Июньдалул 8-нний Р. ХIамзатовлул цIанийсса Республикалул библиотекалуву хьунни «Обеление экономики» тIисса ДР-лул приоритетсса проект дузрайн дуккан даврил масъаларттан хасъсса совещание. Совещание дачин дурну ия республикалул премьер-министр Аьбдуссамад ХIамидов.
Аьбдуссамад ХIамидовлул увкусса куццуй, цалчинмур дачIи шинал хIасиллайн чул бивщуну, бучIир дуван цаппара ккаккияртту, личIи дан хьхьичIун дагьлагьисса захIматшивуртту ва хIарачат бан ми духлаган дуван.
«Приоритетсса проектру дузрайн дуккан даврин хасъсса давуртту цила чIумал щаллу дан аьркинссар. Цинявннан бувчIин аьркинссар: проектрайнусса управление – му яла хьхьичIунмур дунияллул опытри. Му система щурущи дурну махъ жулла даву бигьа хьуссар», — увкунни премьер-министрнал.
Республикалул ХIукуматрал бакIчинал бувсунни ца зурул мутталий приоритетсса проектран хасну дуллалисса давурттал ялув ацIансса пикрилий ушиву.
ДР-лул Председательнал хъиривчу – республикалул экономикалул министр Раюдин Юсуфовлул бувсунни Дагъусттаннал приоритетсса проект «Обеление экономики» дузрайн дуккан даврил хIасиллая.
Ганал мукъурттийн бувну, гьашину 6 зурул мутталий налогирттал ва къаналогирттал доходру щаллу даврин хасну ДР-лул бюджетравун дуркIун дур 13,4 млрд. къурушру, ми хъанай дур пландалиясса 88,3%. Миннувату кIанттул бюджетравун дуркIун дур 3,1 млрд. къуруширттал, ягу пландалиясса 90,3%.
Раюдин Юсуфовлул увкусса куццуй, гьашину налогирттал ва къаналогирттал доходру республикалул бюджетравун дуркIун дур, дукIумур шинах бурувгун, 1030,3 млн. къуруширттал ххишалану.
Министрнал гьартану бувсунни цуми журардал налогру циксса дуркIссарив, ялунбихьуртту цими процентрал биттур бувссарив. Ганал мукунма бувсунни экономика марцI дуккан дан цукунсса давуртту дуллай буссарив.
Совещаниялий премьер-министр Аьбдуссамад ХIамидовлул бувсунни муниципалитетирттал бакIчитуран аьркинну бушиву циняв зузими налогирттал учетрайн ласун, харжру документирттайну ласласи буллан. Совещаниялий ххалбивгьунни акцизирттал хIакъиравусса масъалагу.
Республикалул бюджетравун налогирттал доходру дучIан даврил масъаларттал хIакъираву ихтилат бунни ДР-лул УФНС-рал каялувчинал хъиривчу Нуруллагь Хизриевлул.
Совещаниялий ххалбивгьунни «Обеление экономики» приоритетрал проектрацIун бавхIусса цаймигу масъалартту.
ХIадур бувссар ХI. Аьдиловлул
