулла дакIурдиву жагьилнува ливчIсса Гьаруннул жалин итта­лу бацIан бан. ДакIний бур, личIи хьун хьхьичI, ганил Гьаруннул сурат лякъикьай куну миннат бувсса.
– ЦIухла бивхьуния махъ ттучIа зат къадиртуна: я сурат­ру, я чагъарду, я цукунчIавсса документру, — хъювсулну куна ганил.
Шаппа на цIувххуссия бу_ттахь Гьаруннул жалиндалуя. – Буссия мукунсса хавар, ттун му душ цуппагу Щурагьсса «Илчилул» редакциялий ххал хьуна, шагьру туркнал ласун цахъис хьхьичI, так душнил цIа дакIния дурккунни, — увкуна буттал. Цаппара гьантрава на цIунилгу Ххадижат ЭфендиевначIан лавгссияв. Ттула буттащал архIал. Га ва бутта щакъалихханну хаварду буслай, лавгмур дакIнийн бутлай, ссаярив бяст буллай бия. Яла Ххадижат Эфендиевна жучIангу хъамалу бувкIуна. На ганин пишкашран, хъунна дурну, Гьаруннул сурат дуллуссия, му суратгу «Дагъусттаннал литературалул антология» тIисса луттирая ларсъссия. Га на хъунна дурсса Гьаруннул сурат хахливу дирхьуну, гания мукьах тасса-танингу Бакуйннал кIичIиравусса царай къатрал чIирайн лархъун дикIайссия.
Фаик Закуев,
Азирбижаннал лайкь хьусса журналист
Таржума ПатIимат Рамазановал. «ИЛЧИ», 1994 шин,
21 октябрь, № 41.